No Antoy Ibaga Nipaakar ed Saray Magasin

Say Panag-Bantayan Nob. 15

“Panumamengan na dakel a totoo no akin a saray probleman manasalot ed katooan et mandakel imbes a mandaiset. Ninonot yo la kasi no antoy ibabaga na sayan bersikulo a posiblin rason? [Basaen so Apocalipsis 12:9. Insan abuloyan ya onebat.] Ibabaga na sayan magasin no antoray pakana na Diablo pian nibalang iray totoo tan no panon tayon naresistian iray impluensya to.”

Awake! Nob. 22

“Anggaman magenap so napapawalan naakan pian napakan so amin a totoo ed dalin, manga 800 milyon a totoo so nanaerasan. Agta makapaermen itan? [Abuloyan ya onebat.] Uusisaen na sayan magasin so ombabaleg a problema ed panagtagano diad saray syudad. Sisingbaten met na saya so sipan na Biblia a mundon anggapo lay eras.” Basaen so Salmo 72:16a.

Say Panag-Bantayan Dis. 1

“Sano narerengelan na totoo so salitan ‘Armagedon,’ isipen na dakel a sakey itan a makapataktakot a turobos a panagderal. [Ipanengneng so kahon ed pahina 3.] Nikelawan ka kasi no naamtaan mon say Armagedon et sakey manaya ed saray sankaabigan a bengatlan nayarin nagawa ed sikatayo? [Abuloyan ya onebat.] Ipapaliwawa na sayan magasin no akin.” Basaen so 2 Pedro 3:13.

Awake! Dis. 8

“Labay ko komon ya itongtong ed sikayo so nipaakar ed panaon sano nawalaan la so amin na matukoy ya ayaman. Agta makapaermen ta dakel a totoo so andian na ayaman? [Abuloyan ya onebat. Insan basaen so Isaias 65:21, 22.] Uusisaen na sayan magasin iray sengegan na kaandiay ayaman. Ipapaliwawa met na saya no panon a tooren na Dios so sipan a kapkapambasa tayo.”