Magenap La Kasi so Gagawaen Ko?
1. Anto so nayarin pampapagaan na sakey a matoor a Kristiano?
1 Nitepet mo la kasi itan a tepet ed inkasika? Nayarin dinmaiset so nagagawaan yo’d ministeryo lapud itatatken, ikakapuy na bunigas yo, odino dinmakel so responsabilidad yo’d pamilya, tan lapud satan et nadidismaya kayo. Insulat na sakey ya agin bii a walaan na taloran ananak a no maminsan et sikatoy nakokonsiensia ta say panaon tan biskeg ya uusaren to’d pangaasikaso ed pamilya to et manlilimita ed kimey to’d ministeryo. Anto so makatulong pian nawalaan itayo na balansin panmoria?
2. Anto so iilaloan nen Jehova ed sikatayo?
2 No Antoy Iilaloan nen Jehova ed Sikatayo: Seguradon labay tayon amin a gawaen so anggaay nayarian tayo diad ministeryo. Balet, mabetbet a walay baleg a pandumaan na labay tayon gawaen ed sarag tayon nagawaan. Ipapatnag na panlabay tayon manggawa na daakan ya aliwa itayon mapaulyan. Lawas tayon tandaan ya amta nen Jehova iray limitasyon tayo tan agto kakaukolanen iray agtayo nagawaan. (Sal. 103:13, 14) Anto so iilaloan to ed sikatayo? Labay ton sikatoy panlingkoran tayo ed interon puso, ya iter tayo ed sikato so sankaabigan tayo.—Col. 3:23.
3. Panon tayon usisaen iray sagpot tayo ed ministeryo?
3 Antoy ontulong ed sikatayo pian naamtaan no antoy sarag tayon gawaen? Nayarian tayoy onkerew na tulong ed si Jehova pian makabat tayon naanalisay kipapasen tayo. (Sal. 26:2) Makatulong met so sakey a napanmatalkan, matatken ed espiritual a kaaro a makapikabat a maong ed sikatayo tan ag-antakot a mangibaga ed no anto ni papaaligwasen tayo. (Uli. 27:9) Tandaan met a manguuman-uman so situasyon, kanian mas maabig no regular tayon usisaen so kipapasen tayo.—Efe. 5:10.
4. Panon so nepeg a panmoria tayo ed saray nibase ed Biblian panonot nipaakar ed ministeryo?
4 No Panon Tayon Moriaen Iray Panonot: Legan na lumbay batik, iyeeyag na saray manbabantay so pananagyat da. Say gagala ra et pian natulongan iray bumabatik a makasabi ed finish line, aliwan pian patundaen ira. Mipadpara, saray nibase ed Biblian panamaseseg tan panonot diad saray miting tan publikasyon tayo a mamapakiwas ed sikatayon ‘manpulong tekep na inkaganatan’ et parad pankaabigan tayo. Ag-ipapalikna na saratan a kulang iray serbisyo tayo. (2 Tim. 4:2) Makapanmatalek itayo a basta gagawaen tayo so anggaay nayarian tayo, agbalot lingwanan nen Jehova so ‘aro tan gawa’ tayo.—Heb. 6:10.