Ipatnag so Kristianon Katooran Sano Adispelosip so Sakey a Kanayon
1. Anton kipapasen so manubok ed katooran na sakey a Kristiano?
1 Nayarin maap-apit ed sakey tan sakey iray membro na pamilya. Saya so manubok ed sakey a Kristiano sano say asawa, anak, ateng, odino sakey a maapit a kanayon so adispelosip odino inmekal a bukor ed kongregasyon. (Mat. 10:37) Panon so nepeg a pideneng na saray matoor a Kristiano ed satan a kanayon? Kasin nepeg a duma so pideneng no sikatoy kaamong yo? Unona, repasoen tayo no anto so ibabaga na Biblia ed sayan tema, a saray prinsipyo na satan so parehon onaaplika ed saramay adispelosip tan ed saramay inmekal a bukor.
2. Unong ed Biblia, panon so nepeg a pideneng na saray Kristiano ed saramay inekal ed kongregasyon?
2 No Panon a Pidenengan Iray Inekal: Say Salita na Dios so mangigaganggan ed saray Kristiano ya agmiulop odino milimog ed toon inekal ed kongregasyon: “Agki miulop ed bengatlan too [“siopaman,” NW] ya anggan tatawagen ni na agi no managlawan, odino maagum, odino manangigalang ed talintao, odino manag-ayew, odino managbuanges, odino managpatubo; dia ed satan a too agkayo miulop a mangan. . . . Paekal yo sirin so mauges a too ed pegle’yo.” (1 Cor. 5:11, 13) Saray salita nen Jesus a nikurit ed Mateo 18:17 so walaan met na pisiglaotan: “Ipasen mo ed sika [so sakey ya inekal] a singa Gentil tan publikano.” Amtan tuloy na saray dumerengel nen Jesus a saray Judio ed saman a panaon so agmililimog ed saray Gentil tan papaliisan da iray managsingil na buis bilang impulisay. Kanian binilin nen Jesus iray patumbok to ya agmililimog ed saray inekal.—Nengnengen so Say Panag-Bantayan ed Marso 1, 1982, pahina 22-24 (Setyembre 15, 1981, pahina 18-20 na The Watchtower).
3, 4. Anton nengneng na pituyaw ed adispelosip tan inmekal a too so isesebel?
3 Kabaliksan na saya a saray matoor a Kristiano so agmitotongtong nipaakar ed espiritual iran bengatla ed siopaman ya inekal ed kongregasyon. Balet mas ni so nalalanor. Inkuan na Salitay Dios a sikatayoy nepeg ya ‘agmiulop a mangan ed satan a too.’ (1 Cor. 5:11) Kanian, papaliisan tayo met so sosyal a pituyaw ed too ya inekal. Kabiangan ed saya so agpiulop ed sikato ed piknik, party, panggalaw na bola, odino iyakar ed mall odino sinean odino pangan a kaiba balanglan diad abung odino diad restawran.
4 Komusta so pitongtong ed toon adispelosip? Anggaman ag-ibibinsabinsa na Biblia so amin a posiblin kipapasen, say 2 Juan 10 so ontulong ed sikatayon naamtaan so panmoria nen Jehova ed saray pamaakaran: “No wala so onsabi ed sikayo, et agto tarok so sayan bangat, agyo aakoen ed abung yo tan agyo ikday pabano.” Nipaakar ed saya, oniay inkomento na Say Panag-Bantayan ed Abril 1, 1982, pahina 11 (Setyembre 15, 1981, pahina 25 na Watchtower): ‘Say simplin “Hello” so sakey lan manunan kundang a mansumpal ed pakapitongtong tan ompan anggan magmamaliw ni a mankaaro. Labay tayo kasin gawaen itan a manunan kundang ed sakey ya adispelosip?’
5. Sanen adispelosip, anto so abalang na sakey a too?
5 Peteg, unong ya ibabaga na pahina 16 (pahina 31 na Watchtower) na satan lanlamang ya isyu na Say Panag-Bantayan: ‘Say katuaan to et sanen inabuloyan na sakey a Kristiano so inkasikato a mankasalanan tan kaukolan a nadispelosip, naandi ed sikato so dakel a bengatla: say naabobonan a talindeg to ed Dios; . . . say magayagan pitutuyaw ed saray agagi, pati say maslak a pililimog to ed kakanayon to a Kristiano.’
6. Kasin kakaukolanen ed sakey a Kristiano so pangitunda ed amin a pililimog ed sakey a kaamong a kanayon ya adispelosip? Ipaliwawa.
6 Diad Sankaabungan: Kasin kabaliksan na saya a saray Kristianon kaamong na adispelosip a membro na pamilya so ompaliis la ed pitongtong, pikan, pilimog ed sikato legan dan gagawaen so inagew-agew iran kimey da? Oniay inkuan na The Watchtower ed Abril 15, 1991, diad paimano’d leksab ed pahina 22: “No walay adispelosip diad sankaabungan na sakey a Kristiano, sikatoy kabiangan nin siansia ed normal, inagew-agew iran kurang tan kimey ed abung.” Kanian, wala la’d saray membro na pamilya so pandesisyon ed laknab na pangibiang ed adispelosip a membro na pamilya diad panangan odino diad pankimey ed abung. Balet, agda labay ya ipatnag ed saray agagi a pitutuyawan da ya amin a bengatla et singa dati antis ya agawa so impakadispelosip.
7. Panon a manguman so espiritual a pantutuyaw diad loob na ayaman sano say sakey a membro na pamilya so adispelosip?
7 Anggaman ontan, oniay ipapabitar na Say Panag-Bantayan ed Abril 1, 1982, pahina 14 (Setyembre 15, 1981, p. 28 na Watchtower) nipaakar ed toon adispelosip odino inmekal: ‘Say datin espiritual iran pisisiglaotan so sigpot lan apultot. Tua iya anggano nipaakar ed saray kanayon to, pati saramay kabiangan na sankaabungan to. . . . Saya so mankabaliksan na pananguman ed espiritual a pitutuyaw a datin nagagawa diad abung. Alimbawa, no adispelosip so asawan laki, say akulaw to tan saray anak to so agkomportablin sikato so mangikondukta ed panagaral na pamilya ed Biblia odino mangidaulo na panagbasa na Biblia tan panagpikasi. No kaliktan to so manpikasi, a singa diad panangan, kanepegan to so panggawa ed satan diad mismon abung to. Balet sarag day andi-esel a mangibesngaw na saray pikakasi ran dili ed Dios. (Uli. 28:9; Sal. 119:145, 146) Panon to no kaliktan na kaamong ya adispelosip so presente met sano basaen na pamilya a mankakaiba so Biblia odino manaaral na Biblia? Nayarin abuloyan na arum a sikato so presente ya ondengel no agto salien ya ibangat odino inabang iray relihyoson ideya to.’
8. Anto so responsabilidad na Kristianon atateng ed menor-de-edad ya anak ya adispelosip a walad pudir da?
8 No say wala’d pudir a menor-de-edad ya anak et adispelosip, saray Kristianon atateng so responsable nin siansia ed pamabaleg ed sikato. Inkuan na The Watchtower na Nobyembre 15, 1988, pahina 20: “No panon a sikatoy itutultuloy dan tataryaan na tagano, kawesen, tan panayaman, kaukolan a sikatoy bilinen tan disiplinaen da unong ed Salita na Dios. (Uliran 6:20-22; 29:17) Kanian saray maaron atateng so mangiyareglo na sakey a panagaral na Biblia ed sikato, anggaman sikatoy adispelosip. Nayarin sikatoy nawalaan na makagunggonan panangipetek diad pangiyaral da ed sikato a bukor. Odino nayarin desidien dan sikatoy mibiang ed uksoyan na pamilya a panagaral.”—Nengnengen so Say Panag-Bantayan na Oktubre 1, 2001, pahina 16-17.
9. Diad anton laknab so piarap na sakey a Kristiano ed sakey a kanayon ya adispelosip ya agkaamong?
9 Kakanayon ya Agkaamong: “Say kipapasen so duma no say adispelosip odino inmekal et sakey a kanayon ya agkaamong na sankaabungan” so inkuan na The Watchtower na Abril 15, 1988, pahina 28. “Nayarin posibli so ngalngalin agla pakapinengnengan ed satan a kanayon. Anggaman walaray bengatlan pampamilya a mankakaukolan na piarap, peteg a saya so napansiasiansia a limitado,” unong a mitunosan ed ganggan na Dios ya ‘agmiulop ed siopaman’ a nankasalanan ya agmagbabawi. (1 Cor. 5:11) Saray matoor a Kristiano so nepeg a manggunaet ya ompaliis ed agnakaukolan a pililimog ed satan a kanayon, anggan say pamasiansia ed pinenegosyo et limitado.—Nengnengen met so Say Panag-Bantayan ed Abril 1, 1982, pahina 15-16 (Setyembre 15, 1981, pahina 29-30 na Watchtower).
10, 11. Anto so ikonsidera na sakey a Kristiano antis ya abuloyan so sakey ya adispelosip a kanayon a manayam ed abung to?
10 Ipapaimano na Say Panag-Bantayan so sananey nin kipapasen a nayarin onlesa: “Panon to no say maapit a kanayon, a singa say anak odino ateng ya agkaamong, so adispelosip tan diad saginonor et kaliktan to lay miayam ditan? Say pamilya so makapandesisyon no anto so gawaen depende ed kipapasen. Alimbawa, nayarin mansasakit so adispelosip ya ateng odino agto la sarag a legpeten so inkasikato ed pinansyal tan pisikal. Saray Kristianon anak so walaan na Makasulatan tan moral ya obligasyon ya ontulong. (1 Tim. 5:8) . . . Say ginawa so nayarin mandepende ed saray sengegan a singa say peteg iran pankaukolan na ateng, say walna to tan say kapagaan na ulo na pamilya ed espiritual a pankaabigan na sankaabungan.”—Say Panag-Bantayan ed Abril 1, 1982, pahina 15 (Setyembre 15, 1981, pahina 28-9 na Watchtower).
11 No nipaakar ed anak, intuloy na satan nin artikulo: “No maminsan et aabuloyan na Kristianon atateng a miayam ed abung diad loob na pigaran panaon so anak ya adispelosip a mansasakit ed pisikal odino ed emosyonal. Balet diad balang kaso saray ateng so manetermina ed indibidual iran sirkumstansya. Kasin say adispelosip ya anak so independente la, tan natan et agto la sarag a gawaen itan? Odino kasin labay toy ompawil manuna et pian nawalaan na mas mainawa a bilay? Komusta iray moral tan walna to? Kasin sikatoy mangitarok na “lebadura” diad abung?—Gal. 5:9.”
12. Antoray pigaran gunggona ed uksoyan a panagdispelosip?
12 Saray Gunggona ed Pagmaliw a Matoor ed si Jehova: Say pikokoopera ed Makasulatan ya uksoyan a panagdispelosip tan iyarawi ed saray agmagbabawin managkasalanan so makagunggona. Pansiansiaen na satan so kalinisan na kongregasyon tan mangipapabidbir a sikatayo so manangitandoro ed saray atagey ya estandarte na Biblia ed moral. (1 Ped. 1:14-16) Salimbengan itayo na satan manlapud makaderal iran impluensya. (Gal. 5:7-9) Mangiiter met itan na pankanawnawa parad managkasalanan pian sigpot a nagunggonaan ed naawat a disiplina, ya ontulong ed sikato a mamawala na “bunga a mareen [salanti,] katunongan.”—Heb. 12:11.
13. Anto so ginawan pananguman na sakey a pamilya, tan antoy resulta?
13 Kayarin nadngel na sakey ya agin laki tan say agi ton bii so paliwawa diad sakey a sirkiton asamblea, amoria dan nakaukolan da so manguman diad pidedeneng da ed ina ra, a manaayam ed sananey a pasen tan adispelosip ed loob la na anem taon. Tampol kayari na asamblea, tinawagan na laki so ina to, tan kayarin pinaseguroan a sikato so inaro da, impaliwawa to ya agla ra makapitongtong ed sikato likud labat no walaray importantin bengatla a kapilitan so pitongtong. Ag-abayag kayari na satan, ginmapon inmatendi so ina to ed saray miting tan diad kaunoran et akapawil. Ontan met, say agmananisian asawa ton laki so ginmapon nanaral tan asabi panaon et abautismoan.
14. Akin a nepeg tayon sitotoor a suportaan so uksoyan a panagdispelosip?
14 Say sitotoor a pangitandoro ed uksoyan a panagdispelosip a nidatak ed Kasulatan so mangipapatnag na panangaro tayo ed si Jehova tan mangiter na ebat ed samay mamabalaw ed Sikato. (Uli. 27:11) Diad ontan, napaseguroan itayo na panamendisyon nen Jehova. Oniay insulat nen Arin David nipaakar ed si Jehova: “No nipaakar ed saray panontonan to, agak onkasipa ed saratan. Dia ed matoor et onkiwas ka ed katooran.”—2 Sam. 22:23, 26, NW.