Uusaren Yo Kasi so Reasoning?
1. Panon so impanbangat nen apostol Pablo tan nen Jesus?
1 Nanggunaetan nen apostol Pablo so ‘mankatunongan manlapud Kasulatan.’ (Gawa 17:2, 3; 18:19, NW) Diad satan et inalig to si Jesus a naynay ya angaon ed Kasulatan tan angusar na saray ilustrasyon pian natulongan iray dumerengel to a natalosan so linawa na Dios. (Mat. 12:1-12) Say libron Reasoning From the Scriptures et denesinyo pian ontulong ed sikatayo a nagawaan met so ontan.
2. Panon tayon nausar so Reasoning pian makapangiparaan na saray epektibon introduksion?
2 Panagparaan na Saray Epektibon Introduksion: Say libron Reasoning From the Scriptures et walaray lugan ton makapainteres ya introduksion diad pahina 9-15. No makaaral kay nanduruman introduksion tan usaren mo iratan, lalo la no atatek lay teritorya yo, naaruman iray estilom ed ministeryo tan natulongan kan mas ontukoy-tukoy tan magmaliw a mas epektibo ed panangigapoy tongtongan. Sarag ton direktan aligen iray introduksion manlapud sayan libro sano manpupulong panamegley na telepono odino sano mitotongtong panamegley na intercom diad saray bilding a mapegpeget so seguridad.
3. Anto so walad pahina 16-24 na Reasoning ya ontulong ed sikatayo diad ministeryo?
3 Panalona ed Saray Manamatunda na Tongtongan: Akin ya agnonoten nin unona no anto kasi iray nayarin ibaga na saray unabung a mamatunday tongtongan, tan antis kayon onlan manpulong et repasoen yo nin magano so pahina 16-21 parad posible iran ebat? Wala kasi ed sikara so Budista, Hindu, Judio, odino Muslim? No on, makatulong so impormasyon a walad pahina 21-24.
4. Panon so nayarin pangusar tayo ed Reasoning sano walay nantepet odino amalesay kontrobersial a tema?
4 Pangebat ed Saray Tepet: Makatulong met ed sikatayo so Reasoning sano walay nantepet odino amalesa na kontrobersial a tema. Sarag yon ibaga labat la’d katongtong yo a walay labay yon ipanengneng ed sikaton makapainteres ya impormasyon nipaakar ed satan, insan yo ipaway so Reasoning yo. Saray tema na sayan libro et naalasir unong ed alpabeto kanian anap yo so paulon isisipen yon kawalaan na samay impormasyon a kaukolan yo. Insan yo parlasan iramay tepet ya akasulat a mabatar. No agyo nanengneng a tampol so anapen yo, ibukay yo ed indese a walad beneg. No nalmo yo la imay impormasyon ya anapen yo, basaen la itan a direkta manlapud sayan publikasyon. No espisipikon teksto so pantotongtongan yo, ompan naromog yo so kaukolan yon impormasyon diad pahina 445 diad silong na paulon “Scriptures Often Misapplied.”
5. Anto niray arum a maabig ya usar na Reasoning?
5 Arum Niran Usar: Wala iramay awit-awit dan naynay so Reasoning diad trabaho odino eskuelaan pian natulongan iran mangebat ed saray tepet a singa say, ‘Akin et agkayo manseselebra na saray holiday?’ Nalmoan na saray kalangweran a makatulong iray impormasyon a walad silong na paulon “Creation” tan “Evolution” diad pangipaparaan da na saray report da ed eskuelaan. Wala ta’y bisitaen mon mansasakit odino inateyan? Makatulong ed sika so materyal a walad silong na paulon “Encouragement” pian makapangiter na Makasulatan a ligliwa. Say Reasoning so walaan met na saray impormasyon a makatulong ed saray manpaparaan na paliwawa tan mangikokondukta na saray pantitipon parad lawak na serbisyo.
6. Anto so gagala tayo sano manpupulong?
6 Say gagala tayo sano manpupulong et aliwan pian manalo’d argumento, nisay basta makapangipasabi labat na impormasyon. Labay tayon sidudunong a makapankatunongan manlapud Kasulatan. No epektibo tayon usaren so Reasoning, ipapanengneng tayon lawas tayon iimanoen so panagbangat tayo.—1 Tim. 4:16.