Kaukolay Panag-anos ed Ministeryo Tayo
1. Panon ya impatnag nen Jehova so panag-anos to ed saray totoo?
1 Maan-anos so Dios ed saray totoo. (Exo. 34:6; Sal. 106:41-45; 2 Ped. 3:9) Say sakey a pakapatnagay maaron anos to et diad panamegley na panangipulong na Panarian ed interon mundo. Ngalngali 2,000 taon lan mikikimey si Jehova ed totoo, tan tutulongan to nin siansia iray matuan impanpuson totoo a makaasingger ed sikato. (Juan 6:44) Panon tayon naalig so inkaanos nen Jehova diad ministeryo tayo?
2. Panon tayon nipanengneng so panag-anos sano manpupulong tayod teritorya tayo?
2 Panagkabkaabungan: Aaligen tayoy panag-anos nen Jehova diad ‘agtayo itundan’ pampulong ed teritoryan daiset so mangawat. (Gawa 5:42) Maan-anos tayon susungdoan iray panangibaliwala, panagbalaw, tan isusumpa ed ministeryo tayo. (Mar. 13:12, 13) Ipapanengneng ti’ met so panag-anos diad maseet tayon pampulong anggan mairap so makalmo na saray interesado.
3. Akin et kaukolay panag-anos sano papawilen iray interesado tan sano mangiyaaral na Biblia?
3 Panangiyaral na Biblia: Say pamabaleg na tanaman et mankaukolay panag-anos. Naasikaso tayo itan, balet agtayo naapuray ibaleg to. (Sant. 5:7) Ontan met so ibaleg ed espiritual, satan et kalkalna, aliwan biglaan. (Mar. 4:28) Nayarin mairap a taynan na saramay iyaaralan tayo iray aliwan base ed Biblian sisisiaen tan tradisyon da. Agtayo ra aapuraen ya onaligwas diad pamilit ed sikaran manguman. Say espiritu na Dios so mamapakiwas ed puso na estudyante, kanian kaukolan so panag-anos pian naikdan itan na magenap a panaon.—1 Cor. 3:6, 7.
4. Panon a makatulong ed sikatayo so panag-anos pian epektibon makapantasi ed saray aliwan Tasi a kakanayon?
4 Aliwan Tasi a Kakanayon: Anggano labalabay tayon ipaamta so katuaan ed saray aliwan Tasi a kakanayon, maanos tayo no alagaren tayoy dugan panaon pian ninabang ed sikaray sisiaen tayo, tan maalwar ya ag-ira buntonan na dakerakel ya impormasyon. (Ecl. 3:1, 7) Paulyan ti’ nin say maabig ya alimbawa tayo so mantasi parad sikatayo tan lanang ya akaparaan a manginabang na sisiaen tayo diad mauyamo tan marespeton paraan. (1 Ped. 3:1, 15) On, say ministeryon walaay panag-anos so mas epektibo tan mamaliket ed Ama tayon walad tawen.