Tepet

◼ Kapigan so matukoy a pamorma na grupo na sankailin-lenguahe?

Sano dakel so manaayam a totoon mansasalitay sankailin lenguahe diad teritorya na kongregasyon, kaukolan a panggunaetan na saray mamatatken so pangorganisa na panagpulong a kimey pian tulongan iramay manguusar ed satan a lenguahe. (km 7/02 p. 1; km 2/98 p. 3-4) Nayarin saratan a totoon manguusar na sankailin lenguahe so nitaytayak ed saray teritorya na duara odino onsulok nin kongregasyon a sanaabay. No ontan so kipapasen, (say/saray) manangasikaso na sirkito so mangiter na nakaukolan a panangiwanwan pian natulongan iray nalalanor a kongregasyon a mikoopera ed panagpulong a kimey. Panapanaon et nayarin iyarunsa so publikon paliwawa tan Panagaral ed Panag-Bantayan pian naamtaan no pigara so onatendi ed saray miting diad sankailin lenguahe.

Naporma so sakey a grupo na sankailin-lenguahe sano akapet la iray onggendan a kakaukolanen: (1) Walaray manangipalapag odino interesadon totoo a mas natalosan day maong a balita diad sankailin-lenguahe. (2) Wala so kualipikadon matatken odino ministeryal a lingkor a makapangidaulo tan makapangikondukta na anggan sakey a sinimban miting. (3) Say ulop na mamatatken so mabulos a manuporta ed grupo. Sano akapet la irayan kakaukolanen, saray mamatatken so kaukolan a mangipaamta diad sangan opisina pian pormal a nabidbiran so grupo tan niiter iray kaaruman ya instruksion.

Maslak a grupo so onggagapo diad sinimban Panagaral na Kongregasyon ed Libro. Diad saginonor et nayarin abobonan na saray mamatatken ya iyarunsa so arum niran miting, a singa say Public Meeting tan Panagaral ed Panag-Bantayan. Saray asainmin Nu. 2, 3, tan 4 diad Teokratikon Eskuelaan Parad Ministeryo so nayarin iparungtal diad biig a kuarton-panaralan no say kualipikadon matatken odino ministeryal a lingkor a makasalita ed lenguahe so makapanserbi bilang managkonseho. Balet, say grupo so mibiang ed kongregasyon parad instruksion a paliwawa, saray pabitar ed Biblia, tan Service Meeting. Nayarin iyarunsa met parad grupo iray pantitipon parad lawak a kimeyan.

Amin ed grupo so maapit a mikimeyan diad panangasikaso na ulop na mamatatken. Saray mamatatken so kaukolan a mangiter na asimbang a panangiwanwan tan mangipatnag na aralem ya interes a mangasikaso ed saray pankaukolan na grupo. Sano bisitaen na manangasikaso na sirkito so manusuportan kongregasyon, iyarunsa to met so pikimey ed grupo ta pian napabiskeg so espiritualidad da. Diad panamendisyon nen Jehova, nasabi panaon et magmaliw a kongregasyon so grupo na sankailin-lenguahe.