Say Kimey a Makapaligsa
1 Say mensahe na Biblia so makapaligsa ed amin a mangaawat tan mangiyaaplika ed satan diad kabibilay da. (Sal. 19:7, 8) Satan so mangibubulos ed sikara manlapud palson bangabangat tan makapuy ya agagamil tan mangiiter na napanmatalkan ya ilalo ed arapen. Balet, aliwan saraman labat so mangaawat ed maong a balita so nagugunggonaan. Saramay manginanabang ed makapaligsa iran katuaan ed Biblia ed arum so napapaligsa met.—Uli. 11:25.
2 Napapabiskeg Diad Ministeryo: Inkuan nen Jesus a saramay mangawat ed pako na pagmaliw a Kristianon babangatan, a mangilalaktip ed kimey a panagpulong tan panaggaway babangatan, so ‘makaromog na inawa ed saray kamarerwa ra.’ (Mat. 11:29) Alikna ton mismo a makapabiskeg so pampulong ed arum. Singa itan tagano parad sikato. (Juan 4:34) Sanen imbaki to so 70 a babangatan a manpulong, aliketan ira diad impakaimano ran susuportaan nen Jehova iray sagpot da.—Luc. 10:17.
3 Dakel a Kristiano natan so napapabiskeg met diad pibibiang da ed panagpulong a kimey. Oniay inkuan na sakey ya agin bii: “Say ministeryo so makapaligsa lapud mangiiter itan na direksion tan gagala ed bilay ko. Ag-ontatalona iray personal a problema tan inagew-agew a pakadedetdetan sano mibibiang ak diad serbisyo.” Oniay inkuan na sananey nin maseseg a ministro: “Say ministeryo . . . et pagmamaliwen ton petepeteg si Jehova ed siak ed inagew-agew tan mangiiter itan ed siak na deen tan akindalem a liket ya agnagamoran ed anggan dinan nin arum a paraan.” Agaylan pribilehyo tayo so pagmaliw a “kakimeyan na Dios”!—1 Cor. 3:9.
4 Anlemew so Pako nen Kristo: Bangta saray Kristiano so papasesegen a ‘pirmin isekar day inkasikara,’ agkekerewen nen Jesus so agtayo nayarian ya iter. (Luc. 13:24, NW) On, sikatoy maaron mangiimbita ed sikatayo a ‘misakbatan ed pako to.’ (Mat. 11:29, paimano’d leksab, NW) Saramay kapilitan a mipuligesgesan ed mairap iran kipapasen so makapanmatalek a say interon-kamarerwan serbisyo ra, anggaman limitado, so makapaliket a maong ed Dios.—Mar. 14:6-8; Col. 3:23.
5 Agaylan makapaligsa so panlingkor ed Dios a mamapabli ed antokaman a gagawaen tayo nisesengeg ed ngaran to! (Heb. 6:10) Komon ta lawas tayon pambanikelan ya iter ed sikato so anggaan na nayarian tayo.