Idayew si Jehova Kada Agew
1. Napapakiwas iray lingkor na Dios a gawaen so anto, tan akin?
1 Imbalikas nen Arin David so determinasyon ton idayew si Jehova ya “agew-agew,” tan ed andi-angga. (Sal. 145:2, 7, 21) Walaan tayo met na maabig a rason pian idayew si Jehova kada agew.—Sal. 37:10; 145:14, 18; 2 Ped. 3:13.
2. Panon so nayarin pangidayew na saray pamilya ed si Jehova kada agew?
2 Diad Abung: Walaan itayo na saray makapaseseg a literatura parad makabaliksan ya espiritual a pantotongtong sano sisingbaten so inagew-agew a teksto, legan na Panagdayew na Pamilya, tan sano manpaparaan parad saray pantitipon na kongregasyon. Inyugali na dakel a pamilya so pambabansag a pangan anggan maminsan labat ed sanagew. Kanian walay pankanawnawa ran makapantotongtong ya aliwan apuraan tan mangidayew ed si Jehova. Saray ontan a pantotongtong ya idadauloan na atateng et baleg a tulong pian napabaleg iray ananak ed panagdisiplina tan panamilin nen Jehova.—Efe. 6:4; Deu. 6:5-7.
3. Panon so nayarin pangidayew tayo ed si Jehova sano kaiba tayo iray agagi?
3 Sano Kaiba Iray Agagi: Diad ministeryo odino diad saray pantitipon na kongregasyon, walaan tayo na maabig iran pankanawnawa pian idayew si Jehova kaiba iray agagi. (Uli. 15:30; Fil. 4:8; Heb. 13:15) Lapud inaro tayon amin si Jehova, nepeg a magmainomay tayon itekep iray masimoon a balikas na apresasyon tayo ed kaabigan nen Jehova sano mantotongtong itayo.—Sal. 106:1.
4. Nilikud ed panagkabkaabungan, diad anto niran kipapasen a nidayew tayo si Jehova?
4 Sano Mitotongtong ed Saray Agmananisia: Anggaman nayarin ag-iyabuloy na situasyon tayo so agew-agew a pibiang ed ministeryo, no itongtong tayo ed saray katrabaho, kaeskuelaan, tan arum niran nakakaiba tayo so nipaakar ed si Jehova tan saray gagala to anggan magano labat, nayarin makapangitanem tayoy ilalo ed saray masimoon a totoo. (Sal. 27:14; 1 Ped. 3:15) Sakey ya agin bii so akapantasi ed kapara ton pasahero ed eroplano, ya aligliwa tan apaseseg a maong ed nadngel to kanian inter toy address tan numero na telepono to ed samay agin bii ta pian nituloy day pakapantongtong da. Anggaman ed idarakel na saray problema tan iloloor na saray kipapasen, mantutultuloy ya inanabang na totoo nen Jehova so “maong a balita na kaabigan” ed saramay ondengel. Saya so mangiiter na ilalo ed arum tan mamapakiwas ed sikaran idayew si Jehova.—Isa. 52:7; Roma 15:11.
5. Akin a pilalek tayon idayew si Jehova, tan antoy nayarin nagawaan na saya?
5 Seguradon makapaliket ed si Jehova a narengelan iray lingkor ton mangidadayew ed sikato kada agew! Singa saray nanenengneng tayon palsa nen Jehova, sarag tayo met a sikatoy mantultuloy ya idayew ed kada agew diad ayaman, diad kongregasyon, tan sano mitotongtong ed arum ya agni managdayew nen Jehova.—Sal. 19:1-4.