Onaaligwas so Programa ed Panagpaalagey na Kingdom Hall
1 Nen 1983 et inyanunsio diad “Kingdom Unity” a Distrito Iran Kombension ed Estados Unidos, ya iletneg so sakey ya espisyal a pundo pian suportaan so panagpaalagey tan pamasimbalo ed saray Kingdom Hall diad interon Estados Unidos tan Canada. Agtayo amoria no antoray bendisyon a resulta na saratan a melag a gapoan. Nagkalalo lan naeeksperiensia tayo so matukotukoy ya ibabaga na Salmo 92:4: “Ta sika, Jehova, pinaliket moak ed panamegley na kimey mo: dia ed saray gawagawa na limalimam so panaloan ko.”
2 Panggagayagaan tayon maong natan so nagagawaan. Natan say ompepeles a programa na panagpaalagey na Kingdom Hall so nagagawa la. Diad nanduruman paraan, amin tayo so walaan na pribilehyon mibiang ed sayan kimey. Gagawaen tayo iya diad pandodonasyon na baleg man odino melag a kantidad pian ontulong ed gastos ed panagpaalagey na dakel nin panagdayewan a pasen diad interon mundo. Dakel ya agagi so namboluntaryo met a mangusar ed kagawaan da ontan met ed saray panaon, abilidad, tan dunong da parad saratan a proyekto. Say itatalona na intiramintin uksoyan et lapud panangigiya, suporta, tan daakan a panamendisyon nen Jehova ed nankakasakey a sagpot tayo.—Salmo 127:1.
3 Dakel a sanga so angalig ed sayan inmunan inorganisa parad saray kongregasyon ed Estados Unidos. Diad saray Kingdom Hall ed dakel a bansa, walay kahon a pangipepelagan na saray manangipalapag na saray kontribusyon da parad Kingdom Hall Fund. Diad edisyon a parad Estados Unidos a Ministeryo Tayo ed Panarian ed Marso 1997 et inyanunsio so pananguman ed sayan programa. Oniay inkuan na satan: “Manlapu la nen niletneg so Society Kingdom Hall Fund nen 1983, saray agagi so mabunbunlok a nankontribusyon, diad ontan et nagmaliw a posibli so pan-loan parad panagpaalagey ed Kingdom Hall. Wala lay manga 2,700 a kongregasyon diad sayan bansa ya agunggonaan ed sayan uksoyan. No aliwan lapud saya et agkomon akapangipaalagey na balo iran Kingdom Hall odino akapangapiger ed saramay kaukolan a pasimbaloen. Natan et walay maganat a pankaukolan ya usaren so arum ed sarayan kontribusyon a pundo pian ipabayes ed saray kongregasyon diad saray bansan maniirap ed pinansyal. Say mantultuloy a suporta yo ed sayan uksoyan so aapresyaen a maong na Sosyedad tan saramay kongregasyon a nagugunggonaan ed saray kontribusyon yo.”
4 Satan ya anunsio so kinmanan imbitasyon pian mibiang ed pinapeles a programa ed panagpaalagey na Kingdom Hall. Say Kingdom Hall Fund so palaknaben pian napisakop iray pankaukolan na agagi tayo ed arum a bansa. Say sinmublay ya artikulo ed Agosto 1997 ya isyu ed Estados Unidos ya edisyon na Ministeryo Tayo ed Panarian so angikuan: “Wala so tuloytuloy a pankaukolan parad panagpaalagey na Kingdom Hall diad sankamundoan. Nen imbeneg labat a serbisyon taon et walay 3,288 a balon kongregasyon ya aporma. Maslak ed sarayan kongregasyon et diad Aprika, Asia, Sentral tan Abalaten Amerika, tan Mamabukig a Europa.”
5 Antoray resulta nanlapu la’d saman? Oniay inreport na 2001 Yearbook: “Lapud sayan uksoyan, diad 30 a bansa, 453 lan Kingdom Hall so asumpal, tan 727 a kaaruman a bilding so peles ya ipapaalagey. Iimanoen a maong so pamaaligwas ed saray panumbokan a plano ed Kingdom Hall parad kada bansa a manguusar na lokal iran materyales tan metodo parad panagpaalagey. Diad Kenya, saray tinebag a bato so uusaren; diad Togo kaslakan la so panguusar na laryo; diad Cameroon saray konkreton bloke a papalitadaan ed saginonor so kaslakan. Diad onian paraan, saray agagi ed lokal so maples a makakagamor na saray dunong a nakaukolan pian nausar ed programa ed interon bansa.”
6 Nanengneng so paneknek ed saray panamendisyon nen Jehova ed sayan programa diad maawang a kontinente na Aprika. Legan mon nenengnengen iray retrato na pigaran Kingdom Hall a nipaalagey, isipen pa so baleg ya epekto na saratan ya impaalagey diad kimey na saray Tastasi nen Jehova! Tua itan ed taloran nanduruman pamaakaran—say pankakasakey na sankamundoan ya impanaagi tayo, say epekto ed lokal a komunidad, tan say idarakel na onaatendi ed saray miting ed kongregasyon. Anggaman ipapabitar na sayan insert iray Kingdom Hall ya impaalagey ed Aprika, saray edisyon ed arapen a Ministeryo Tayo ed Panarian so mangimano ed no panon ya onaaligwas so programa na panagpaalagey na Kingdom Hall diad arum a rehyon na mundo.
[Saray litrato ed pahina 3]
CENTRAL AFRICAN REPUBLIC
Bimbo, Bangui
Begoua, Bangui
[Saray litrato ed pahina 4]
Ukonga, Tanzania
[Litrato ed pahina 4]
Accra, Ghana
[Litrato ed pahina 4]
Salala, Liberia
[Litrato ed pahina 4]
Karoi, Zimbabwe
[Saray litrato ed pahina 4, 5]
Allada, Benin—datin Kingdom Hall
Allada, Benin—balon Kingdom Hall
[Litrato ed pahina 5]
Kpeme, Togo
[Litrato ed pahina 5]
Sokodé, Togo
[Saray litrato ed pahina 4, 5]
Fidjrosse, Benin
[Litrato ed pahina 6]
Lyenga, Zambia—datin Kingdom Hall
[Litrato ed pahina 6]
Lyenga, Zambia—balon Kingdom Hall
[Litrato ed pahina 6]
Kinshasa, Congo
[Litrato ed pahina 6]
Musambira, Rwanda