Panangiyopresi na Literatura Diad Teritorya a Pigara so Lenguahe
1. Akin a dakel a kongregasyon so mankakaukolan na literatura ed sankailin lenguahe?
1 Diad dakel a pasen et kabiangan la ed teritorya tayo iray totoon nanlalapud arum a daldalin. Dakel ed sikara so mas maples a makaaral odino nawalaan na mas aralem a pakatalos sano bangatan ira diad dilin lenguahe ra. Antoray walan uksoyan pian nitarya ed saray interesado iray nibase ed Biblian publikasyon diad lenguahe a natalosan dan maong?
2. Anton pitutulongan so nakaukolan sano kikimeyan na duara odino onsulok nin kongregasyon a mansasalitay nanduruman lenguahe so parehon teritorya?
2 No Kapigan Iyopresi so Literatura: Sano kikimeyan na duara odino onsulok nin kongregasyon a mansasalitay nanduruman lenguahe so parehon teritorya, saray ulop na mamatatken a nalalanor so mitulongan ed saray manangasikaso na serbisyo diad pangiletneg na uksoyan ya abobonan na kada kongregasyon pian sigpot a napulongan so kada grupo na lenguahe. Sano manpupulong ed kabkaabungan, saray manangipalapag so kaslakan ya agmangiyoopresi na literatura diad lenguahe na arum a kongregasyon. Balet, sano manpulong ya impormal odino diad saray publikon lugar iray manangipalapag, nayarian day mangiyopresi na literatura diad saray lenguahen uusaren ed komunidad.
3. Kapigan mangisimpen so kongregasyon na suplay a literatura ed sankailin-lenguahe?
3 No Kapigan Mangisimpen na Suplay a Literatura: Antoy nayarin gawaen no medyo dakel so totoon mansasalitay sankailin-lenguahe diad sakey a lugar balet ta anggapo so kongregasyon a manguusar na satan a lenguahe? Diad saratan a kipapasen, saray kongregasyon so nayarin mangisimpen na daiset a suplay na saray manunan literatura a wala ed satan a lenguahe, singa say tracts, brosyur a Kakaukolanen tan Kaaro na Dios, tan libron Pikakabat. Saray manangipalapag so nayarin mangiyopresi ed sayan literatura kapiganman a naabet da iray totoon makabasa ed satan a lenguahe.
4. Panon a say kongregasyon so makala na literatura ed lenguahen anggapo ed suplay da?
4 Panag-order na Literatura: No andian na suplay a literatura so kongregasyon diad lenguahe a nabasa na interesado, panon so pakala na literatura ed satan a lenguahe? Kaukolan ya amtaen na manangipalapag ed mangaasikaso na literatura no dinan iran publikasyon so wala ed satan a lenguahe ta pian nilaktip iray nakaukolan a literatura diad ontumbok ya order na kongregasyon. No say order et Arabiko, Intsik, Hapon, Koreano, odino Español, nayarin pedidoen itan manlapud suplay tayo diad sangan Pilipinas. Balet parad arum a lenguahe kaukolan tayo ni man-order ed arum a sanga, a sabien to ni so pigaran bulan.
5. Anto so kalat tayo ed pamawala na saray Makristianon publikasyon?
5 Komon ta epektibo itayon mangusar ed saray Makristianon publikasyon pian natulongan so “amin a totoo,” antokaman so lenguahe ra, a ‘makagamor na suston pikakabat ed katuaan tan nilaban.’—1 Tim. 2:3, 4.