Walay Niiter Tayo ed si Jehova
1 Kasin amta yo a walay niiter na totoo ed Dios? Si Abel so angibagat na pigaran mablin ayayep ed si Jehova, ontan met so ginawa nen Noe tan Job. (Gen. 4:4; 8:20; Job 1:5) Siempre, saratan a bagat et agmamayaman ed Manamalsa lapud kayarian ton amin a bengatla. Balet saratan so pakapatnagan na aralem a panangaro ed Dios na saraman a matoor a totoo. Natan et nayarian tayon usaren so panaon, biskeg, tan saray kayarian tayo diad pangiter ed si Jehova na “bagat a panangidayew.”—Heb. 13:15.
2 Panaon: Talagan maabig so ‘pangaliw’ na panaon ed agtanto importante iran bengatla pian nagkalalon makapibiang ed ministeryo! (Efe. 5:15, 16, NW) Nayarin umanen tayoy eskedyul tayo pian makapan-auxiliary payunir ed sakey odino onsulok ni iran bulan ed sakey taon. Nayarin aruman tayo ni so oras tayo ed panagpulong. No ipaot tayo ni na 30 minuto kada simba, naaruman so oras ya uusaren tayo ed ministeryo na anggad duaran oras ed sakey bulan!
3 Biskeg: Pian nawalaan itayo na magenap a biskeg ed panagpulong, kaukolan tayon paliisan so makapakesaw a panagligliwaan tan trabaho a sengeg na agtayo pakapangiter ed si Jehova na sankaabigan tayo. Kaukolan tayo met ya ipulisay iray kapagaan a “mamatuek” ed puso tayo tan manamsam na biskeg tayo a nausar tayo komon ed panaglingkor ed Dios. (Uli. 12:25) Anggaman makatunongan so pampaga tayo, agaylan magmaong so ‘pangipawit ed si Jehova na awit tayo’!—Sal. 55:22; Fil. 4:6, 7.
4 Kaykayarian: Niiter tayo met so materyal iran kayarian pian nausar ed panagpulong. Pinaseseg nen Pablo iray kapara ton Kristiano a regular a “mangibiig” pian walay niiter da ed saramay mankaukolan. (1 Cor. 16:1, 2) Mipadpara, nayarian tayo met so mangigana na kuarta pian idonasyon parad pankaukolan na kongregasyon ontan met ed sankamundoan a kimey. Papablien nen Jehova so impapuson niiter tayo, anggano melag labat itan.—Luc. 21:1-4.
5 Dakel so ipapagamor nen Jehova ed sikatayo. (Sant. 1:17) Ipapatnag tayoy panamabli tayo panamegley na mabunlok a pangiter na panaon, biskeg, tan arum niran kaykayarian tayo pian manlingkor ed sikato. Napaliket tayo si Jehova ed panggawa tayo ed satan, lapud “aroen to so sililiket a mangiter.”—2 Cor. 9:7.