Ipatnag so Pisasalamat Yo
1 Anggaman manbibilay itayo la ed “saray panaon a maatap,” walaan itayo na daakan a rason a pisalamatan si Jehova. (2 Tim. 3:1) Say manunan pisalsalamatan tayo et say mablin langkap na Anak to nisesengeg ed sikatayo. (Juan 3:16) Niarum ni, bangta naeerasan ed espiritual iramay walad palson relihyon, panggagayagaan tayo so daakan ya espiritual a tagano. (Isa. 65:13) Kabiangan itayo na sankamundoan ya impanaagi tan apribilihyoan itayon mibiang ed makapalikliket ya ilalaknab na tuan panagdayew. (Isa. 2:3, 4; 60:4-10, 22) Panon tayon nipanengneng so pisasalamat tayo ed si Jehova diad saray daakan a bendisyon ya ipapagamor to ed sikatayo?—Col. 3:15, 17.
2 Magayaga tan Interon-puson Panaglingkor: Sanen sisingbaten nen apostol Pablo so panangiter na materyal, oniay insulat to: “Say Dios aroen to so sililiket a mangiter.” (2 Cor. 9:7) Onaaplika met iyan prinsipyo ed panaglingkor tayo ed Dios. Nipapatnag so pisasalamat diad inkaligsa tayo ed katuaan, diad gayaga tayo ed saray Makristianon miting, diad seseg tayo ed lawak na ministeryo, tan diad maliket a panusumpal tayo ed linawa na Dios.—Sal. 107:21, 22; 119:14; 122:1; Roma 12:8, 11.
3 Diad Israel nensaman, say Ganggan so ag-angigetar na espisipikon karakel na bengatlan iyapay. Kada managdayew so makapangipatnag na pisasalamat to diad pangiter “unong na nayarian to a nikanepegan ed impangasi nen Jehova” a naawat to. (Deut. 16:16, 17) Mipadpara met natan, pakiwasen itayo na misalsalamat a puso a gawaen so anggad iyabuloy na saray sirkumstansya tayo diad panagpulong na Panarian tan panaggaway-babangatan a kimey. Say bulan na Mayo so maabig lamet a pankanawnawa a nipanengneng so pisalsalamat tayo. Nayarian na arum ya anamoten so bakasyon ed paneeskuela pian makapan-auxiliary payunir, bangta saray arum et napadaak da so panaon da ed lawak na kimeyan legan a marakep so tiempo. Napalaknab yo kasi so ministeryo yo ed sayan bulan?
4 Pirmin Misalsalamat: Say sankaimportantian a paraan a nibalikas so pisasalamat tayo ed si Jehova et diad pikakasi. (1 Tes. 5:17, 18) Papasesegen itayo na Salitay Dios ya “ondaak ed pisasalamat.” (Col. 2:7) Anggan sano okupado itayon maong odino nadedesdes itayo, kaukolan ya ilaktip tayo so pisasalamat ed inagew-agew a pikakasi tayo. (Fil. 4:6) On, panamegley na ministeryo tan pikakasi tayo, komon ta “ondaak [itayo] ed dakel a pisasalamat ed Dios.”—2 Cor. 9:12.