Mangitarok na Saray Bendisyon so Maboluntaryon Espiritu
1. Panon ya impatnag di David tan Nehemias so maboluntaryon espiritu?
1 Sanen kinantiawan nen Goliat iray armada na Israel, sikatoy nayari komon a labanan na anggan siopa ed saraman a sundalo. Balet ta say namboluntaryo et sakey ya ugaw a lakin pomapastol, ya ag-anggan nipasal a mibakal. (1 Sam. 17:32) Sanen akapawil la’d Jerusalem iramay akautibon Judio balet ta sinmaew a mangipaalagey lamet ed padir na satan, namboluntaryo so sakey a managserbi alak ed ari na Persia a manaynan ed apribilehyoan a posisyon to ed palasyo tan manbaroy paonla’d Jerusalem pian organisaen itan a kimey. (Neh. 2:5) Namparan benendisyonan nen Jehova irayan lalaki, si David tan Nehemias, lapud espiritun impatnag da.—1 Sam. 17:45, 50; Neh. 6:15, 16.
2. Akin a nepeg a mangipatnag iray Kristiano na maboluntaryon espiritu?
2 Natan, say mundo so andian na maboluntaryon espiritu. Diad sarayan “kaunoran ya agew,” okupadon maong iray totoo, tan dakel so ‘maaro ed lamalaman da.’ (2 Tim. 3:1, 2) Alay inomay na too a nigalet ed saray personal ya interes to kanian agto la naiimano iray pankanawnawan iboluntaryo so serbisyo to sano kaukolan a tulongan so arum. Balet, bilang Kristianos, labay tayon aligen si Jesus a nambulon ya ontulong ed arum. (Juan 5:5-9; 13:12-15; 1 Ped. 2:21) Panon tayon nipatnag so maboluntaryon espiritu, tan antoran bendisyon so naawat tayo?
3. Panon a makakatulong ed saray pantitipon na kongregasyon so maboluntaryon espiritu?
3 Parad Pankaabigan na Saray Agagi Tayo: Makapanginabang itayo ed arum na “maespiritual a palangkap” diad pamboluntaryo tayon mankomento sano walaray parte ed pantitipon a kaukolan so pibiang na saray dumerengel. (Roma 1:11) Say panagkomento so mamagalang ed si Jehova, lalon mangipaslep na katuaan ed nonot tan puso tayo, tan pagmaliwen ton mas panggayagaan tayo iray pantitipon. (Sal. 26:12) Sarag tayo met so manboluntaryon mangipresenta ed sakey a parte diad Teokratikon Eskuelaan Parad Ministeryo sano nakaukolan so kasandi. Ontulong iya pian napaaligwas tayoy abilidad tayon manbangat.
4. Diad anto niran paraan a nipatnag tayo so maboluntaryon espiritu?
4 Nipatnag na saray agagin lalaki so maboluntaryon espiritu diad pandampot dan mangasikaso ed saray responsabilidad ed kongregasyon. (Isa. 32:2; 1 Tim. 3:1) Sarag na amin so ontulong pian napansiansian mantintinunus so kagawa na saray asamblea tan kombension diad pamboluntaryo ra ed nanduruman departamento. Sano manboluntaryo itayon mikimey ed ombiabiahen manangasikaso diad ministeryo odino mangitarya na tagano ed sikato, say resulta et ‘naligliwa [tan napabiskeg] so balang sakey ed sikatayo.’ (Roma 1:12) Sano mangiyopresi tayoy praktikal a tulong ed saray ulilan ugugaw, balo, saray mansasakit tan walaay deperensya’d laman, ina a walaan na angkekelag nin ananak, tan ed arum ni ed kongregasyon, naeksperiensya tayo so liket tan pabor nen Jehova.—Uli. 19:17; Gawa 20:35.
5. Antoran pamaakaran a mangilalanor ed Kingdom Hall so mankaukolan na maboluntaryon espiritu?
5 Say sananey nin paraan a niboluntaryo tayoy panaon tan sagpot tayo et diad itulong tayon manlinis tan manmantini ed Kingdom Hall. Niarum ni, lapud dakdakel so totoon onkakamang ed katuaan, ombabaleg so pankaukolan parad balo iran Kingdom Hall tan saray boluntaryo pian mangipaalagey ed saratan. Namboluntaryo so sakey a sanasawa ya ontulong ed Regional Building Committee ed lokal anggaman anggapoy dunong da ed panagpaalagey. Diad inlabas na panaon, nipasal so sanasawa tan natan et makakatulong lara ed panaglira na laryo. Oniay inkuan na asawan bii: “Nagmaliw kamin maaapit a sankakaaro lapud impantutulongan min mankimey. Tua, kayari sanagew et naksawan kami’d pisikal, balet arepreskoan kami ed espiritual.”
6. Akin a say ministeryo so sankaimportantian a kimey a napamboluntaryoan tayo?
6 Diad Panagpulong: Say sankaimportantian a kimey a napamboluntaryoan tayo natan et say panangipulong ed Panarian. Legan a natutulongan iray totoo a mantalos tan mangiyaplika ed simbawa na Biblia, sikaray nawawalaan na gagala ed bilay tan biskeg pian iwaklit iray makapuy iran ugali. Naaralan da ed Biblia so makapaligsan ilalo parad arapen. Diad pangitatarya tayoy edukasyon manlapud Biblia, magayaga tayon nagagawaan so makanan kimey a magnayon a pakagunggonaan na arum. (Juan 17:3; 1 Tim. 4:16) Ompan iyabuloy na kipapasen tayo so malaglaem a pakapibiang tayo ed sayan kimey diad pan-auxiliary odino pan-regular payunir, diad iyalis ed babaleg so pankaukolan, odino diad panaral na arum a lenguahe.
7. Akin a nagkalautlan importante natan so pamboluntaryo?
7 Impropesiya nen Arin David a diad panaon ya igapo na Mesias a manuley, ‘yapay na [saray totoo na Dios] so inkasikara a mabulbulos.’ (Sal. 110:3) Papepelesen nen Jehova so pinal ya espiritual a panagani, kanian dakel a kimey so napamboluntaryoan tayo. (Isa. 60:22) Nibaga yo ta lay: “Wadia ak; ibaki mo ak”? (Isa. 6:8) On, diad pangipatnag tayo na maboluntaryon espiritu, napaliket tayo si Jehova tan manani itayo na daakan iran langkap.