Si Jehova so Nagkalautlan Idaydayew
Selebraan so Pangdem na Katawan no Abril 16
1 Pitalaran tayo la so Abril 16, 2003. Diad satan a labi et nodnonoten tayo so impatey nen Jesus, a kaiba so minilyon a kaparan managdayew ed sankamundoan diad pangigloria ed ngaran nen Jehova. Si Jehova lambengat so manepeg ya idayew tayo lapud alay abig ya impangitarya to na dondon. Diad panamegley na satan et sikatoy mangipalabo na makapakelkelaw iran bendisyon ed amin a matulok a katooan. Sikatayoy sigpot-puson mibiang ed salmista diad pangikelyaw na: “Abalbaleg si Jehova, tan sankabalgan a dayewen.”—Sal. 145:3.
2 Saya so panaon pian dalepdepen tayo so kamaongan nen Jehova tan say otang na linawa tayo ed sikato lapud impangibaki to na ‘bogbogtong ya Anak to diad mundo pian manbilay tayo ed panamegley to.’ (1 Juan 4:9, 10) Diad matulok a panselebra tayo ed Pangdem na Katawan, nipasepsep ed kapusoan tayo a “si Jehova [et] maong a linawa tan mapangasi . . . tan baleg ed abig na linawa.” (Sal. 145:8) On, say dondon so sankabalgan a panangipatnag na aro nen Jehova ed sankatooan. (Juan 3:16) Sano molimolien tayo so aro na Dios tan say matoor a kurang nen Jesus, napakiwas itayon mangidayew ed si Jehova. Sikatoy magnayon ya idayew tayo lapud impangipatnag to na ag-alimitaan a panangaro pian makapambilay itayo ya andi-anggaan.—Sal. 145:1, 2.
3 Tulongan so Arum a Mangidayew ed si Jehova: Say panamabli tayo ed agnaparaan a regalo na Dios a dondon so mamakiwas ed sikatayon imbitaan so arum a miulop ed sikatayon mangidayew ed si Jehova. Apuyanan so salmista a mangisulat: “Sikara ibawag da a mapalalo so pakanodnonotan ed abalbaleg a kaabigan mo, tan mangikanta ra na inkatunong mo.” (Sal. 145:7) Nen katantaon lambengat, saray Tasi nen Jehova ed sankamundoan so angusar na masulok a sakey bilyon ya oras diad kimey a panagpulong. Antoy resulta na saray sagpot da? Kada simba et wala so promedyo na masulok a 5,100 ya indibidual ya abautismoan bilang simbolo na dedikasyon da ed si Jehova. Diad dagup a 15,597,746 ya inmatendi ed Memoryal, a kabiangan so masulok a 9 milyon ya agni mangidadayew ed si Jehova bilang manangipalapag na maong a balita, walay baleg a posibilidad a naaruman ni! Bilang manangiyabawag na Panarian, papablien tayo so pribilehyo tayon mangipakabat ed maong a balita tan mangipaarap ed kapusoan na arum ed si Jehova, ed Anak to, tan ed Panarian to.
4 Say maabig a paraan pian napaseseg tayo so arum a mangigalang ed si Jehova et diad pangimbita ed sikaran miulop ed sikatayo diad panselebra ed Pangdem na Katawan. Kasin inlista yo la so amin a labay yon imbitaan ontan met ed arum a nakaukolan a panonotan nipaakar ed agew tan oras? Kasin naimbitaan yo la so amin a walad listaan yo? No andi ni, seetan yon imbitaan ira legan na nakekeraan a panaon. Tulongan iran natebek da so gagala na selebrasyon. Legan na satan, sikayoy aliston mangibano ed saray bisita. Abrasaen ira, ipakabat ira ed arum, tan komendaan ira ed inyatendi ra.
5 Say iyatendi ed Memoryal so nayarin managyat ed saray balo ni pian onaligwas so espiritualidad da. Sakey ya iyaaralan na Biblia a walay sakit ton post-traumatic stress, a naiirapan a midumog ed totoo, so inmatendi ed Memoryal. Sanen sikatoy tinepetan no antoy impangipasen to ed miting, oniay inkuanto: “Masansanto iman a labi, kanian wadman ak.” Nanlapula’d saman et sikatoy inmatendi ed saray miting.
6 Kayari Memoryal: Antoy nagawaan tayo pian tulongan irayan interesado a magmaliw a managdayew ed si Jehova? Saray mamatatken so mangimano ed saray balon inmatendi ed Memoryal tan mangiasain na saray kualipikadon manangipalapag ya ondalaw ed sikara kayarin tuloy na Memoryal pian repasoen iray makarepreskon bengatla a naaralan tan naimatonan da. Arum so nayarin malabay a paiyaralan na Biblia. Kaukolan ya imbitaan met iran onatendi ed amin a sinimban miting na kongregasyon, lapud say regular ya iyaatendi so makapangarum na pikakabat da ed Biblia.
7 Walaray gagawaen lan uksoyan pian pasesegen so amin ya iregular tan inaktibo ya onatendin regular ed saray miting. No sikay pinabtangan na saray mamatatken a mangasisti ed sakey lan inaktibo pian mibiang lamet diad lawak na kimeyan, mabulos kan onkiwas. Say pangipanengneng na ontan a maaron panagpaga ed saray agagi tayo et mitunosan ed bilin nen apostol Pablo: “Unong a wala so kiambegya manggawa itayo na maabig ed saray amin, nagkalalo ed saray kaamong na pananisia.”—Gal. 6:10.
8 Amin tayo komon so nagkalautlan mansagpot pian makaatendi ed Memoryal no Abril 16. Agtayo labay a nasaew iyan sankasagradoan ya okasyon pian idayew si Jehova. On, natan tan ed ando lan ando, idayew tayo si Jehova lapud alay abig iran gawa to!—Sal. 145:21.