‘Andi-takot a Salitaen so Salita na Dios’
1 Kasin no maminsan et masuyat yon itongtong so nipaakar ed pananisia yo sano naikdan kayo na pankanawnawa diad eskuelaan odino diad pantratrabahoan yo? Kasin nairapan kayon mantasi ya impormal ed saray kakanayon tan kakaabay yo odino ed saray agyo kabat? Antoy ontulong ed sikatayon amin pian naanamot so matukoy iran pankanawnawan ‘andi-takot a salitaen so salita na Dios’?—Fil. 1:14.
2 Agpupugeran so Pansalita: Kasin masuyat yon idepensa so sakey a maapit a kaaro odino kanayon a palso so inyakusa ed sikato? Si Jehova, say sankaapitan a Kaaro tayo, so nilibolibon taon lan pirmin papaugesen. Walaan itayo na nikadkaduman pribilehyo a tasian so matalonggaring a Dios tayo! (Isa. 43:10-12) Say aralem a panangaro ed si Jehova so ontulong ed sikatayon natalonaan so pakababaingan odino pakatatakot tan managdag ed sikatayon mansalitan makpel, ya agmasuyat a tasian so katuaan.—Gawa 4:26, 29, 31.
3 Tandaan a say mensahe tayo et maong a balita. Saramay ontalineng ed satan so makagamor na magnayon iran gunggona. Say pangiyapasakey ed kablian na panagpulong a kimey imbes a diad inkasikatayo odino ed saray onsusumpa ed sikatayo so ontulong ed sikatayon manpulong a makpel.
4 Ehemplo na Arum: Napabiskeg itayo na inkamatoor na totoon andi-takot ya angipasabi ed salita na Dios. Alimbawa, makpel ya inyabawag nen Enoc so panangukom nen Jehova sumpad agmaridios iran managgaway kasalanan. (Jud. 14, 15) Matoor a nampulong si Noe ed saray totoo ya agmangisengansengan. (Mat. 24:37-39) Saray Kristiano nen inmunan siglo ya ‘andian na aral tan kabanyakan’ odino ordinaryo so nantultuloy a nampulong anggaman pirmin sinumpa. (Gawa 4:13, 18-20) Say Panag-Bantayan tan Awake! so mabetbet a pakaromogan tayo na saray estorya ed bilay ed panaon tayo nipaakar ed saramay nanmatoor ed si Jehova tan tinalonaan day takot ed too tan nagmaliw a maseseg a managpulong.
5 Makapanpakpel itayo met diad pannonot ed kurang na bilay na matoor iran lingkor nensaman a nipapaarap ed mairap iran situasyon natan. (1 Ara. 19:2, 3; Mar. 14:66-71) “Pinabiskeg na Dios so linawa” ra tan andi-takot iran nansalita. Kanian nagawaan tayo met itan!—1 Tes. 2:2, Maung a Balita.