Pampapasesegan na Amin
1. Anton mataltalag a pankanawnawa so itatarya na ibibisita na saray ombiabiahen manangasikaso?
1 Oniay insulat nen apostol Pablo ed kongregasyon na Roma: “Pampirawatan ko so pakanengneng ko ed sikayo, pian nipanabang ko ed sikayo so maespiritu a palangkap, pian napaletan kayo. Salanti, dia ed abay yo naligliwa ak ed sikayo, balang sakey ed sikatayo ed pananisia na sananey, say pananisia yo, tan say pananisiak.” (Roma 1:11, 12) Diad sayan panaon, say ibibisita na saray ombiabiahen manangasikaso so lapuan met na ontan a pankanawnawan makapanpapasesegan.
2. Akin a masakbay ya iyaanunsio so ibibisita na manangasikaso na sirkito?
2 Say Kongregasyon: Say ibibisita na mangasikaso na sirkito so kaslakan lan iyaanunsio ed kongregasyon manga taloy bulan antis na isabi to. Diad ontan et magenap so panaon tayon niyarunsa so eskedyul tayo pian sigpot a nagunggonaan. (Efe. 5:15, 16) No mantratrabaho kayo, ompan sarag yoy onkerew na bakasyon pian makapanpulong legan na satan a simba. Saray arum et man-o-auxiliary payunir legay bulan na bisita. No plano yoy manbakasyon, nayari yo kasin umanen so eskedyul yo pian wadtan kayo legan na bisita?
3. Antoy personal a nagawaan tayo legan na bisita pian sikatayoy napaseseg?
3 Say manunan gagala na ibibisita na manangasikaso na sirkito et pian personal a mamaseseg tan mangipasal ed sikatayo diad lawak na ministeryo. Nayari ta’n manpalista kayo a mikimey ed sikato odino ed say asawa to? Kalkaliktan na manangasikaso na sirkito so mikimey ed nanduruman agagi, pati ed saramay aliwan tanton eksperiensyado odino ed saramay labay day onaligwas ed ministeryo. Amin so makaaral ed presentasyon to, tan nayari dan iyaplika so antokaman a makaaron suhestion to. (1 Cor. 4:16, 17) Sakey nin pankanawnawa parad makapaseseg a panlilimog et say pangimbita ed sikato a midungo ed sikatayo. (Heb. 13:2) Lapud saray paliwawa to et intukoy unong ed saray pankaukolan na kongregasyon, talinengen itan a maong.
4. Panon tayon napaseseg so manangasikaso na sirkito tayo?
4 Say Manangasikaso na Sirkito: Anggapoy pidumaan nen apostol Pablo ed saray agagi a nanlingkoran to. Sikatoy akasagmak met na kairapan tan gonigon, kanian kaukolan to so panamaseseg tan akisalamatan to itan. (2 Cor. 11:26-28) Sanen nadngelan na kongregasyon ed Roma a natuloy lan siansia so iyakar ed sikara nen Pablo, a diad saman et sakey a priso, nambiahe ira na 74 kilometro pian sikatoy abeten ed Tindaan na Appio! “Nen anengneng to ra nen Pablo, akisalsalamat ed Dios, et binmiskeg so linawa to.” (Gawa 28:15) Mipadpara ed satan, napaseseg yo met so manangasikaso na sirkito yo. Iter ed sikato so “mamiduan dayew ” odino galang panamegley na maligsan panuporta ed ibisita to. (1 Tim. 5:17) Ibalikas tan ipanengneng so masimoon a panangapresya ed pansasagpot to parad sikayo. Sikato tan say asawa to so naliketan no naimatonan day pananisia, panangaro, tan panagsungdo yo.—2 Tes. 1:3, 4.
5. Akin a kaukolan tayon amin so panamaseseg natan?
5 Diad sarayan “panaon a maatap” a mairap a pidenengan, siopa ed sikatayo so agmankaukolan na panamaseseg? (2 Tim. 3:1) Desidien la natan so sigpot a pibiang ed espisyal a sakey simban kimey a kaiba so manangasikaso na sirkito. Amin tayo, balang lan ombiabiahen manangasikaso odino manangipalapag, so makapibiang ed makapaliket a pampapasesegan. Diad ontan met et “manbibilinan so sakey tan sakey, tan manpapaalageyan so sakey tan sakey” ed sikatayo.—1 Tes. 5:11.