No Panon a say Katuaan so Mangibulos ed Sikatayo

¹ Diad sakey ya inkagawa, oniay inkuan nen Jesus ed saray Judio ya anisia ed sikato: “Nakabatan yo so katuaan, et say katuaan sikayo so gawaen to a bulos.” (Juan 8:32) Tutukoyen to so kawayangan a nagkalalo nen say basta kawayangan a para ed mibabaley, say kawayangan a para ed amin​—mayaman odino mairap-bilay, de-aral odino andiay aral. Imbangat nen Jesus so katuaan a mangibulos ed sikatayo manlapud panangaripen na kasalanan tan patey. Unong ya impaliwawa nen Jesus, “balang sakey a manggawa na kasalanan sikato so aripen na kasalanan.” (Juan 8:34) Agaylan pampirawatan tayo so panaon sano amin a matulok a katooan et ‘nibulos la ed panangaripen na kabulokan ya onloob ed kawayangan na gloria na saray anak na Dios’!​—Roma 8:21.

² Say katuaan nipaakar ed si Jesus tan ed say betang to ed pakasumpal na gagala na Dios so panlapuan na satan a kawayangan. Laktipen na satan so pikakabat nipaakar ed dondon bagat ya inter to nisesengeg ed sikatayo. (Roma 3:24) Natan ni labat et napanggayagaan tayo la so kibulos manlapud takot, gonigon, tan amin a nengneng na makaderal ya agagamil no sikatayoy mangawat tan matulok a manpasakop ed katuaan ed Biblia.

³ Kibulos Manlapud Takot tan Gonigon: Nepeg ya ag-itayo naekalan na ilalo ed saray kipapasen ed mundo lapud natatalosan tayo no akin a nagagawa so karelmengan tan amta tayo ya agmanbayag et naandi la iratan diad dalin. (Sal. 37:10, 11; 2 Tim. 3:1; Apoc. 12:12) Niarum ni, say katuaan so mangibulos ed sikatayo ed palson bangabangat nipaakar ed kipapasen na inaatey. Amta tayon ag-itayo napasakitan na inaatey, tan ag-ira manasagmak na magnayon a panamairap, tan ag-aalaen na Dios so totoo diad patey pian nakaiba lambengat ira diad espiritun ayaman.​—Ecl. 9:5; Gawa 24:15.

⁴ Satan a katuaan so amabiskeg ed sakey ya ama tan ina sanen inatey so anak dan laki ed aksidente. “Wala so kulang ed bilay mi ya ag-itan napanoan anggad nanengneng mi lamet so anak mi ya onoli ed bilay,” so kuan na ina. “Balet amta mi a temporaryo lambengat so panermen mi.”

⁵ Kibulos Manlapud Makaderal ya Agagamil: Nayarian na katuaan ed Biblia ya umanen so panagnonot tan personalidad na sakey a too, a manresulta ed kibulos to manlapud agnapaliisan iran problema. (Efe. 4:20-24) Say pagmaliw a matua tan makuli so ontulong pian napaliisan so inkaduka. (Uli. 13:4) Say pangipatnag na dilin-panagsakripisyon aro so mamaaligwas ed pisisiglaotan tayo ed arum. (Col. 3:13, 14) Say panrespeto ed inkaulo na sakey a Kristiano so mamaraiset ed saray problema na pamilya. (Efe. 5:33–6:1) Say ipaliis ed panagbuanges, seksual ya imoralidad, panagsigarilyo, tan makaadik iran druga so makapaabig ed bunigas.​—Uli. 7:21-23; 23:29, 30; 2 Cor. 7:1.

⁶ Sakey a kalangweran a laki a mair-irap ton naekal so siamiran taon lan inkaadik ed druga. Sakey ya agew et nabet to so sakey a Tasi a manpupulong diad karsada. Inawat to so literatura, tan niyuksoy so idalaw ed ayaman to. Nigapo so panangiyaral na Biblia. Kalabas na duay bulan et sigpot lan intunda na laki so panagdruga, tan kayari waloy bulan ya impanaral to, sikatoy abautismoan. Sanen naimano nen kuya tan ayro to a sikatoy aliwa lan adik, apakiwas iran manaral met ed Biblia.

⁷ Tulongan so Arum a Nibulos: Saraman so naaripen ed palson bangabangat legay bilay da so nayarin naiirapan a mantalos ed kawayangan ya iyoopresi na Salitay Dios. Say panabi ed kapusoan da so nayarin mankaukolay nikaduman inkaseet tan maabig a panagparaan diad biang na managbangat. (2 Tim. 4:2, 5) Aliwa lan natan so panaon pian ontantan itayo ed kimey a ‘pangiyabawag na kawayangan ed saraman so adakep.’ (Isa. 61:1) Mabmabli so kawayangan tayo bilang Kristiano. Say pakagamor ed satan et mankabaliksay bilay ya andi-anggaan.​—1 Tim. 4:16.