Balon Programa ed Agew na Espisyal ya Asemblea

Say tema na programa ed agew na espisyal ya asemblea parad 2008 et nibase ed Isaias 64:8: ‘Pitek Itayo​—si Jehova so Domadamili.’ Say Makasulatan a panamilin ya intarya panamegley na sayan programa so mamaaralem na apresasyon tayo ed kakabatan, inkahustisya, pakapanyari, tan aro nen Jehova bilang Matalonggaring a Domadamili.

Ipabitar na paliwawa na manangasikaso na sirkito a, “Manlilingkor ed Ministeryo Bilang Saray Basehan Kirayewan,” no panon a say ondarakel a bilang et makakaawat na daakan a bendisyon diad pakakaamta ra ed katuaan tan panginanabang da ed satan. Iparungtal na paliwawan “Say Panagdalepdep so Manalimbeng ed Sikayo” no panon a say panmolimoli ed saray matunong a prinsipyo nen Jehova so manalimbeng ed sikatayo. Ipaliwawa na bisitan espiker so teman “Agkayo Miabobon Unong ed Sayan Mundo” tan “Pamoldi ed Matalonggaring a Domadamili.” Napaseseg iray atateng tan kalangweran ed saray paliwawan “Saray Kalangweran a Mausausar ed Kinen Jehova” tan “Importante so Betang na Atateng ed Pakamoldi na Ananak.” Diad panamegley na saray demostrasyon tan interbio, maliket itayon makarengel tan makaimaton ed nagagawaan na saray agagi tayo ed ministeryo. Saramay manpirawat a mangisimbolo na dedikasyon da ed Dios panamegley na bautismo ed danum so nepeg a masakbay lan mangipaamta ed mangidadaulon manangasikaso. Seguroen yon awiten so kopya yon Say Panag-Bantayan ya aralen ed simba na agew na espisyal ya asemblea.

Sumpalen na Matalonggaring a Domadamili so antokaman a gagala to. Balet depende ed balang sakey ed sikatayo no panoy ikiwas tayo ed pamoporma to ed sikatayo. Saramay makabat a manpasakop ed saray estandarte tan panagpino nen Jehova, bilang pitek ed panagdamilian na domadamili, et namoldi, napino, tan magmaliw a mausar iran baseha. Sano mikoopera itayo ed si Jehova, nigloria tayoy inkasoberano to tan makagamor itayo na dakel a bendisyon.