“Mansiansia Kayo ed Panangaro na Dios”
1. Anto so gagala na impangipalapag ed “Mansiansia Kayo ed Panangaro na Dios”?
1 Talagan pampirawatan tayo lay panaral ed balon libron “Mansiansia Kayo ed Panangaro na Dios” diad Panagaral na Kongregasyon ed Biblia manlapud simba na Pebrero 23! Onia iray sampot a salita na samay sulat na Mananguley ya Ulop parad kada mangaaro ed si Jehova: “Masimoon min iilaloan a makatulong ed sika iyan libro pian nitultuloy mon niyaplika so katuaan ed bilay mo, diad ontan et mansiansia ka ‘ed panangaro na Dios . . . ya onkana ed bilay ya andi-angga.’—Judas 21.”
2. Diad antoran pamaakaran na bilay itayo natulongan na sayan balon libro?
2 No Antoray Iilaloan Tayo: Panon ya onaplika iray prinsipyo na Biblia diad pamaakaran a singa say pililimog, panagligliwaan, respeto ed autoridad, personal iran kimey, panamaley, panagsalita, tan saray kustombre? Saray konsiensia tayo so namoldi unong ed atagey iran estandarte na kaptekan a niparungtal ed Salita na Dios. (Sal. 19:7, 8) Legan ya onaaralem so pakatalos tayo ed paraan na panagnonot nen Jehova, lalon ombiskeg so pilalek tayon mamaliket ed sikato, tan saya so mamakiwas ed sikatayon magmaliw a matulok diad amin a pamaakaran na bilay.—Uli. 27:11; 1 Juan 5:3.
3. Akin a nepeg tayon gawaey anggaan na nayarian tayo pian makapibiang ed aaralen ed kada simba?
3 Magmaliw a Determinadon Mibiang: Legan kayon manpaparaan, gawaen a kalat so pangidayew ed Dios diad limog na kongregasyon. (Heb. 13:15) Sayan balon publikasyon et mankakaiban aralen na kongregasyon bilang intero. Sandaraiset so materyal ya aralen kanian walay pankanawnawa tayon makapanparaan a maong, diad ontan et makompiyansa tayon ninabang so naaral tayo. Panamegley na saray niparaan a maong tan direkta ed punton komento, naayat tayo so arum ed aro tan maabig iran gawa, tan magmaliw a mas maligsa tan makabkabaliksan so pangonsidera ed materyal. (Heb. 10:24) Ontan met, lalo tayon naliknay liket legan tayon ibabalikas so pananisia tayo.
4. Akin ya importantin tuloken tayo iray ganggan nen Jehova?
4 Diad samay unor a labi nen Jesus ed dalin, insiglaot to so panumbok ed saray ganggan nen Jehova diad pansiansia ed panangaro na Dios. (Juan 15:10) Diad tulong na libron “Panangaro na Dios,” magmaliw itayon mas determinadon mangiyaplika ed saray prinsipyo na Biblia diad inagew-agew a bilay tan ‘makapansiansia itayo ed panangaro na Dios.’—Jud. 21.