Tepetepet

◼ Sano manpupulong panamegley na telepono, kaukolan kasin ipaliwawa tayo so uksoyan parad panagdonasyon?

Sano manpupulong tayo ed kabkaabungan, nayarin ipaliwawa a say sankamundoan ya edukasyon ed Biblia a kimey na saray Tasi nen Jehova et sigpot a susuportaan panamegley na boluntaryo iran donasyon tan maliket itayon mangawat ed saratan a donasyon. Balet, agnepeg a salambiten iray donasyon odino uksoyan ed panagdonasyon sano manpupulong panamegley na telepono, ompan ipasen dan onkekerew itayo na tulong panamegley na telepono. Sigpot ya aliwan komersyo so ministeryo na saray Tasi nen Jehova.​—2 Cor. 2:17.

◼ Sano manpupulong panamegley na telepono, antoy gawaen tayo no imbaga na sakey a too ed saray Tasi nen Jehova ya agla ontatawag?

Nepeg a respetoen so panlabayan na too. Nepeg ya inota so petsa pati say ngaran na too diad “territory envelope” ta pian napaliisan na saray manangipalapag so ontawag ed satan a numero diad arapen. Maminsan ed sakey taon, kaukolan a repasoen so listaan na totoo ya angibagan agtayo tatawagan. Diad panangiderihe na manangasikaso na serbisyo, saray eksperiensyado tan mataktikan manangipalapag so nayarin pabtangan a mangomusta ed sarayan totoo pian determinaen no kasin labay da lay ondengel.​—Nengnengen so “Tepet” ed Hunyo 1994 a Ministeryo Tayo ed Panarian.

◼ Antoy ibaga tayo diad “answering machine”?

Ag-ileleksab so telepono. Imbes, mangiparaan na akasulat ya ibasa yo diad telepono. Nayarin ibaga yo: “Sayang ta agta kayo akatongtong. No labay yon narengel so nibase ed Biblia a paliwawa a [tema na publikon paliwawa], nayari kayon onatendi ed Kingdom Hall na saray Tasi nen Jehova. Imbitado so amin. Anggapo iray panagkolekta.” Insan malinew a salambiten so agew tan oras na miting, tan ibaga so lugar odino deskribien so kawalaan na Kingdom Hall.