Amputi La Ray Kaumaan Parad Panag-ani

1. Anton importantin kimey so nagagawa natan?

¹ Kayarin pinulongan nen Jesus imay Samaritana, imbaga to’d saray disipulo to: “Nengneng yo iray kaumaan, ya amputi la ra parad panag-ani.” (Juan 4:35, 36) Diad saman et ginmapo lay espiritual a panag-ani, tan nanenengneng la nen Jesus so ilaknab na satan ed interon mundo. Anggan wala la’d tawen si Jesus, siansia nin idadaulo to so panag-ani. (Mat. 28:19, 20) Antoray paneknek ya tuloytuloy ni ilaknab na sayan impasyan kimey anggad manampot itan?

2. Antoray mangipapanengneng ya lalon onlalaknab so panag-ani diad interon mundo?

² Sankamundoan a Panag-ani: Diad 2009 ya serbisyon taon, 3.2% so indakel na manangipalapag ed interon mundo. Anggan diad saray lugar ya sebel so panagpulong ya kimey et 14% so indakel na manangipalapag. Say aberids ya bilang na panangiyaral na Biblia a nireport binulan et masulok ya 7,619,000​—satan et atagey na ngalngali kapalduan milyon kompara’d imbeneg ya taon, tan mas dakel nen say bilang na manangipalapag. Lapud maples so ilalaknab na kimey ed dakel ya lugar, lalon ondarakel met so request ya mangibaki ditan na saray misioneron nanaral ed Gilead. Diad dakel ya bansa, mabunga iray teritorya na foreign language iran kongregasyon. Mapatpatnag ya papepelesen nen Jehova so kimey legan ya manasingger so kasampotan na panag-ani. (Isa. 60:22) Kasin positibo ka diad pankikimey mo’d teritorya yo?

3. Antoy nayarin iisipen na arum nipaakar ed panag-ani ed teritorya ra?

³ Say Panag-ani ed Teritorya Yo: “Dagdaiset so interesado ed teritorya mi,” so ibabaga na arum. Tua, walaray teritorya ya singa agmabunga no ikompara’d arum, odino mabunga nensaman balet natan et andi la. Kanian nayarin isipen na arum a singa asumpal la so panag-ani ed teritorya ra tan natan et mantutudtor labat ira na saray nakekeraan ya interesado. Duga kasi itan a panmoria?

4. Antoy nepeg ya panmoria tayo ed ministeryo tayo, tan akin?

⁴ Impasyan kimey so panag-ani, manlapud gapo anggad nasumpal itan. Impabitar nen Jesus a nepeg ya anggapoy sasayangen tayon panaon sanen imbaga ton: “Dakel so aanien, balet daiset so mankikimey. Mikasi kayo sirin ed Katawan na panag-ani a mangibaki na saray mankimey ed aanien to.” (Mat. 9:37, 38) Si Jehova so Katawan na panag-ani, tan sikato so manetermina no kapigan tan iner niwalay bunga. (Juan 6:44; 1 Cor. 3:6-8) Anto sirin so betang tayo? Oniay ebat na Biblia: “Dia ed kabuasan itanem mo so binim, tan dia ed labi agmo ipiko so limam.” (Ecl. 11:4-6) On, agtayo ‘ipipiko so lima tayo’ lalo la ta manasingger lay panampot na panag-ani!

5. Akin et nepeg ya mansiansia itayon maseseg ed panagpulong anggano singa agmabunga so teritorya tayo?

⁵ Itultuloy so Pan-ani: Anggano mabetbet lan nakokobrian so teritorya tayo tan singa anggapoy interesado, wala nin siansiay rason pian manseseg tan mangganat itayo’d kimey. (2 Tim. 4:2) Lapud makapabigla iran nagagawa ed mundo natan, manguuman so awawey na totoo tan mas mapaga la ra’d arapen. Diad itatatken na saray kalangweran, nayarin labay day nawalaan na deen na nonot tan maligen ya bilay. Tan nayarin walaray totoon pandinayewan day inkaseet tayo. On, onsabi panaon et nayarin ondengel met la iramay datin ag-ondengel. Tan anggan saramay onsusumpa ed kimey tayo et kaukolan ya pasakbayan.​—Eze. 2:4, 5; 3:19.

6. No singa anggapoy interesado ed teritorya tayo, antoy ontulong pian mansiansia itayon maseseg?

⁶ No singa anggapoy interesado ed teritorya tayo, antoy ontulong pian mansiansia itayon maseseg? Likud ed panagkabkaabungan, salien tayoy arum ya aspekto na ministeryo, singa say panagpulong ed lugar na negosyo odino telephone witnessing. Odino mangusar tayoy nanduruman presentasyon pian duma met so panangigapo tayoy tongtongan. Nayarin umanen tayoy eskedyul tayo pian makapibiang tayo’d panagpulong diad labi odino diad arum ya oras ya maslak a totoo et walad abung. Ompan sarag tayoy manaral na arum ya lenguahe pian mas dakel ni napasabian tayoy maong a balita. Napalaknab met so ministeryo tayo diad pan-regular payunir tayo. Odino onalis tayo’d lugar a daiset so manangipalapag. No duga so panmoria tayo’d panag-ani, gawaen tayoy anggaay nayarian tayo pian sigpot a makapibiang ed sayan importantin kimey.

7. Anggad kapigan itayo mantultuloy ed kimey ya panag-ani?

⁷ Limitado labat so panaon na saray dumaralos ed pan-ani, kanian ag-ira manrerelaks odino mantantan anggad ag-itan nasumpal. Diad espiritual a panag-ani, kaukolan ya agtayo met sasayangen so panaon. Anggad kapigan itayo mantultuloy ed sayan kimey? Kaleganan na sayan “sampot a panaon na mundo” tan anggad “anggaan.” (Mat. 24:14; 28:20) Singa ed manunan Ministro nen Jehova, labay tayon sumpalen so kimey ya inmatalek ed sikatayo. (Juan 4:34; 17:4) Itultuloy tayo sirin ya sumpalen so ministeryo tayo tekep na seseg, gayaga, tan positibon panmoria anggad anggaan. (Mat. 24:13) Agni asumpal so panag-ani!

[Blurb ed pahina 2]

Impasyan kimey so panag-ani, manlapud gapo anggad nasumpal itan