Apocalipsis—Asingger la so Engranden Kapantokan To!
1 “Mapalar so manbasa, tan saray ondengel ed sarayan salita na saya ya angipropetaan, tan unoren da so saray bengatlan wadman a nisulat: ta say panaon asingger la.” (Apo. 1:3) Ipapabitar na saratan a salita so kaimportantian na libron Apocalipsis, nagkalautla ta manbibilay itayo la ed aturon panaon a nasumpal so dakel ed saray propesiya na satan. Matukotukoy, gapoan tayo so panaral ed libron Apocalipsis—Asingger la so Engranden Kapantokan To! diad Panagaral na Kongregasyon ed Libro ya onggapo ed simba na Enero 8, 2007.
2 Nanlapu la’d samay unor ya impanaral tayo ed libron Kapantokan na Apocalipsis diad Panagaral na Kongregasyon ed Libro, dakel la so angumanan na eksena na mundo. (1 Cor. 7:31) Sakey ni, dakel ed saramay mangipupulong la natan ed maong a balita na Panarian so agnin balot akapinabang ed bersikulo-por-bersikulon panagaral ed libron Apocalipsis. Say panaral ed libron Kapantokan na Apocalipsis so nepeg a mamasiansia ed sikatayon amin ya aliing ed no antoy nagawa ed arapen.—Apo. 16:15.
3 Gawa yon kalat so pakaatendi kada simba. Sayan materyal so mamasiansia ed sikatayon akabantay. Ontan met, saray mensahe nen Jesus ed pitoran kongregasyon so ontulong ed sikatayon ompaliis ed saray kipapasen tan sirkumstansya a nayarin mangapektan maong ed espiritualidad tan pibibiang tayo ed ministeryo.—Apo. 1:11, 19.
4 Manparaan a Maong: Antis na kada panagaral ed libro, basaen niray bersikulo ed libron Apocalipsis ya analisaen. Imanoen so Makasulatan a panagkatunongan a mangipapaliwawa ed bersikulo. Panggunaetan a talosan iray manunan punto pian napakiwas so kapusoan yo. (Neh. 8:8, 12) Ipanaon so pandalepdep tan tepetan so inkasikayo: ‘Anto so ibabaga na saya nipaakar ed si Jehova tan ed pakasumpal na gagala to? Panon ak a makakiwas a mitunosan ed sayan gagala tan natulongan so arum?’
5 Siamaplo-tan-dua lan taon so apalabas nanlapud inggapo na “agew na Katawan” nen 1914. (Apo. 1:10) Saray makapabiglan tuloy ya ebento a nipasakbay ed Apocalipsis so asingsingger lan nagawa. Say panaral ed libron Kapantokan na Apocalipsis so mamaliing ed kapusoan tan nonot tayo tan mamabiskeg met ed pananisia tayo ya asingger la so “bakal na baleg ya agew na Dios a Makapanyarin-amin” tan say balon mundo.—Apo. 16:14; 21:4, 5.