Tuan Pankakasakey na Saray Kristiano—Panon?
1 Anto so nayarin mamakasakey ed masulok ya anemiran milyon a totoo ed 234 a daldalin tan ngalngalin 380 a grupo na lenguahe? Say panagdayew lambengat ed si Jehova a Dios. (Miq. 2:12; 4:1-3) Amta na saray Tasi nen Jehova, unong ed personal ya eksperiensya ra, a peteg a wala natan so tuan pankakasakey na saray Kristiano. Bilang “saksakey a pulok” diad panangiwanwan na “saksakey a pastol” tayo, determinado itayon resistian iyan mangapag-apag ya espiritu na mundo.—Juan 10:16; Efe. 2:2.
2 Say ag-onsaew a gagala na Dios et mankakasakey so amin a makabat a pinalsa ed tuan panagdayew. (Apoc. 5:13) Lapud kabat nen Jesus so kaimportantian na saya, masimoon ton impikasi so pankakasakey na saray patumbok to. (Juan 17:20, 21) Panon a makatulong so balang sakey ed sikatayo ed kiwalay pankakasakey ed Kristianon kongregasyon?
3 No Panon a Nadampot so Pankakasakey: Agnagamoran so pankakasakey na saray Kristiano no anggapo so Salita tan espiritu na Dios. No iyaplika tayo iray nababasa tayo ed Biblia, mabulos so iyagus na espiritu na Dios ed bilay tayo. Ontulong iya ed sikatayon ‘imatonan so pankakasakey na espiritu ed balor na kareenan.’ (Efe. 4:3) Satan so mamakiwas ed sikatayon mantetepelan ed sakey tan sakey lapud aro. (Col. 3:13, 14; 1 Ped. 4:8) Kasin iyaalibansa yo so pankakasakey diad pandadalepdep yo ed Salita na Dios kada agew?
4 Say ganggan ed sikatayon manpulong tan manggawa na saray babangatan so mamapakasakey met ed sikatayo. Sano mankimey itayo a kaiba so arum diad Kristianon ministeryo, a “manseet a nipaakar ed pananisia ed ebanghelyo,” sikatayoy magmaliw a ‘mankakatambayan ed katuaan.’ (Fil. 1:27; 3 Juan 8) Legan tayon gagawaen itan, onelet so manamakasakey iran bedber na aro ed loob na kongregasyon. Akin ya ag-itagar so sakey ya abayag lan agmo akaiba, a mankimey kayon dua diad lawak na ministeryo ed sayan simba?
5 Agaylan pribilehyo tayo so pagmaliw a kabiangan na alenleneg a tuan internasyonal ya impanaagi diad dalin natan! (1 Ped. 5:9) Legan na Disyembre tan diad kagapo na Enero, nilibon totoo diad Pilipinas so makaeksperiensya a mismo ed sayan pankakasakey diad “Igloria so Dios” a Distrito iran Kombension. Komon ta mitulongan itayon amin ed sayan mablin pankakasakey diad pambasa na Salitay Dios ed kada agew, panresolbi ed saray agpantatalosan diad maaron paraan, tan pangipulong ed maong a balita “dia ed impankakasakey.”—Roma 15:6.