“Aroen Yo si Jehova, Amin Yo a Sasantos”
Impatey nen Jesus a Nodnonoten no Abril 4
1 Pigay taon la so apalabas, sanen uuleyan ni na Komunista so Ukraine, babantayan a maong na saray autoridad iray agagi—nagkalalo la sano manasingger la so agew na Pangdem na Katawan—lapud iilaloan dan nadiskobre so pasen a pantitiponan da. Mabetbet ya onia so problema, lapud tantyado la na saray autoridad so petsa na pannodnonot ed impatey nen Jesus. Anto so nayarin gawaen na saray agagi? Diad abung na sakey ya agin bii et adelap so silongan. Lapud ag-iilaloan na saray autoridad a walaray mantitipon ditan, saray agagi so angipaalagey na entablado ed lampas na anggad-pueg a danum. Anggaman kinaukolan da so onyurong ya akabikotkot diad entablado ed silong na abeban gubida, anggapo so anigensigen ed sikara legan a malikeliket a sinelebraan na kongregasyon so Memoryal.
2 Say inkadeterminado na saray agagi tayo ed Ukraine a mangunor ed ganggan a nodnonoten so impatey nen Jesus et alay abig a panangipatnag na aro ra ed Dios. (Luc. 22:19; 1 Juan 5:3) Bektaman a walaray arapen tayon babeng ed bilay tayo, napaseseg itayo ed saratan ya ehemplo tan magmaliw itayon determinado ya onatendi ed panselebra na Pangdem na Katawan no Abril 4. Diad ontan et nipatnag tayo a walaan itayo met na liknaan a singa ed samay salmista ya angikanta: “O aroen yo si Jehova, amin yo a sasantos [to].”—Sal. 31:23.
3 Tulongan so Arum ya Ombulaslas ed Panangaro ed Dios: Say panangaro ed Dios so mamakiwas met ed sikatayon imbitaan so arum a kaiba tayon mannodnonot ed impatey nen Jesus. Say insert na Pebrero a Ministeryo Tayo ed Panarian so amaseseg ed kada sakey ed sikatayo ya ilista iraman so nononoten tayon imbitaan ed Memoryal. Kasin maseet yon gagawaen itan diad pangiimbita ed kada too a walad listaan yo? Mangigana na panaon pian ipaliwawa ed sikara so kaimportantian na okasyon. Say makaaron pangipanonot ed agew tan oras na Memoryal tan say pangabet ed sikara, no nakaukolan, so nayarin mamaseseg ed sikaran onatendi.
4 Diad pasen a pantitiponan et manggunaet itayon mangibano ed saramay angawat ed imbitasyon tayo, tan ipalikna ed sikara so panangabrasa tayo. Panon yo iran natulongan pian ombulaslas so panangaro ra ed si Jehova? Manparaan tan mabulos kayon mangebat ed saray tepet da. Alisto kayon mangiyopresi na panangiyaral ed Biblia no matukoy. Imbitaan iran onatendi ed saray sinimban miting na kongregasyon tayo. Saray mamatatken so nagkalalo lan mangimano ed saramay inaktibon Kristiano ya inmatendi. Nayarian dan iyuksoy so ibisita ed saratan tan pasesegen iran ituloy lamet so kimey da, a nayarin palaknaben iray punton nipresenta diad paliwawa ed Memoryal.—Roma 5:6-8.
5 Paaralemen so Dilin Panangaro Tayo ed si Jehova: Say panmolimoli ed langkap a dondon so nayarin mamaaralem na panangaro tayo ed si Jehova tan ed Anak to. (2 Cor. 5:14, 15) Oniay inkuan na sakey ya abayaglan onaatendi diad Memoryal: “Tatalaranan mi so Memoryal. Nagmaliw itan a lalon espisyal kada taon. Nanonotan ko sanen wala ak ed punerarya, 20 taon lay apalabas, ya us-usdongan ko so bangkay na pinablik ya ama tan diman ko alikna so peteg a panamablik ed dondon. Nensaman et basta amtak labat itan. On, kabisadok so amin a teksto nipaakar ed dondon tan no panon ya ipaliwawa iratan! Balet sanen aliknak so graben epekto na ipapatey, insan ak labat peteg ya aliketan ed walan nagawaan na satan a mablin dondon ed sikatayo.”—Juan 5:28, 29.
6 Legan a manasingger so petsa na panselebra ed sayan taon, iparaan la natan so puso yo parad satan ya okasyon. (2 Awa. 19:3) Mandalepdep diad espisyal a panagbasa ed Biblia legan na Memoryal, a nidatak ed Usisaen so Kasulatan ya Inagew-agew—2004 tan diad 2004 Calendar. Panggagayagaan na arum so panrepaso ed kapitulo 112-16 na libron Greatest Man legan na panagaral da bilang pamilya. Arum so manggagawa na kaaruman a panagsukimat ya uusaren da so arum a katulongan ed panagaral ya intarya na matoor tan makabat ya aripen a klase. (Mat. 24:45-47) Nayarian tayon amin a salambiten so langkap a dondon diad masimoon iran pikakasi tayo. (Sal. 50:14, 23) On, legan na sayan panaon na Memoryal, itultuloy tayo komon a nodnonoten so panangaro nen Jehova ed sikatayo tan anapen iray paraan a nipatnag tayo so panangaro ed sikato.—Mar. 12:30; 1 Juan 4:10.