Panon so Iyebat Yo?
1. Akin ya aligen tayoy paraan na panangebat nen Jesus ed tepet?
1 Pankelawan na totoo natan so inkaepektibo na impangebat nen Jesus ed saray tepet na totoo. Sano natepetan itayo met na nanduruman tepet legan a manpupulong itayo, maabig no aligen tayoy paraan na impangebat nen Jesus.—1 Ped. 2:21.
2. Antoy nayarin ontulong ed sikatayo pian epektibo so pangebat tayo ed tepet?
2 Ondengel ya Unona: Inkonsidera nen Jesus so panmoria na ontetepet ed sikato. No maminsan et mankaukolan iya na pantepet met pian naseguro no antoy walad nonot na katongtong tayo. Say sakey ya ontetepet na, “Manisia kayo ed si Jesus?” et nayarin pankelawan to no akin ya agtayo manseselebra na Krismas. No natebek yo so motibo na ontetepet, mas epektibo so pangebat yo ed sikato.—Luc. 10:25-37.
3. Antoray nausar tayo pian tulongan itayon makaromog na Makasulatan iran ebat?
3 Usaren so Salitay Dios ed Pangebat: Sankaabigan ya usaren so Biblia ed pangebat na tepet. (2 Tim. 3:16, 17; Heb. 4:12) Say libron Reasoning tan say “Bible Topics for Discussion” ed New World Translation of the Holy Scriptures et talagan makatulong ed pangiter na dugan ebat. Anggano agpanisiaan na unabung so Biblia, siansian ninabang yo so Makasulatan a bangat ed mataktikan paraan. Tulongan so too a morekdeken ton maong so apaneknekan lan duga a kakabatan a naromog ed Biblia. Diad pangalig yo ed si Jesus, saray ebat yo et “singa saray mansanas a balitok ed iket a pilak,” a walaan na dignidad, alay abig, tan walaan na kablian.—Uli. 25:11.
4. Diad antoran kipapasen ya agtayo sasalien ya eebatan so amin a tepet?
4 Ebatan Tayo Kasi so Amin a Tepet? No agyo amta so ebat ed tepet na unabung, agkayo nababaingan a mangibagay: “Agko amta so ebat, balet aralen kon maong so tepet yo tan ompawil ak no aromog ko lay ebat.” Say ontan ya inkamapaabeba tan personal ya interes et nayarin mamakiwas ed unabung pian papawilen to kayo. No nalikas yo a say ontetepet et onsusumpa tan labay to labat so misangsangan, aligen si Jesus diad panlimita ed ebat yo. (Luc. 20:1-8) Ontan met, no say sakey ya anggapoy interes to ed katuaan et labay to labat so midebati, mapagalang kayo lan manpatanir tan usaren yo lay panaon ed pananap yo na saray interesado.—Mat. 7:6.
5. Antoy inter nen Jesus a pangaligan diad pangebat ed saray tepet?
5 Amta nen Jesus a say panmatalek ed si Jehova et importante diad panumpal toy asainmin to pian ‘tasian so katuaan,’ a kalaktip na saya so pangebat ed saray tepet na masimoon a totoo. (Juan 18:37) Agaylan pribilehyo so pangalig tayo ed si Jesus diad pangebat ed saramay talagan interesado!—Gawa 13:48.