“Manpalaknab”

1. Anto so responsabilidad na balang sakey ed sikatayo?

¹ Diad muyong na saray Kristiano, balang sakey ed sikatayo so walaan na responsabilidad a paligsaen so kongregasyon. (1 Ped. 1:22; 2:17) Satan ya inkaligsa so napawala sano ‘palaknaben’ tayo so panangaro tayo ed balang sakey. (2 Cor. 6:12, 13, NW) Akin ya importante a kabaten tayon maong iray agagi tayo?

2. Akin ya importante a bayuboan so pikakaaro ed saray kapananisiaan?

² Onelet so Pankakaaro: Legan tayon nakakabat a maong iray kapananisiaan tayo, lalo tayon napabli so pananisia, inkaanos, tan arum niran maabig a kalidad da. Nibaliwala tayo iray kakulangan da tan onelet so pankakaaro tayo. Diad pikabat a maong ed sakey tan sakey, lalon akinlongan itayon mamaseseg tan mantambayo ed sakey tan sakey. (1 Tes. 5:11) Magmaliw itayon “ligliwa” ed sakey tan sakey pian naresistian iray mauges ya impluensya na mundo nen Satanas. (Col. 4:11) Makasengeg ed aarapen a napnoy desdes a kaunoran iran agew, agaylay pisalsalamat tayo lapud walaan itayo na saray maabig a kakaaro ed limog na totoo nen Jehova!​—Uli. 18:24.

3. Panon a magmaliw itayon ligliwa ed arum?

³ Saray maapit a kakaaro so nagkalautlan lapuan na biskeg tan ligliwa sano nidudunget itayo ed saray pirmin subok. (Uli. 17:17) Oniay nanonotan na sakey a Kristiano ya akipuligesgesan ed liknaan a sikatoy agmakana: “Walaray kakaaro a mangibaga na makapaseseg iran bengatla nipaakar ed siak pian natulongan ak a manalona ed negatibo iran kanonotan ko.” Saratan a kakaaro so langkap nen Jehova.​—Uli. 27:9.

4. Panon tayon nakabat a maong iray arum ed kongregasyon?

⁴ Ipatnag so Interes ed Arum: Panon tayon napalaknab so matamoy a panangaro tayo ed saray kapananisiaan tayo? Likud ni’d pangibano ed arum diad saray Makristianon miting, panggunaetan ya ibiang ira ed makabaliksan a pantotongtong. Ipatnag so personal ya interes ed sikara, bangta agpibabalian so pribadon bilay da. (Fil. 2:4; 1 Ped. 4:15) Say sananey nin paraan a nipatnag so interes ed arum et diad pangimbita ed sikara ed sakey a panangan. (Luc. 14:12-14) Odino nayarin iyuksoy yoy pikimey ed sikara diad lawak na ministeryo. (Luc. 10:1) No manbulon itayo a kabaten a maong iray agagi tayo, niyalibansa tayo so pankakasakey ed loob na kongregasyon.​—Col. 3:14.

5. Anto so sakey a paraan a napalaknab tayoy pikakaaro tayo?

⁵ Kasin say pipilien tayo a pilimogan et saraman lambengat so kaedaran tayo odino saraman so kapara tayoy paninteresan? Agtayo komon abuloyan iratan a sengegan a manlimita ed pikakaaro a babayuboan tayo ed loob na kongregasyon. Si David tan Natan ontan met ed si Rut tan Noemi so amayubo na malet a bedber na pankakaaro anggaman nandumaan so edad tan abenegan da. (Rut 4:15; 1 Sam. 18:1) Kasin napalaknab yoy pikakaaro yo? Say panggawa ed satan so mangitarok na ag-iilaloan iran bendisyon.

6. Antoray pigaran gunggona diad pamalaknab ed matamoy a panangaro tayo ed saray agagi tayo?

⁶ Diad pamapalaknab ed matamoy a panangaro tayo ed arum, makapanpapabiskegan itayo tan napapawala tayo so kareenan ed loob na kongregasyon. Niarum ni, bendisyonan itayon mismo nen Jehova lapud ipapatnag tayon panangaro ed saray agagi tayo. (Sal. 41:1, 2; Heb. 6:10) Akin ya agpagmaliwen a kalat so pangabat a maong ed dakel ya agagi anggad posible?