‘Agka Ontatakot’
1. Singa si Jeremias nensaman, antoray nayarin sengegan na itakot tayo natan?
1 Sanen si Jeremias et pinili nen Jehova pian magmaliw ya propeta, natatakot ompan agto sarag. Balet ta oniay impaseguro nen Jehova: ‘Agka ontatakot,’ tan maaro Ton pinabiskeg so liknaan to pian nasumpal toy asainmin to. (Jer. 1:6-10) Diad sikatayo met natan, nayarin naapektoay ministeryo tayo lapud inkamabaing odino anggapoy kompiyansa tayo’d sarili tayo. Ompan natatakot tayo’d reaksion tan opinyon na totoo kanian no maminsan et agtayo la manpulong. Antoy gawaen tayo pian nalabanan iratan ya liknaan, tan no nagawaan tayo itan, antoray bendisyon?
2. No nipaakar ed ministeryo, panon a makatulong so panagparaan pian nabawasay takot tayo?
2 Manparaan ya Maong: No manparaan tayon maong, nabawasay takot tayo. Alimbawa, no nonoten tayo lan unona iray kaslakan ya ibabagay totoo a mamatunday tongtongan, niparaan tayo lay posiblin iyebat tayo ed saratan. (Uli. 15:28) Marakep no ipraktis yo diad Panagdayew na Pamilya yo no panon so pangebat ed saray posiblin tepet na saray totoon nakakatongtong yo’d eskuelaan tan diad ministeryo.—1 Ped. 3:15.
3. Panon a makatulong so panagmatalek ed si Jehova pian nalabanay takot?
3 Manmatalek ed Jehova: Makatulong so panagmatalek ed Dios pian nalabanay takot. Ipapaseguro nen Jehova ya talagan tulongan to tayo. (Isa. 41:10-13) Satan la so sankaabigan ya rason pian agtayo ontakot. Ontan met, impaseguro nen Jesus ya anggano walaray nagawan ag-iilaloan, tulongan itayo na masanton espiritu na Dios pian makapangiter tayo na maabig a pantasi. (Mar. 13:11) Kanian, lanang ya onkerew ed si Jehova na masanton espiritu to.—Luc. 11:13.
4. Antoray bendisyon no mantultuloy tayo’d ministeryo anggaman aliwa itan ya mainomay?
4 Saray Bendisyon: Diad pantutultuloy tayo’d ministeryo anggaman aliwa itan ya mainomay, lalon ombibiskeg so liknaan tayon mangarap ed saray onsabin subok. Niwala’d sikatayo so biskeg na linawa tan pakpel, a pakapatnagan ya say sakey et napno na masanton espiritu. (Gawa 4:31) Sakey ni, no lalabanan tayoy takot tayo diad tulong nen Jehova, papabiskegen tayoy pananisia tayo tan panagmatalek tayo ed panangilaban na ‘taklay’ to. (Isa. 33:2) Nalikna tayo met so liket tan inkapnek lapud amta tayon napapaliket tayoy Aman Jehova. (1 Ped. 4:13, 14) Kanian, makpel tayon iyabawag so mensahe na Panarian. Agtayo ontatakot, ta lawas itayon matalek ya tulongan itayo nen Jehova!