Pablien Tayo Iray Pribilehyo Tayo!
1 Nanlapu la’d inkiwala na too, nanduruma lan pribilehyo so impagamor nen Jehova ed saray lingkor to. Inikdan to ira na saray pribilehyo, laki man ira odino bii, antokaman so edad da, odino kipapasen na panagbilay da. (Luc. 1:41, 42; Gawa 7:46; Fil. 1:29) Antoran pribilehyo so iiter to met ed sikatayo natan?
2 Arum ed Saray Pribilehyo Tayo: Say pangibabangat nen Jehova ed sikatayo et sakey a pribilehyo. (Mat. 13:11, 15) Say pangidayew ed si Jehova panamegley na pankomento tayo legan na saray aral et sananey nin pribilehyon papablien tayo. (Sal. 35:18) No walaan itayo na pankanawnawan mankomento, magunaet tayon gagawaen itan. Mipadpara, no ipapasen tayoy asainmin tayo ed kongregasyon bilang pribilehyo, sumpalen tayo itan ed anggaay nayarian tayo. Kasin regular itayon mibibiang ed pribilehyo a pansiansiaen a malinis tan namimintinan maong so Kingdom Hall?
3 Anggaman panduaruwaan na minilyon no kasin dedengelen na Dios iray pikakasi ra, panliliketan tayoy pribilehyon dedengelen na sankaimportantian a Persona ed uniberso iray pikakasi tayo. (Uli. 15:29) Si Jehova so personal ya ondedengel ed pikakasi na saray lingkor to. (1 Ped. 3:12) Agto lilimitaan no panon kabetbet so iyasingger tayo ed sikato. Agaylan pabpablien a langkap so pakapampikasi tayo ed “amin a panaon”!—Efe. 6:18.
4 “Kakimeyan na Dios”: Say pangiyabawag ed maong a balita na Panarian na Dios et sakey ed saray sankaabigan a pribilehyo tayo bilang “kakimeyan na Dios.” (1 Cor. 3:9) Sakey iyan kimey a makapenek tan makapaligsa. (Juan 4:34) Anggan ag-usaren nen Jehova so too et nasumpal iyan kimey, balet ta inter to ed sikatayo iyan asainmin lapud inaro to itayo. (Luc. 19:39, 40) Agbasta iiter nen Jehova iyan pribilehyo ed anggan siopa. Saramay mibiang ed ministeryo so nepeg a mantultuloy a makadampot ed saray espiritual a kualipikasyon. (Isa. 52:11) Kasin ipapanengneng tayo a papablien tayo iyan pribilehyo diad pangipapasen tayo ed ministeryo bilang importantin kabiangan na sinimban rotina tayo?
5 Saray pribilehyon iiter nen Jehova so pakapepenekan na bilay tayo. (Uli. 10:22) Agbalot melmelagen iratan! Diad pangipanengneng tayo a talagan papablien tayo iray pribilehyo tayo ed serbisyo, napapaliket tayoy mangatatawen ya Ama tayo, say Manangiter na “amin ya ayadyarin palangkap.”—Sant. 1:17.