Pabulaslasen so Apresasyon Da ed Agnaparaan Iran Kalidad nen Jehova
1 Diad ministeryo tayo, agtayo lambengat ibangat ed arum iray katuaan na Biblia, noagta tulongan tayo met so totoo a makapikabat ed si Jehova bilang persona tan pabulaslasen so apresasyon da ed agnaparaan iran kalidad to. Sano naaralan na saray matuan-impanpuso so katuaan nipaakar ed Dios, aralem so epekto na satan ed sikara tan napakiwas ira a manggawa na pananguman ed bilay da ta pian ‘mankurang ira a makana ed Katawan ya onarap a makapaliket.’—Col. 1:9, 10; 3:9, 10.
2 Say Balon Katulongan Tayo ed Panangiyaral: Manlapu la’d gapo, ipapaimano na libron Ibabangat na Biblia iray kalidad nen Jehova. Eebatan na sankaunaan a kapitulo iray tepet a: Peteg kasin iyaansakit ka na Dios?, Anto so inkapersona na Dios?, tan Posible kasi so onapit ed Dios? Ipapabitar met na satan a kapitulo so kasantosan nen Jehova (par. 10), say inkahustisya tan panangabagey to (par. 11), say panangaro to (par. 13), say pakayari to (par. 16), tan say panangasi, maong a linawa, inkamabulos ton mamerdona, inkaanos, tan katooran to (par. 19). Satan so sinegek na parapo 20: “Diad lalon pakakaaral mo nipaakar ed si Jehova, sikato so lalon magmaliw a tudtua ed sika tan sika so lalon napakiwas a mangaro ed sikato tan naliknam ya onapit ka ed sikato.”
3 Panon tayon usaren so libron Ibabangat na Biblia ta pian natulongan iray iyaaralan na Biblia ya onapit ed si Jehova? Kayari tayon konsideraen so sakey a parapo a mangipapabitar ed sakey ed saray kalidad na Dios, nayarin oniay itepet tayo ed iyaaralan, “Anto so naaralan mo ed saya nipaakar ed si Jehova bilang persona?” odino “Panon ya ipapabitar na saya so interes na Dios ed sikan mismo?” Diad sagpaminsan a pangusar ed saratan a tepet legan na panagaral, nibangat tayo iray iyaaralan a manmotektek ed nanaaralan da tan natulongan tayo iran ombulaslas ed apresasyon da ed agnaparaan iran kalidad nen Jehova.
4 Usaren so Kahon Parad Repaso: Diad sampot na kada kapitulo, pakomentoan ed iyaaralan so kada punto ed kahon a “No Anto so Ibabangat na Biblia.” Ipaimano ed sikato iray akasitas a teksto. Ta pian nasagyat so iyaaralan a mangibalikas ed nalilikna to, oniay nayarin itepet yo no maminsan, “Anto so nikuan mo ed ibabangat na Biblia nipaakar ed sayan punto?” No ontan so gawaen yo, agyo lambengat nidadanet iray manunan punto na kapitulo noagta malinew yo met a natetebek so peteg a papanisiaan na iyaaralan. Satan so ontulong ed iyaaralan pian nabayuboan to so relasyon ed si Jehova.