Nasarag Moy Manbangat!
1. Walaan so balang manangipalapag na anton nikadkaduman pribilehyo?
1 Say sakey ed saray makapalikliket ya aspekto na ministeryo et say pangibangat na katuaan ed sakey a too. No nanenengneng tayo a sikatoy onkikiwas la ed mensahe na Panarian tan natutulongan tayon napaasingger ed Soberano na uniberso, talagan napapaseseg itayo. (Sant. 4:8) Nepeg a kalat na balang manangipalapag na Panarian so pambangat ed sakey a toon nanaerasan ed katuaan tan imatonan so igapo ton manggawa na importante iran pananguman ed personalidad, panmoria, tan kondukta to.—Mat. 28:19, 20.
2. Akin et talawan so arum a mangikondukta na panangiyaral na Biblia, tan anto so ontulong ed sikara pian natalonaan itan?
2 Ompapeg ed si Jehova: Nensaman, walaray matoor a lingkor ya inisip dan agda sarag so ipapagawa nen Jehova ed sikara, singa di Moises, Jeremias, Amos tan arum niran ordinaryo labat a totoo. Ingen, lapud impapeg da ed si Jehova a Dios, atalonaan da iray duaruwa odino nalilikna ran agda pakasarag, tan agawaan daray aliwan bastabastan asainmin da. (Exo. 4:10-12; Jer. 1:6, 7; Amos 7:14, 15) Anggan si apostol Pablo met et “apabayani” odino apabiskeg so liknaan to. Panon? Inkuan ton lapu “ed Dios tayo.” (1 Tes. 2:2) On, makapanmatalek itayon amin ya ikdan itayo nen Jehova na nakaukolan tayon tulong, dunong, tan biskeg pian magmaliw a mabunga iray panangiyaral tayo na Biblia.—Isa. 41:10; 1 Cor. 1:26, 27; 1 Ped. 4:11.
3, 4. Anton panangipasal so nitarya pian ontulong ed sikatayon mangibangat na Salitay Dios?
3 Awaten so Panangipasal: Pian magmaliw itayon epektibon managbangat, ipapasal itayo na Matalonggaring ya Instruktor tayo a si Jehova a Dios, panamegley na regular a programa na espiritual ya edukasyon. (Isa. 54:13; 2 Tim. 3:16, 17) Awat yo iyan panangipasal diad panggawa yoy anggaan na nayarian yo kapagno walaray pankanawnawa yon napaaralem so pakatalos yo ed Kasulatan tan napaaligwas so abilidad yon mangibangat na saray katuaan ed Biblia. Saya so manunan gagala na Teokratikon Eskuelaan Parad Ministeryo tan Pantitipon Parad Serbisyo, ingen ta amin a pantitipon na kongregasyon et mangipapasal ed sikatayon manbangat base ed Salita na Dios.
4 Pampelengan yon aralen ya ibangat ed simplin paraan so anggan saray aralem lan espiritual a katuaan. Onia so impaliwawa na libron Eskuelaan Parad Ministeryo, pahina 227: “Nepeg a natalosan mon malinew so suhetom pian nagawaan mon natalosan na arum.” Say panagkomento legan na aral so ontulong ed sikatayo pian mas natandaan tayo iray manunan punto a nausar tayo ed arapen. Manparaan kayo sirin a maong pian ombaleg so kompiyansa yo ed abilidad yon manbangat.
5. Diad kongregasyon, anto niran kaaruman a panangipasal so ontulong ed sikatayon onaligwas ed panagbangat?
5 Anggan sanen saman, andi-duaruwan makakaaral ed sakey tan sakey iray Kristianon ministro diad paniiba ra ed kimey a panaggaway babangatan. (Luc. 10:1) No nayadyari, miulop kayo ed saray eksperiensyado lan manangipalapag, payunir, elder, tan ombiabiahen manangasikaso, diad kimey a panangiyaral na Biblia. Imano yo no panon dan uusaren iray walad iyaaral tayon publikasyon a simplin ilustrasyon, litrato, tan arum nira, pian ipaliwawa iray Makasulatan a katuaan. Kerew kayoy suhestion da no panon yo nin napaaligwas so panagbangat yo. (Uli. 1:5; 27:17) Apresya yo itan a panangipasal a manlalapud sarayan agagin lalaki tan bibii, lapud diad tua, say Dios so panlalapuan na satan.—2 Cor. 3:5.
6. Anto so nakaukolan pian magmaliw a managbangat na Salita na Dios?
6 Ompapeg ed si Jehova, tan pagunggonaan ed itatarya ton panangipasal. Ipikasim ya onaligwas ka komon. (Sal. 25:4, 5) Sarag mo met a naeksperiensya so liket na panulong ed arum a magmaliw a managbangat na Salita na Dios a singa sika!