Mantultuloy a “Manbunga na Dakdakel”

¹ Inyaliling nen Jesus so inkasikato bilang tuan ubasan, say Ama to ed sakey a Managtanaman, tan saray alanaan na espiritu a papatumbok to ed mabunga iran sanga na ubasan. Diad panedeskribe ed kimey na simbolikon Managtanaman, indanet nen Jesus so kaimportantian na pansiansian aka-sangan malet ed ubasan. (Juan 15:1-4) Say leksion et siopaman a walaan na maabig a personal a relasyon ed si Jehova et nepeg a singa mabungan sanga na ‘tuan ubas,’ si Jesu-Kristo. Nepeg a mantultuloy itayon mamawala na daakan a “bunga na espiritu” tan bunga na Panarian.​—Gal. 5:22, 23; Mat. 24:14; 28:19, 20.

² Bunga na Espiritu: Say iyaaligwas tayo ed espiritual so nasukat nagkalalo la diad pangipapatnag tayo ed saray bunga na espiritu. Kasin pambabanikelan yon bayuboan iray bunga na espiritu na Dios panamegley na regular a panagaral tan panagdalepdep ed Salita na Dios? (Fil. 1:9-11) Lawas ipikasi so masanton espiritu, a mamawala ed sikayo na saray kalidad a mangigloria ed si Jehova tan ontulong ed sikayon mantultuloy ya onaligwas ed espiritual.​—Luc. 11:13; Juan 13:35.

³ Say pamayubo ed bunga na espiritu so ontulong met ed sikatayo a magmaliw a maseseg a ministros. Alimbawa, say panangaro tan pananisia so mamakiwas ed sikatayon mangigana na panaon ed okupadon eskedyul tayo pian regular a mibiang ed ministeryo. Saray kalidad a singa say deen, andukey a panag-anos, kaabigan, kauyamoan, tan dangka so ontulong ed sikatayon onkiwas na duga ed saray onsusumpa. Say gayaga so ontulong ed sikatayon nalikna so inkapnek ed ministeryo anggan sano ag-interesado iray totoo.

⁴ Bunga na Panarian: Labay tayo met so mamawala na bunga na Panarian. Laktipen na satan so ‘pangisaklang tayo ed Dios a naynay na bagat a panangidayew, salanti, say bunga na saray bibil a mangiwakawak na ngaran [nen Jehova].’ (Heb. 13:15) Gagawaen tayo iya panamegley na maseseg tan mantultuloy a pangiyabawag ed maong a balita. Kasin panggugunaetan yoy mamawala na dakel nin bunga na Panarian diad pamapaaligwas yo ed ministeryo yo?

⁵ Impabitar nen Jesus a saray matoor a papatumbok to et mamawala na nanduruman karakel na bunga. (Mat. 13:23) Kanian, agtayo ikokompara so inkasikatayo ed arum noagta iter tayoy sankaabigan tayo ed si Jehova. (Gal. 6:4) Say matuan pangusisa ed personal iran sirkumstansya tayo diad tulong na Salita na Dios so ontulong ed sikatayon mantultuloy a mangigloria ed si Jehova diad ‘pambunga na dakdakel.’​—Juan 15:8.