Say Epektibon Panag-Street Witnessing
1. Antoy sakey ya paraan a naalig tayoy Jesus?
1 Legan na ministeryo nen Jesus diad dalin, sikatoy akitongtong ed saray totoon asabat tod dalan tan ed publiko iran pasen. (Luc. 9:57-61; Juan 4:7) Labay ton ipakabat so importantin mensahe to ed dakel a totoo anggad posible. Natan, say panag-street witnessing et sakey a maabig ya paraan pian natulongan iray totoon naamtaan so kakabatan na Dios. (Uli. 1:20) Mas dakel so napulongan tayo no asinggeran tayo lan unona iray totoo tan usarey pakatebek tayo.
2. Akin et kaukolay iyasingger lan unona sano mani-street witnessing?
2 Onasingger lan Unona: Imbes ya akaalagey odino akayurong labat ed sakey a lugar tan manalagar na ondalan a mitongtong ed sikatayo, mas maabig no sikatayo lay onasingger. Onimis, mimataan, tan magmaliw ya makaaro. No walaray kaibam ya manpulong, mas maabig no mansian kayo sano asinggeran yo ray totoo. Kaukolan yo met so manggaway paraan pian napulongan lamet iray aromog yon interesado. No matukoy, kayari na impitongtong yo, sarag yon itepet no panon iran nakatongtong lamet. Saray arum et regular ya mani-street witnessing ed parehon lugar, kanian nakakatongtong da lamet iramay apulongan da la tan nababayuboay interes da.
3. Panon a makatulong so pakatebek sano mani-street witnessing?
3 Usarey Pakatebek: Pilien a maong no iner so puestoan tan no siopay asinggeran. Agmet kaukolan ya pulongan so kada ondalan. Magmaliw a maobserba. Singa bilang, no manggaganat may too, maabig no palabasen la. Sano manpupulong diad arap na kawalaay negosyo, nepeg a maalwar pian ag-sitaen na manedyer. Mas maong no pulongan iray totoo no papaway la ra nen say paloob ni ra labat. Asinggeran ira ed paraan ya ag-ira nataktakot o nabigla. Kaukolan met so pakatebek sano mangiyoopresi na literatura. No agtanton interesado, nayarin tract lay iyopresi imbes a magasin.
4. Akin et makagunggona tan makapalikliket so panag-street witnessing?
4 Makatulong so panag-street witnessing pian dakel so napulongan tayo diad antikey labat ya panaon. (Ecl. 11:6) Nayarin arum ed saray nakatongtong tayo et saramay agnasasabian sano mankakabkaabungan tayo. Maabig sirin no iyeskedyul tayo so pibiang ed panag-street witnessing, say makapaliket tan epektibon paraan na panagpulong.