Espiritual a Tagano Diad Dugan Panaon
1. Panon a nasusumpal natan so Ezequiel 36:29?
1 “Manawag ak naani na bukel, et sikato naani parakelen ko, tan agak naani mangiyan na eras ed sikayo,” so kuan na Soberanon Katawan a Jehova. (Eze. 36:29) Saratan a mapropetikon salita so onaaplika ed totoo na Dios natan. Diad simbolikon panangibaga et daakan a pinatubo nen Jehova so manangiter-bilay a bukel parad totoo to. Saya so malinew ya ipapanengneng na nipanpanaon ya espiritual a tagano ya itatarya panamegley na saray distriton kombension tayo.
2. Panon ya inusar nen Jehova iray distriton kombension pian itarya so espiritual a tagano ed dugan panaon?
2 Diad samay kombension ed Columbus, Ohio, nen 1931, inwanwan nen Jehova iray mandadayew ed sikato ya akbibiten so balon ngaran a saray Tasi nen Jehova. (Isa. 43:10-12) Nen 1935 et suston abidbir no siopay baleg ya ulop ed Apocalipsis 7:9-17. Nen 1942, impaliwawa nen Brother Knorr so “Kareenan—Mansiansia Kasi Itan?” Saman a paliwawa so amaligsa ed ingglobon panagpulong a kimey tan angitonton ed inkiletneg na Watchtower Bible School of Gilead. Anggaman mas makatantanda so arum a kombension, balang sakey ed saratan so napno na masustansian espiritual a tagano ya intarya ed dugan panaon.—Sal. 23:5; Mat. 24:45.
3. Antoy nepeg tayon gawaen pian nagunggonaan ed espiritual a ponsia diad distriton kombension tayo?
3 Komustay Panangan Yo? Anggaman daakan so tagano, siansia nin posible a sikatayoy onkulang na sustansia no agtayo panggunaetay mangan. (Uli. 26:15) Tua met itan ed espiritual a pamaakaran. Diad pigaran kombension et naimano a dakel iray manaakar-akar odino mantotongtong legan na programa. Anggaman importantin aspekto na kombension so makapaseseg a panlilimog, say panaon parad saya et antis tan kayari na kada sesyon. (Ecl. 3:1, 7) No anggapo itayo ed yurongan tayo pian ontalineng, nayarin walay nasaew tayon makanan punto. Sagpaminsan et kaukolan a singbaten na saray manangasikaso na departamento ed kombension tan saray agagin walaan na asainmin iray bengatlan nipaakar ed kombension leleg na saray sesyon. Balet no agnakaukolan, nepeg a sikaray mangipanengneng na ehemplo diad italineng da ed programa. Anggapo ed sikatayo so malabay a makasaew ed dinanman ya intaryan espiritual a tagano.—1 Cor. 10:12; Fil. 2:12.
4. Panon tayon nipanengneng a misalsalamat itayo ed daakan ya espiritual a tagano ya itatarya nen Jehova?
4 Peteg a panggagayagaan tayo so daakan ya espiritual a tagano ya itatarya nen Jehova, a miduma ed andiay-sustansia iran palson doktrina na Kakristianoan! (Isa. 65:13, 14) Sakey a paraan a ‘makapisalamat’ itayo et diad panmoria ed kombension a pankanawnawan nibangat nen Jehova. (Col. 3:15) Imanoen so mensahe, aliwan say manpapaliwawa, tan ipasen a say mensahe et manlalapu ed Engranden ‘Manangibangat.’ (Isa. 30:20, 21; 54:13) Ontalineng a maong. Isulat iray manunan punto. Repasoen iray pabitar ed programa kada labi. Iyaplika so naaralan yo.
5. Antoray rason na panliket tayo ed saray distriton kombension?
5 Amin a nagagawan kombension antis na Armagedon, balanglan diad kampo na saray apatakyas, diad bansan atabek na bakal, odino diad angkakabaleg tan mareen a pasen, et sakey a pananalo sumpad si Satanas! Bilang nankakasakey a sanaagi, papablien tayoray pankanawnawa tayo a mandudumog diad saray distriton kombension. (Eze. 36:38) Matalek itayo a maaro itayon taryaan lamet nen Jehova na ‘tagano diad manepeg’ a panaon.—Luc. 12:42.
[Kahon ed pahina 4]
Ipatnag so Panangapresya ed Dulang nen Jehova
◼ Ontalineng a maong
◼ Isulat iray manunan punto
◼ Repasoen iray pabitar ed programa kada labi
◼ Iyaplika so naaralan yo