No Anto so Ibaga Nipaakar ed Saray Magasin

Say Panag-bantayan Ago. 15

“Diad padesir yo anto kasi so sankatagyan a nengneng na katooran? [Abuloyan ya onebat.] Idadanet na sayan artikulo so katooran ed tuan Dios. [Ipaimano so pahina 5, tan basaen so 2 Samuel 22:26.] Kasin amta yo a say katooran ed Dios so makapangamper ed totoo ya onkiwas ya andiay panangaro ed arum? Amtak a panggayagaan yon basaen so nipaakar ed saya.”

Awake! Ago. 22

“Kasin panaaburidoan yo a say problema na katooan ed polusyon et agla nakontrol? [Abuloyan ya onebat.] Say sakey a manunan sengegan na problema et say inkamadarak. Imbangat nen Jesus iray patumbok to ya agmandadarak. [Basaen so Juan 6:12.] Ipapanengneng na sayan magasin no panon a say panumbok ed saray prinsipyo na Biblia so makatulong ed saray pamilya a napaliisan so panagdarak.”

Say Panag-bantayan Set. 1

“Kasin naimano yo a diad dakel a pasen et agla sankakabat iray mankakaabay ed ayaman ya aliwan singa dati? [Abuloyan ya onebat.] Insalaysay nen Jesus so sakey a prinsipyo a makana ed pagmaliw a maong a kaabay. [Basaen so Mateo 7:12.] Sarayan artikulo so mangipapanengneng no panon itayon magmaliw a maong a kakaabay tan mamapaseseg ed arum a magmaliw met ya ontan.”

Awake! Set. 8

“Parad dakel natan, say bilay so napno na ag-inkaseguro. [Basaen so Eclesiastes 9:11.] Iner kasi pakaromogan na napanmatalkan a giya? [Abuloyan ya onebat.] Saray arum so ontutupleg ed numerology. Kasin saya so paraan pian naamtaan so pansumpalan mo? Iner so pakaromogan mo na napanmatalkan ya impormasyon nipaakar ed arapen? Say Awake! so mangiiter na saray ebat.”