Bayuboan so Dunong ed Panagkatunongan ed Arum
1. Anton salaysay ed Biblia so usisaen tayo, tan akin?
1 Say diskurso nen apostol Pablo ed sinagoga diad Antioquia ed Pisidia, unong a nirekord ed Gawa 13:16-41, so mangitatarya na alay abig ya ehemplo ed no panon so mankatunongan ed arum. Inkonsidera nen Pablo so abenegan tan panagnonot na saray dumerengel to tan inyadapta to ed saratan so impangipresenta to na maong a balita. Legan tayon uusisaen iyan salaysay, konsideraen tayo no panon tayo met a nagawaan itan ed ministeryo tayo.
2. Anto so naaralan tayo manlapud paraan na impangigapo nen Pablo ed diskurso to?
2 Panggunaetan ya Igapo ed Pampaknaan Yon Dua: Anggaman akasentro so mensahe nen Pablo ed manunan betang nen Jesus ed pakasumpal na gagala na Dios, ag-inggapo nen Pablo so diskurso to diad impanaglawi ed satan a punto. Imbes, intongtong to so bengatlan pakapipaknaan na saray dumerengel to, a say kaslakan et Judio, salanti, say awaran na Judion totoo. (Gawa 13:16-22) Mipadpara, magmaliw itayon mas epektibo a mamakiwas ed arum no panggugunaetan tayon itongtong so pakapipaknaan da met. Nayarin kaukolanen na saya a pasesegen tayo iran mangibalikas na kanonotan da panamegley na mataktikan pantepet tan italineng a maong pian natebek tayo so peteg ya importante ed sikara.
3. Akin a mairap parad saray dumerengel nen Pablo ya awaten a si Jesus imay insipan a Mesias?
3 Diad impangitongtong to ed awaran na saray Judio, impanonot nen Pablo ed saray dumerengel to so sipan na Dios a mamawala na Manangiliktar manlapud poli nen David. Ingen, say tatalaranan na maslak a Judio et sakey a militar a palbayani a mangibulos ed sikara ed panangontrol na Roma tan gawaen ton superyor ed amin so Judion nasyon. Seguradon amta ra a si Jesus et impulisay na saray Judion papanguloy relihyon diad Jerusalem, inyawat ed pakauley na saray Romano, tan impapatey. Panon iran nakombinse nen Pablo a Sikato imay insipan a Mesias?
4. Panon a sidudunong ya akikatunongan si Pablo ed saray Judion dumerengel to?
4 Iyadapta so Metodo Yo: Lapud amta nen Pablo so nononoten na saray dumerengel to, inusar to so Kasulatan pian mankatunongan ed sikara base ed saray bengatlan inawat da la. Alimbawa, imparungtal to si Jesus bilang anak nen David tan bilang samay impakabat nen Juan a Managbautismo ya ipapasen na karaklan bilang propeta na Dios. (Gawa 13:23-25) Impabitar nen Pablo a sanen si Jesus so impulisay tan senentensiaan na ipapatey na saray papanguloy relihyon, sikaray ‘anumpal ed salita na saray Propeta.’ (Gawa 13:26-28) Impaliwawa to met a walaray akatasi a si Jesus so pinaoli, tan impaimano to iray kabisado ran balikas ed Kasulatan ya asumpal sanen inmoli Jesus.—Gawa 13:29-37.
5. (a) Panon ya inyadapta nen Pablo so metodo to sanen mitotongtong ed saray Griegon dumerengel to? (b) Panon tayon naalig so ehemplo nen Pablo sano mantatasi ed teritorya tayo?
5 Diad biek a dapag, sanen manpapaliwawa ed saray Griegon dumerengel diad Areopago, Atenas, duman metodo so inusar nen Pablo. (Gawa 17:22-31) Ingen, saman met lanlamang a manunan mensahe so impresenta to, tan diad parehon kipapasen saray sagpot to so amawala na maabig iran resulta. (Gawa 13:42, 43; 17:34) Natan, magmaliw itayo met a mas epektibo ed ministeryo no panggugunaetan tayon itongtong so pakapipaknaan met na saray dumerengel tayo tan no iyadapta tayo so metodo tayo ed abenegan tan panagnonot da.