Nodnonoten Iramay Matoor a Maedad La
1 Anggaman balo tan akulaw la, say 84-años a si Ana so “agbalot onliliwat diad templo.” Sikatoy inikdan nen Jehova na nikabkabiig a tumang lapud inkamatoor to. (Luc. 2:36-38, NW) Natan et ipapatnag met na dakel ya agagin lalaki tan bibii so awawey a singa ed si Ana anggaman nidudunget ira ed mairap iran kipapasen. No maminsan et nadidismaya iratan a matoor a sinansakey sano kaukolan day mipuligesgesan ed saray beblay na laman odino saray limitasyon lapud itatakken. Konsideraen tayo pa so pigaran praktikal a paraan a nayarin napaseseg tan natulongan tayo ira a mamasiansia ed maabig ya espiritual a rotina.
2 Saray Miting tan Say Ministeryo: Sano maaron itatarya na arum so transportasyon, dakel a matoor a maedad la so mainomay a makaatendin regular diad saray Makristianon miting. Lapud saya et napabiskeg irayan matoor tan abayag lan lingkor diad espiritual a paraan tan nagunggonaan met so kongregasyon. Kasin akapibiang kayo la ed sayan maabig a kimey?—Heb. 13:16.
3 Say regular a pibibiang diad ministeryo so makapagayaga tan makapnek ed saray tuan Kristiano. Balet, parad sakey a maedad tan maletey la et mairap lan nagawaan itan. Kasin nipila yo so sakey ed sarayan inararon agagi tayo bilang “kakimeyan” diad arum ya aspekto na panagpulong a kimey? (Roma 16:3, 9, 21) Nayarin sikatoy imbitaan yo a mibiang a manpulong panamegley na telepono odino itagar yo diad panagpawil odino pangiyaral na Biblia. No agla makaalis ed abung so sakey a maedad la, kasin nitagar yo ed abung to so iyaaralan yo na Biblia pian diman lay panaralan yo?
4 Panagaral tan Panlilimog: Sagpaminsan et iimbitaan na arum so sakey a maedad la odino maletey la ya onatendi ed panagaral na pamilya ra, a diad abung to ni ingen so panaaralan da. Sakey ya ina so angawit ed duaran ugaw nin ananak to diad abung na sakey ya agin akulaw la pian manaral ira na My Book of Bible Stories, tan apaseseg iran amin ed impanlilimog da. Panliketan met na saratan ya indibidual no sikaray naimbitaan diad sakey a panangan odino arum nin okasyon. No agla sarag na saratan a maedad la so mabayag ya ibisita, nayarin tawagan ira ed telepono odino samaren iran magano pian ibasaan ira, manpikasi a kaiba ra, odino manginabang na makapabiskeg ya eksperiensya.—Roma 1:11, 12.
5 Papablien nen Jehova iratan a matoor a maedad la. (Heb. 6:10, 11) Sikatoy naalig tayo diad pangibalikas na panamabli tayo ed sikara tan diad panulong ed sikara a mamasiansia ed maabig ya espiritual a rotina.