Ipatnag so Personal ya Interes—Diad Pagmaliw ya Akaparaan
1 Say maabig a preparasyon parad ministeryo so ontulong ed sikatayon ipatnag so personal ya interes ed arum. Panon ya ontan? No akaparaan itayon maong, agtayo pinonot a naynay so presentasyon tayo tan mas niyapasakey tayo so imano tayo ed unabung. Sakey ni, ontulong itan ed sikatayon natalonaan so pannerbiyos tan makapansalitan impapuso. Balet, panon itayon makapangiparaan na epektibon presentasyon?
2 Mangusar na Presentasyon ya Ontukoy: Mamili manlapud Enero 2006 a Ministeryo Tayo ed Panarian na sakey ed nisuheri iran presentasyon a matukoy ed lugar yo, tan nonoten no panon yon nibalikas itan ed dilin salita yo. Itukoy itan ed teritorya yo. Alimbawa, no mabetbet yon naabet iray totoo a walaan na relihyoso odino etnikon abangonan, nonoten no panon a makapainteres ed sikara so presentasyon yo. Say pangiyadapta ed presentasyon yo ed saray totoon nakakatongtong yo so mangipatnag na masimoon ya interes yo ed sikara.—1 Cor. 9:22.
3 Sano usaren yo la so presentasyon, itultuloy ya itukoy-tukoy itan. Lapud nagkalalo lan importante iray introduksion, imanoen no antoy reaksion na totoo ed satan. Kasin paninteresan da so tema? Kasin saray itetepet yo et mamapakiwas ed sikaran onebat? No andi, uman-umanen itan anggad naamtaan yo no antoy epektibo.
4 Saray Katulongan ed Pakatanda: Naimano na dakel a mairap dan natandaan so sakey a presentasyon sano wala la ra’d puerta. No agawa la itan ed sikayo, kasin sinali yo lan impasal so sakey a presentasyon diad impangipadengel ed arum? Makatulong iya ed sikayo pian onlinew ed nonot iray ideya tan nibalikas iratan ed simpli, lohikon paraan. Mangiparaan met itan ed sikayo a mangarap ed nanduruman reaksion na saray unabung.
5 Say sananey nin katulongan ed pakatanda et say pangisulat na antikey a sumaryo na presentasyon diad melag a papel tan pasikmatan itan antis kayon onasingger ed puerta. Naimano na arum a sayan antikey a panonot so tinmulong ed sikaran magmaliw a lalon relaks tan lalon makasarag a mitongtong ed totoo. Diad oniaran paraan, say maabig a preparasyon so ontulong ed sikatayon ipatnag so personal ya interes ed arum diad ontan et napaaligwas so panangipresenta tayo ed maong a balita.