Panon Tayon Natulongan Iray Aliwan-Tasi a Kaasawaan?
1 Dakel a lingkor nen Jehova so walaan na kaasawaan a maasingger ed saray agagi tan walaan na interes ed kongregasyon balet ta agda labay so magmaliw a lingkor na Dios. Oniay inaksobi na sakey ya asawan laki: “Say ideyan panagkabkaabungan so baleg a mamupuger ed siak.” Nayarin arum so walaan na agmakasulatan iran niyugali a kaukolan dan talonaan, odino moriaen da ya agdan balot sarag so nawalaan na okupadon teokratikon eskedyul a gagawaen na asawa ra. Panon tayo ran natulongan?
2 Ipatnag so Personal ya Interes: Say pakawalaan na personal ya interes ed arum tan pangimano ed saray kapagaan da so makapangilukas na dalan pian sikaray onkiwas ed katuaan na Biblia. (Fil. 2:4) Saramay datin agmipara so sisiaen da ed asawa ra so mabetbet a manasalambit ed maaron interes ya impatnag na arum. “Si José, a sakey a matatken ed kongregasyon, so awalaan na nikaduman interes ed siak,” so insalaysay na asawan laki a tinukoy ed gapo. “Moriaen ko a say panamaseseg to so amakiwas ed siak diad kaunoran pian maseet a manaral.” Inkuan met na sananey ya asawan laki a saray ombibisita ed sikaton agagi so nansagpot pian pantongtongan iray makapainteres ed sikato. “Siak so awalaan na nidumaduman panmoria ed relihyon [na asawak],” so inkuan to. “Saray kakaaro to so makabat a totoo a sarag day mitongtong ed nanduruman pamaakaran.”—1 Cor. 9:20-23.
3 Mangiter na Praktikal a Tulong: Nayarin natenyeg met iray aliwan-Tasi a kaasawaan ed maaron panutulong ed sikara. (Uli.3:27; Gal. 6:10) Sanen aderal so luganan na sakey ya agmananisian asawan laki, sikato so tinulongan na sakey a kalangweran a Tasi. “Talagan nandinayewan ko itan,” so inkuan to. Sakey met ya agin laki so sanagew a tinmulong ed agmananisian asawa na agin bii a man-alar ed sular da. Legan iran mankikimey tan maniistoryaan, nagmaliw iran sankaaro. Apalabas so duaran simba, inmasingger so laki ed agi tan inkuan to: “Panaon la pian umanen koy kabibilay ko. Nayari ta’n iyaralan mo ak na Biblia?” Sikatoy maples ya inmaligwas tan natan et sakey lan bautismado a Tasi.
4 Legan tayon aanapen iramay makanepegan ed teritorya tayo, itultuloy tayon tulongan iramay kaasawaan na kapananisiaan tayo.—1 Tim. 2:1-4.