Ibangat so Arum a Mangaro ed si Jehova

1. Anto so akasagyatan na arum ed si Jehova?

¹ Kasin nanonotan mo ni so inmunan impakadngel mo nipaakar ed si Jehova? Anto so akasagyatan mo ed sikato? Dakel a matuan impanpuson totoo so mangibaga ed sikayo a sikaray apaapit ed Manamalsa tayo sanen naaralan da iray agnaparaan iran kalidad to, nagkalalo la ed panangabagey tan panangaro to.​—1 Juan 4:8.

2, 3. Panon tayon nausar so libron Ibabangat na Biblia pian tulongan iray iyaaralan na Biblia ya onelet so panangaro ra ed si Jehova?

² “Saya Sikato so Dios Tayo”: Say libron Ibabangat na Biblia so mangidadanet ed panangaro nen Jehova tan ed pankaukolan na personal a relasyon ed sikato. Panon tayon nausar iyan publikasyon pian bangatan so arum ya onelet so panangaro ra ed Dios? Sano tutukoyen so sakey a balon punto, nayarin mangitepet itayo na pannonotan na iyaaralan, a singa say: “Anto so ipaparungtal na sayan katuaan nipaakar ed si Jehova?” odino “Diad antoran dalan a sayan punto so mamapaneknek a si Jehova et sankaabigan ya Ama a pirawat na siopaman?” Say pambangat ed onian paraan so makatulong ed iyaaralan ya onggapo ed legay bilay a relasyon to ed si Jehova.

³ Sano tutulongan tayo iray iyaaralan na Biblia a namoria ran sakey a pribilehyo so pakagamor na pikakabat ed saksakey a tua tan mabilay a Dios, diad ontan et bidbiren da, unong ed inkuan nen Isaias: “Saya sikato so Dios tayo.” (Isa. 25:9) Sano ipapaliwawa so Salita na Dios, kaukolan tayon ipurek no panon a nabendisyonan so katooan diad pakasumpal ed saray gagala nen Jehova panamegley na Panarian to ed silong nen Kristo Jesus.​—Isa. 9:6, 7.

4, 5. Antoy kabaliksan na panangaro ed si Jehova?

⁴ Paneknek na Panangaro Tayo ed si Jehova: Amta tayo a say pangaro ed si Jehova ed interon puso, kamarerwa, tan nonot so mangilalanor ed mas ni nen say pakawalaan na mabiskeg iran liknaan ed Dios. Nepeg tayon tumboken tan talinengen so paraan na panagnonot to. (Sal. 97:10) Say panangaro ed Dios so napatnagan diad itulok ed amin a ganggan to tan mantultuloy a mibiang ed “amin a masantos a panagbilay tan kasimpitan,” anggaman ed saray subok tan isusumpa.​—2 Ped. 3:11; 2 Juan 6.

⁵ Makapaliket so panggawa ed linawa na Dios lapud panangaro tayo ed sikato. (Sal. 40:8) Nepeg a namoria na iyaaralan na Biblia ya amin a ganggan na Dios et parad magnayon a pankaabigan na saray lingkor To. (Deu. 10:12, 13) No unoren na sakey so panangiwanwan nen Jehova, ipapatnag toy aralem ya apresasyon to ed amin ya alay abig iran kimey To. Tulongan so iyaaralan a natalosan to a say panakar ed saray matunong a dalan nen Jehova so mangipaliis ed sikato ed dakel a problema.

6. Antoran bendisyon so naawat na sakey lapud panangaro to ed si Jehova?

⁶ Bendisyon Parad Saramay Mangaaro ed Dios: Iyaansakit nen Jehova iramay mapaabeba a mangaaro ed sikato, tan ipaparungtal to ed sikara ‘iray aralem a bengatla na Dios.’ (1 Cor. 2:9, 10) Tekep na satan a pikakabat ed saray gagala nen Jehova, walaan ira na malinew a panmoria ed arapen tan seguradon ilalo. (Jer. 29:11) Saramay mangaaro ed si Jehova so tomatawir na nikabkabiig a kaabigan to. (Exo. 20:6) Papablien da so ilalon andi-anggaan a bilay lapud baleg a panangaro na Dios ed sikara.​—Juan 3:16.

7. Antoy liknaan yo nipaakar ed pangibangat ed arum a mangaro ed si Jehova?

⁷ No lalo tayon nakabat so mangatatawen ya Ama tayo, lalo tayon itongtong itan ed arum. (Mat. 13:52) Agaylan baleg a kagalangan so pangibangat ed arum, tan nagkalalo la ed ananak tayo, a mangaro ed si Jehova! (Deu. 6:5-7) Komon ta sikatayo, pati saray iyaaralan tayo na Biblia, so mantultuloy a mapalalo ed panagdayew legan tayon naeeksperiensya so ‘abalbaleg a kaabigan nen Jehova.’​—Sal. 145:7.