Ministerial Training School—Sakey a Baleg a Kapot a Mangitonton ed Kimey
1 Diad panamegley nen propeta Jeremias, impasakbay nen Jehova: “Mangipasen ak naani na saray pastol ed sikara; a sikara so mantagano ed sikara, et ag-ira la naani ontakot, odino napunaw, anggapo met naani so onkulang.” (Jer. 23:4) Say ontan a panagpastol a kimey so nagagawaan natan ed limog na totoo ed amin a nasyon. Saya so gagawaen na nilibo-libon mamatatken ed kongregasyon. Niarum ni, sakey ya ulop na saray kalangweran a lalaki a singa karakel na linaew so mangiyaapay ed inkasikara a mabulbulos diad panaglingkor ed si Jehova. (Sal. 110:3) Agaylan bendisyon irayan mapaabeban agagin lalaki diad saray kongregasyon na totoo na Dios! Legan a mantutultuloy so espiritual a panagtipon a kimey, siansian walay pankaukolan parad kualipikadon lalaki ya akaparaan a manlingkor ed saray agagi ra.
2 Say Ministerial Training School so maabig a probisyon ed pangipasal ed saray walad kasuloan a mamatatken tan ministeryal a lingkor parad apadaak iran responsabilidad. Masulok a 22,000 ya estudyante manlapud 140 a bansa so nipasal la diad 999 a klase a ginawa nanlapula’d inggapo na eskuelaan nen 1987. Nanlapula nen 1994, wala lay 40 a klase a ginawa ed Pilipinas, tan 1,037 ya estudyante so akapangraduar la. Anggaman saray klase so temporaryon intunda pian nisublay so Traveling Overseers School, iplaplano so pangitubat lamet ed saray klase diad Pilipinas no Enero, 2006. Parad saramay nangraduar la, apaneknekan dan say eskuelaan so peteg a “sakey a baleg a kapot a mangitonton ed kimey.”—1 Cor. 16:9, NW.
3 Say Gagala na Eskuelaan: Say gagala na Ministerial Training School et pian ipasal tan kinlongan iray kualipikadon lalaki a manakbat ed saray responsabilidad inerman a walay pankaukolan ed organisasyon. Papalaknaben na eskuelaan iray abilidad da ed panangidaulo ed panag-ebanghelyon kimey, pibibiang ed panagpastol na pulok, tan panagbangat ed kongregasyon. Kayarin nangraduar, arum ya estudyante so nipasal la bilang ombiabiahen manangasikaso ed Pilipinas, bangta say arum so niasain ed arum a bansa bilang misionaryo. Arum so akaawat na saray asainmin a manlingkor diad kongregasyon a nanlapuan da odino ed saray lugar a walay babaleg a pankaukolan diad teritoryan sakop na sanga.
4 Legan na waloy-simba a kurso, saray estudyante so onggapo ed impasyan panagaral ed Biblia. Maalwar dan aaralen so dakerakel a bangat na Biblia ontan met ed saray responsabilidad ed panagpastol tan saray giya ed panangasikaso na saray problema ed kabibilay na Kristiano. Nanaaralan da met no antoy ibabangat na Kasulatan nipaakar ed panangipakurang, hudisyal, tan saray pamaakaran na organisasyon. Makakaawat iray nikabiig a kipapasal ed panagpaliwawa ed publiko tan natutulongan pian napapeles day espiritual ya ibubulaslas da.
5 Saray Kakaukolanen: Natalosan sirin ya atagey iray kakaukolanen diad panaral ed satan ya eskuelaan. Saray aplikante so nepeg a manlilingkor bilang mamatatken odino ministeryal a lingkor ed loob la na ag-onkulang a duay taon. Amin so nepeg a walad kasuloan a manedad na 23 anggad 50. Diad Pilipinas, saray aplikante et nepeg a makabasa, makapansulat, tan makapansalita na Ingles, tan nepeg a maabig so bunigas da, ya agmankakaukolan na nikaduman panangasikaso odino nakan. Prayuridad iramay manlilingkor bilang regular payunir.
6 Saramay manboluntaryo so nepeg a mabulos tan makayarin manlingkor inerman a nakaukolan ira. Saya so mankaukolan na singa ed awawey nen propeta Isaias, a magunaet ya angiyopresi na inkasikato a manggawa na nikaduman kimey, a kuanto: “Wadia ak; ibaki mo ak.” (Isa. 6:8) Impatnag to met so inkamapaabeba ed interon bilay to. Saramay man-aplay parad Ministerial Training School so nepeg a papakiwasen na aro ed agagi ra tan pilalek a manlingkor ed sikara imbes a say inkaprominente odino nikaduman posisyon. Kayarin makaawat na maabig a panangipasal, saray mangraduar so iilaloan a mangiyaplika ed naaralan da pian nagunggonaan so arum.—Luc. 12:48.
7 Saray Gunggona: Legan na waloy-simba ya impasyan kipapasal, saray mangraduar so “natagano ed saray salita na pananisia tan maabig a bangat.” (1 Tim. 4:6, NW) Saya so manginlong ed sikara pian ontulong tan mamaseseg ed arum diad niasainan da iran kongregasyon tan sirkito. Diad dakel iran lugar a niasain iray nangraduar ed Ministerial Training School, inmaligwas so kimey ed lawak; nipaseseg so panagpayunir a serbisyo, nagkalalo la ed limog na saray kalangweran; tan nagkalalo lan atulongan so dakel a balo nin mililimog ed totoo na Dios.
8 Kasin sakey kan walad kasuloan a matatken odino ministeryal a lingkor a manedad na 23 anggad 50? Akin ya agnonoten so pangaplay ed Ministerial Training School diad ontumbok a sirkiton asamblea yo? Kasin sakey kan kalangweran ya agin laki a mannononot na kalat parad arapen diad panaglingkor ed si Jehova? Akin ya agmo pasimplien so bilay mo tan iwaklit iray pakasebelan ta pian makaloob ka ed sayan “baleg a kapot a mangitonton ed kimey”? Satan so mangitarok na pirmin gayaga tan kapenek. On, say Ministerial Training School so apaneknekan a bendisyon aliwan diad saray nangraduar labat ed satan ya eskuelaan noagta pati diad saray kongregasyon na totoo na Dios ed sankamundoan.
[Kahon ed pahina 3]
No Panon Iran Agunggonaan ed Inkipasal
“Say panangipasal so talagan amaaligwas ed ministeryok tan ed abilidad kon mamastol tekep na kakabatan, ya uusaren so Kasulatan.”
“Say eskuelaan so angipagamor ed siak na baleg a kompiyansa ed panakbat ed nanduruman responsabilidad ko ed kongregasyon.”
“Satan so anguman ed amin lawarin aspekto na bilay ko, pati say panmoriak ed teokrasya tan organisasyon na Dios.”
“Say inkipasal ko so tinmulong ed siak a namoria a kaukolan a mabulos ak a manlingkor ed babaleg so pankaukolan.”