Eskedyul na Pamilya—Saray Pantitipon na Kongregasyon
1 No sakey kayon Kristianon ateng, labay yon napabaleg iray ananak yo a mangaro tan manlingkor ed si Jehova tan diad kaunoran et makagamor na bilay ya andi-anggaan diad insipan ton balon mundo. Panon yo ran natulongan pian iyuna ra ed bilay da so panagdayew ed si Jehova? Say manunan paraan et panamegley na ehemplo yo. (Uli. 20:7) Oniay nanonotan na sakey ya agin bii nipaakar ed ehemplo nen ina to: “Agmi la kaukolan a panduaruwaan no kasin miaral kami odino andi.” Saya so nipurek a maong ed sikato.
2 Kasin natatalosan na pamilya yo so gagala na saray pantitipon na kongregasyon? Say naaawat tayon instruksion diad sarayan panduroypo so mamabiskeg ed sikatayon manumpal ed linawa na Dios, tan say pakapipiulop tayo ed saray agagi so talagan makapaseseg. (Isa. 54:13; Roma 1:11, 12) Anggaman kuan, say manunan gagala na sarayan pantitipon et pian nidaydayew si Jehova “dia ed saray muyong.” (Sal. 26:12) Saray Kristianon pantitipon so mangiiter ed sikatayo na pankanawnawa pian nipatnag so panangaro ed si Jehova tan mandayew ed sikato.
3 “Manlikas”: Sano aapresyaen tayo so gagala na saray pantitipon, mansiansia itayon ‘malikas’ a diad ontan et agtayo kalkalnan nipasal so onliwat ed saratan parad agtanto importante iran pamaakaran. (Efe. 5:15, 16; Heb. 10:24, 25) Sano manggagawa kayo na eskedyul na pamilya yo, nayarin onggapo kayo’d pangiyeskedyul ed saray oras na pantitipon na kongregasyon. Manalwar ya ag-iratan nasaletan na arum niran aktibidad. Seguroen a prayuridad na pamilya yo so iyaatendi ed saray pantitipon.
4 Agta napapakiwas itayo sano nababasa tayo iray nipaakar ed agagin makatatalona ed saray babeng ed iyaatendi ed saray pantitipon tan asamblea? Anggaman agmet tanto nikadkaduma iray sirkumstansya yo, nayarin nipapaarap kayo met ed saray angat. Lalon papairapen nen Satanas so pakapandayew na totoo na Dios ed si Jehova. Balet, napaseguroan kayo a seguradon nanenengneng na ananak yo so determinadon pansasagpot na pamilya yo ya onatendi ed saray pantitipon na kongregasyon. Petepeteg a diad panggawa yo ed satan et ninabang yo ed sikara so maespiritual a langkap ya agdan balot nalingwanan.