“Maliket so Too a Mantultuloy a Mansungdo ed Subok”
1 Amin a Kristiano so ondalan ya ondalan ed subsubok. (2 Tim. 3:12) Nayarin pakasubokan tayo so ileletey na laman, irap na bilay, tukso, panamasegsegang, odino arum ni ra. Saray ipapasagmak nen Satanas a subsubok so inggetman mamatayer ed sikatayo, pian napaulyanan tayo so ministeryo tayo bilang Kristiano, odino pian sikatayo ni ingen so ontunda a manlingkor ed Dios. (Job 1:9-11) Panon a say pansungdo ed saray subsubok et manresulta ed liket?—2 Ped. 2:9.
2 Iparaan Yoy Inkasikayo ed Subsubok: Inter nen Jehova ed sikatayo so matua a Salita to, pati say rekord na bilay tan bangabangat nen Jesus. Diad italineng tan itulok ed saray bilin nen Jesus, makapangiletneg itayo na putel a pundasyon, diad ontan et akaparaan itayo ed saray kairapan. (Luc. 6:47-49) Napapabiskeg itayo met na arum niran tulong, salanti, saray agagi tayo, saray aral ed kongregasyon, tan saray nibase’d Biblia a publikasyon a manlalapud matoor tan makabat ya aripen. Sakey ni, mabetbet itayon manpipikasi; satan so regalo na Dios ed sikatayo.—Mat. 6:13.
3 Inikdan itayo met nen Jehova na ilalo. Sano pabiskegen tayon maong so pananisia tayo ed saray sipan nen Jehova, say ilalo tayo et magmamaliw a “sakey a nailaloan tan malet a pataga na kamarerwa.” (Heb. 6:19) Nensaman lan panaon et agbalot onalis ed pier iray barko no anggapoy pataga odino ankla ra, anggano marakep ni so tiempo. No kaleganan a manlalayag et biglan ombagyo, ipepelag so ankla pian ag-itan ombasig ed angkakabaleg a bato. Mipadpara ed satan, no pabiskegen tayo natan so pananisia tayo ed saray sipan na Dios, satan so manbalanse ed sikatayo sano ondalan iray singa bagyon problema. Saratan so nayarin bigbiglan onsabi. Sanen nampulong si Pablo tan Bernabe ed Lystra, diad gapo et sikaray inawat na totoo, balet, biglan anguman so situasyon sanen sinmabi iray sumpa a Judio.—Gawa 14:8-19.
4 Manresulta ed Liket so Panagsungdo: Diad pantultuloy tayon pampulong anggaman nasusumpa, nawalaan itayo na kareenan na nonot. Maliket itayo no nibilang itayon manepeg a nabaingan nisesengeg ed si Kristo. (Gawa 5:40, 41) Say pansungdo ed saray subsubok so ontulong ed sikatayo pian nagkalalon nabayuboan iray kalidad a kapaabebaan, katutulok, tan panag-anos. (Deu. 8:16; Heb. 5:8; Sant. 1:2, 3) Ibangat itayo na satan ya onsaral ed si Jehova, manmatalek ed saray sipan to, tan manpasalimbeng ed sikato.—Uli. 18:10.
5 Amta tayo a saray subsubok et temporaryo labat. (2 Cor. 4:17, 18) Saratan so mangiiter ed sikatayo na pankanawnawa a mangipanengneng ed kabaleg na panangaro tayo ed si Jehova. No sungdoan tayo iratan, naebatan tayo iray akusasyon nen Satanas. Kanian, ag-itayo onsusuko! “Maliket so too a mantultuloy a mansungdo ed subok, lapud no sikatoy naabobonan et awaten to so korona na bilay.”—Sant. 1:12, NW.