Saray Distrito tan Internasyonal a Kombension so Anagyat ed Sikatayo Pian Igloria so Dios!
Say “Igloria so Dios” a Distrito tan Internasyonal iran Kombension so angiter na baleg a pantasi. Sarayan makatantanda a teokratikon okasyon so angitandoro ed ngaran nen Jehova tan amaaligwas ed abilidad tayon ‘mangigloria ed si Jehova a makana ed ngaran to.’ (Sal. 96:8) Peteg a sikatoy makanepegan a nigloria lapu ed makapakelkelaw iran panamalsa to, a pakapatnagan na matalonggaring iran kalidad to.—Job 37:14; Apoc. 4:11.
Diad pangusar ed onggendan iran tepet tan saray dilin nota yo, manparaan tan mibiang ed panrepaso ed programa na kombension a gawaen ed simba na Pebrero 23.
1. Panon a saray andian na bilay a pinalsa so mangiyaabawag ed gloria na Dios, tan panon a midumaan itan ed panangidayew ed sikato na totoo? (Sal. 19:1-3; “Iyaabawag na Saray Pinalsa so Gloria na Dios”)
2. Anto so peteg a nagagawa ed kaplesan ya iyaanino na transpigurasyon, tan panon a napapakiwas iray Kristiano natan ed sayan peteg a nagagawa? (Pinagkateman paliwawa, “Papakiwasen Itayo na Saray Magloria a Propetikon Pasingawey!”)
3. Panon tayon nabayuboan so kapaabebaan ya impatnag nen propeta Daniel, tan panon itayon nagunggonaan ed panggawa ed satan? (Dan. 9:2, 5; 10:11, 12; “Niparungtal so Gloria nen Jehova ed Saray Mapaabeba”)
4. (a) Anton taloran bengatla nipaakar ed panangukom na Dios so naaralan tayo ed propesiya nen Amos? (Amos 1:3, 11, 13; 9:2-4, 8, 14) (b) Anton praktikal a leksion so naaralan na saray Tasi nen Jehova natan ed manamasakbay ya alimbawa a naromog ed Amos 2:12? (“Say Propesiya nen Amos—Say Mensahe na Satan ed Panaon Tayo”)
5. (a) Antoray kapeligroan ed alablabas a panag-inum na alak, anggano agnabuanges so sakey a too? (b) Panon a nakorehi so problema ed alablabas a panag-inum na alak? (Mar. 9:43; Efe. 5:18; “Paliisan so Patit na Panag-abuso ed Alak”)
6. Panon kayon nagugunggonaan ed balon publikasyon a “See the Good Land”? (“‘Say Maong a Dalin’—Pagpauna na Paraiso”)
7. Diad anton taloran paraan a ‘nisindag tayo so gloria nen Jehova a singa saray salming’? (2 Cor. 3:18, NW; “Isindag so Gloria nen Jehova a Singa Saray Salming”)
8. Anto so lapuan na agmakatunongan a panggula, tan anto so makatulong ed sikatayo pian napansiansiay katooran tayo anggaman nasagmakan tayo so ontan a panggula? (Sal.109:1-3; “Ginula ya Anggapoy Makasengeg”)
9. Anto so singa-Kriston panmoria ed inkatalonggaring, tan panon a nadetermina na sakey a too a nakaukolan ton bayuboan a nagkalalo so ontan a panmoria? (Mat. 20:20-26; “Bayuboan so Singa-Kriston Panmoria ed Inkatalonggaring”)
10. Anto so makatulong pian mansiansia itayon mabiskeg ed espiritual anggaman nakekesawan ed pisikal? (“Naksawan ed Pisikal Balet ta Andi ed Espiritual”)
11. Sioparay uusaren nen Satanas pian niyalibansa so katilaan, tan anto so Makasulatan ya ikiwas ed saray manasalin maneral ed pananisia tayo? (Juan 10:15; “Manalwar ed ‘Boses na Saray Sankaili’”)
12. (a) Panon a naalig na atateng so alimbawa nen Jesus a nikurit ed Marcos 10:14, 16? (b) Anto so labalabay yo ed balon libron Manaral Manlapud Sankamaongan a Managbangat? (“Saray Ananak Tayo—Mablin Tawir”)
13. Panon a si Jehova so idadayew na saray kalangweran? (1 Tim. 4:12; “No Panon a Saray Kalangweran so Mangidadayew ed si Jehova”)
14. Antoran eksena ed draman “Makpel a Panagtasi Anggaman ed Isusumpa” so manunan nanonotan yo?
15. Panon tayon naalig so ehemplo (a) di Pedro tan Juan? (Gawa 4:10) (b) nen Esteban? (Gawa 7:2, 52, 53) (c) na Kristianon kongregasyon nen inmunan-siglo? (Gawa 9:31; drama tan say paliwawan “Iyabawag so Maong a Balita ya ‘Andi-Tunda’”)
16. (a) Diad antoran paraan a determinado itayon mangigloria ed Dios? (b) Anto so naseguro tayo legan tayon iyaaplika iray naaralan tayo diad “Igloria so Dios” iran Kombension? (Juan 15:9, 10, 16; “‘Mantultuloy a Manbunga na Dakel’ Diad Kigloriaan nen Jehova”)
Diad pandalepdep ed maabig ya espiritual ya instruksion a nipresenta diad kombension, sikatayoy napakiwas a mangiyaplika ed saray bengatlan naaralan tayo. (Fil. 4:8, 9) Saya so mamabiskeg ed determinasyon tayon “gawaen so amin a bengatla diad kigloriaan na Dios.”—1 Cor. 10:31, NW.