Branch Letter

Pinabli Iran Manangipalapag na Panarian:

Maliket min ipaamta ed sikayo a nen imbeneg a taon et atuop tan nilira la so balon Hantscho web rotary press diad Bethel ed Quezon City.

Nen Agosto 11, 2005, satan a balon panag-imprintaan a nanlapud Mexico so sinmabi dia ed sangan opisina. Say impantuop tan impangilira ed sayan makina so ginmapo nen Agosto 22, 2005, tan asumpal nen Disyembre 23, 2005. Pitoran agagin lalaki tan bibii a nanlapud Mexico tan anemiran agagi a nanlapud Colombia so tinmulong ed saray agagi dia pian tuopen tan paandaren so makina. Malikeliket so amin sanen say Pebrero 1, 2006 a Panag-Bantayan so primeron magasin a niyimprinta ed satan a makina.

Say kabelat na balon makina et 50 tonilada tan kinaukolan na satan so sementon pundasyon a say kakapal to et 35 sentimetro. Say karukey na makina et 28 a metro tan say kaatagey na satan et 4.39 a metro. Makapan-imprinta itan na 40,000 a magasin ed kada oras, a 12 magasin ed kada segundo. Say kabelat na kada rolyo na papel et manga 500 a kilo balet anggad 25 minuto labat so pangusar ed satan sano say andar na makina et wala la ed sankapelesan. Pian naikdan kayo na ideya no panon karakel a papel so nauusar pian niyimprinta iray magasin tayo, no unaten so amin a rolyo na papel ya inusar ed sakey a taon, mamiduan liberen na satan so interon dalin.

Nen Abril 2006, say kompleton bilang na magasin a nipalima et 873,198, say sankarakelan la. Mantultuloy itayo komon ed malaknab a panangibunog ed Say Panag-Bantayan tan Awake! legan na balon serbisyon taon. On, komon ta “mantultuloy tayon gawaen itan a lalon nagnap.”​—1 Tes. 4:1, NW.

Saray agagi yo,

Sangan Opisina ed Pilipinas