“Mangilugar ed Satan”
1 Aminsan, sanen mitotongtong ed saray babangatan to nipaakar ed panangasawa, tinukoy nen Jesus so pagmaliw a walad kasuloan bilang ‘sakey a regalo.’ Insan to inkuan: “Say makapangilugar parad satan so mangilugar ed satan.” (Mat. 19:10-12, NW) Pigaran taon ed saginonor, insulat nen apostol Pablo iray gunggona na pansiansian walad kasuloan tan pinaseseg toy arum ya aligen da so alimbawa to diad pansiansian andiay asawa. (1 Cor. 7:7, 38) Dakel natan so ‘angilugar’ ed pansiansian walad kasuloan tan pakagugunggonaan da iray bentaha na satan. Antoray pigaran bentaha?
2 Panlingkor ya “Anggapoy Makagirogiro”: Atalosan nen Pablo a lapud pansiasiansia ton walad kasuloan et sikatoy walaan na pankanawnawan manlingkor ed si Jehova “ya anggapoy makagirogiro.” Ontan met natan, say walad kasuloan ya agin laki so mankapan-aplay parad Ministerial Training School, tan say walad kasuloan so kaslakan lan mas mawayang a manpayunir, manaral na sananey a lenguahe, onalis ed lugar a babaleg so pankaukolan, manlingkor ed Bethel, odino pausar ed arum niran nikaduman pribilehyo ed panaglingkor. Nayarin malaglaem so panaon tan pankanawnawa to parad aralem a personal a panagaral tan panagdalepdep tan pitongtong ed si Jehova diad impapuson panagpikasi. Say andiay asawan too so kaslakan lan malaglaem so panaon ton ontulong ed arum. Amin itan ya aktibidad so parad ‘pankaabigan ton dili.’—1 Cor. 7:32-35, NW; Gawa 20:35.
3 Say ontan ya agnagirogiron serbisyo ed Dios so panlalapuay daakan a tumang. Kayari na 27 taon ed Kenya, oniay insulat na sakey a walad kasuloan ya agin bii: “Dakdakel iray kakaarok tan amayamay so trabaho! Nankimey kamin saniiba [tan] nambibisitaan kami. . . . Lapud wala ak ed kasuloan, nausar ko so malaglaem a kawayangan a makaonla ed inerman a pasen pian magmaliw ya okupado ed ministeryo, tan saya so panlalapuay baleg a liket ko.” Intuloy to ni: “Diad ilalabas na saray taon et napapaaralem so relasyon ko ed si Jehova.”
4 Ilugaran Itan: Inkuan nen Jesus a say motibo ed pamayubo ed langkap na pansiansian walad kasuloan so kaukolan a “nisengeg ed panarian na tawen.” (Mat. 19:12) Singa ed dinanman a regalo, nepeg a susto so pakausaran na kipapasen a walad kasuloan pian mamawala na gayaga tan saray gunggona. Diad panganamot ed saray pankanawnawan itatarok na pansiasiansian walad kasuloan tan diad panagmatalek ed si Jehova parad kakabatan tan biskeg, amoria na dakel a totoon andiay asawa so kablian na pangawat ed satan a langkap.