Sarag Mo Kasi Onlad “Macedonia”?
1. Akin et linma si Pablo tan saray kaiba to diad Macedonia?
1 Nen manga 49 C.E., tinaynan nen apostol Pablo so Antioquia ed Sirya parad komaduan pambiahe to bilang misionero. Plano ton bisitaen so Efeso tan saray arum a syudad diad Asia Minor. Balet panamegley na masanton espiritu, sikatoy akanengneng na pasingawey ya angikuan: “Gala dia ed Macedonia.” Mabulos ya inawat nen Pablo tan saray kaiba to so imbitasyon tan niletneg da so sankaunaan ya kongregasyon ed satan a rehyon. (Gawa 16:9, 10; 17:1, 2, 4) Diad panaon tayo, wala iray arum a bansa ya mankaukolan na dakel a manag-ani. (Mat. 9:37, 38) Sarag mo ta’y ontulong?
2. Akin et ag-inkonsidera na arum so onalis ed sananey a bansa?
2 Nayarin labay mo met so magmaliw a misionero a singa si Pablo, balet agmo ni inkonsidera no kasin sarag moy onalis ed arum a bansa. Alimbawa, ompan agka nayarin manaral ed Gilead lapud edad mo odino lapud marikit ka o walaray menor de edad ya anak mo. Ompan agmo planoy onlad arum a bansa ta talawan kan manaral na sananey a lenguahe. Odino ompan sakey kan imigrante ed bansan mainaway bilay kanian labay moy mansiansia ditan. Balet, ompan no aralen tan ipikasim itan et namoriam ya sarag mo manayay onalis ed arum a bansa a walay pankaukolan.
3. Akin et agti la kaukolan so nipasal a manmisionero pian matalonan makapanpulong ed arum a bansa?
3 Kaukolan ni Kasin Nipasal Bilang Misionero? Akin et tinmalona si Pablo tan saray kaiba to? Lapud nanmatalek ira ed si Jehova tan ed masanton espiritu to. (2 Cor. 3:1-5) Kanian, anggan agka nipasal a manmisionero lapud sirkumstansyam, sarag mo nin siansiay makapanpulong ed arum a bansa. Tandaan met ya makakaawat ka na panangipasal diad Teokratikon Eskuelaan Parad Ministeryo tan Pantitipon Parad Panagserbi. Tan no kalat moy manaral ed Gilead odino arum ni ran eskuelaan, dakel so naaralan mo no onalis kad arum a bansa pian salien so manmisionero, tan makatulong itan ed sika sano makaawat ka lay kaaruman a panangipasal.
4. Akin et agnepeg ya ipasen na saray maedad la ya agdan balot nayariay onalis ed arum a bansa pian manpulong?
4 Maedad la: Saray maespiritual a maedad la balet ta maksil ni laman da et nayarin makatulong na baleg ed saray bansan mankaukolan. Kasin nanretiro kayo la? Saray arum a melag so pension da et ayarian day nanayam ed agmasyadon maaligwas a bansa ta mas mamura ditan so sasaliwen tan panagpatambal.
5. Isalaysay so eksperiensya na sakey ya retiradon agi ya inmalis ed arum a bansa.
5 Walay sakey ya agin retirado a tagad bansan mansasalita na Ingles, a sakey ya elder tan payunir, ya inmalis ed lugar a papasyaran na saray turista diad Southeast Asia pian ontulong ed siameran manangipalapag a mansasalita na Ingles. Pinulongan da so 30,000 a foreigner ya manaayam ditan. Diad loob na duay taon, 50 lay onaatendi ed aral. Oniay insulat na agin laki: “Kulang so panaon pian nibagak ya amin iray marakdakep a bendisyon ya agamoran ko sanen linma ak dia!”
6. Isalaysay so eksperiensya na agin marikit ya inmalis ed bansan baleg so pankaukolan.
6 Agagin Mamarikit: Uusaren nen Jehova iray agagin bibii diad makapadinayew a paraan pian niyabawag so maong a balita ed saray bansan baleg so pankaukolan. (Sal. 68:11) Walay sakey ya agin marikit a labay toy manlingkor ed arum a bansa pian napalaknab toy ministeryo to. Balet natural labat ya pampagaan na atateng to so seguridad to. Kanian pinili toy sakey a bansa ya mareen tan maaligwas. Sikatoy nansulat ed sangan opisina tan inikdan day makatulong, espisipikon impormasyon. Diad loob na anem taon ya impanayam tod saman a bansa, dakel so naawat ton bendisyon. Inkuan to: “No diad sikami, pigpigaray niyaralan ko na Biblia. Balet lapud manlilingkor ak ed lugar a baleg so pankaukolan, dakel so niyaralan ko tan apaaligwas koy abilidad kon manbangat.”
7. Isalaysay so eksperiensya na pamilyan inmalis ed arum a bansa.
7 Pamilya: No walaray anak yo, labay to kasin ibaga et agyo nayarian so onalis ed arum a bansa pian niyabawag so maong a balita? Nandesisyon so sakey a sanasawa a salien itan anggan walay duaran anak da a manedad na walora tan samplora. Insulat na ina so eksperiensya ra: “Maong ta dia mi papabalegen iray anak mi lapud makakapilimog irad saray espisyal payunir tan misionero. Makabkabaliksan so bilay mi ta manlilingkor kami ed lugar a baleg so pankaukolan.”
8. Nayari kasi manlingkor ed arum a bansa anggano agla manaral na sananey a lenguahe? Ipaliwawa.
8 Lenguahe: Kasin say panaral na sananey a lenguahe so mangaamper ed sikan onalis ed arum a bansa? Ompan walaray mansasalita na lenguahem diad saray bansan nakaukolan so dakel a manangipulong ed Panarian. Walay sanasawan mansasalita na Ingles ya labay day onalis ed bansan mansasalita na Spanish ta dakel diman so emigranten Ingles. Sanen inter na sangan opisina no dinan iray Ingles a kongregasyon a mankaukolan, amili ira na sakey tan amidua ran pinasyar itan. Kasempet da, nantipid ira tan sakey taon iran nantipon. Sanen akaparaan la ra, tinulongan ira na agagi ed samay lugar ya alisan da pian makalmoy mamuran napanayaman.
9, 10. Antoy kaukolan ya ikonsidera na saramay tinmaynan ed bansa ra, tan akin?
9 Emigrante: Kasin wala kad arum a bansa tan ditan mo naaralan so katuaan? Ompan kaukolan so dakel a manag-ani diad bansan nianakan mo. Nayari ka kasin ompawil diman pian makatulong? Ompan mas mainomay moy makalmo na trabaho tan napanayaman nen saray foreigner. Nayarin kabisadom so lenguahe diman. Sakey ni, ompan mas dengelen ka na saray tagad man nen saray foreigner.
10 Walay sakey a lakin taga Albania ya inmalis ed Italy bilang refugee. Sikatoy akalmo na marakep a trabaho tan nipapawitan toy pamilya to ed Albania. Sanen sikatoy nagmaliw a Tasi, binangatan to na Albanian so sakey a grupo na Italyanon espisyal payunir ya onalis diman ta baleg so pankaukolan. Insulat na agin laki: “Onla ra ed teritoryan tinaynan ko. Agda amta so lenguahe, balet eksayted ira. Say lenguahek tan kulturak et Albanian. Kanian antoy gagawaen kod Italy ey?” Nandesisyon iyan agi ya ompawil ed Albania pian ontulong ya niyabawag so maong a balita. Inkuan to: “Pagbabawian ko kasi impanaynan kod trabaho tan baleg a sueldo ed Italy? Andin balot! Nalmok so tudtuan kimey diad Albania. Parad siak, say importantin kimey a mangiter na magnayon a liket et say sigpot-puson panlingkor ed si Jehova!”
11, 12. Antoy nepeg a gawaen na saray manplaplanon onalis ed arum a bansa?
11 No Antoy Gawaen: Antis ya linma ed Macedonia si Pablo tan saray kaiba to, implano day onlad sagur, balet “ag-ira inabuloyan na masanton espiritu,” kanian amaarap irad amianen. (Gawa 16:6) Sanen asingger la rad Bitinia, inamper ira nen Jesus. (Gawa 16:7) Si Jehova, panamegley nen Jesus, so mangidadaulo na panagpulong a kimey anggad natan. (Mat. 28:20) Kanian, no plaplanoen moy onalis ed arum a bansa, kerewen so panangiwanwan nen Jehova.—Luc. 14:28-30; Sant. 1:5; nengnengen so kahon ya “Panon Mon Naamtaan No Walay Pankaukolan ed Bansan Planom a Laen?”
12 Onkerew na suhestion ed saray mamatatken tan arum niran maespiritual ya agagi. (Uli. 11:14; 15:22) Manbasa na saray publikasyon tayon nipaakar ed panaglingkor diad arum a bansa tan man-research nipaakar ed bansan planom ya laen. Sarag mo kasin pasyaren so bansan planom ya laen anggan pigaran agew labat? No determinado kan onalis ed arum a bansa, nayari kan mansulat ed sangan opisina na satan a bansa parad kaaruman ya impormasyon. Say address et walad sankabaloan ya Yearbook tayo. Balet, imbes ya direktan ipawit ed satan a sangan opisina so sulat mo, iter itan ed saray mamatatken ed kongregasyon yo pian makapangitekep ira na sulat antis dan ipawit itan.—Nengnengen so Organisadon Manggawa na Linawa nen Jehova, pahina 111-112.
13. Panon kan natulongan na sangan opisina, balet antoy responsabilidad mo?
13 Ipawitan ka na sangan opisina na makatulong iran impormasyon nipaakar ed bansan planom a laen pian natulongan kan mandesisyon. Balet, ag-ira makapangiter na saray sponsorship letter, residency, visa, odino arum ni ran legal form, tan agmet ira mananap na napanayaman mo. Personal irayan pamaakaran a kaukolan mon aralen a maong, antis kan onalis. Niarum ni, responsabilidad mon kontaken iray embahada odino consul pian naamtaan iray impormasyon nipaakar ed visa requirement tan work permit. Nepeg a saramay manplaplanon onalis et sarag dan legpeten so pankaukolan da tan asikasoey legal iran dokumento.—Gal. 6:5.
14. Antoy panalwaran mo sano ombisita odino onalis kad bansan sebel so kimey tayo?
14 Diad Saray Bansan Sebel so Kimey Tayo: Diad arum a bansa, maal-alwar iray agagi sano mandadayew. (Mat. 10:16) Kanian, no agmanalerto iray agagin ombisita odino onalis diman, nayarin naimano laingen so kimey tayo tan nipeligro iray agagi diman. No plaplanoen moy onalis ed ontan a bansa, ipangasin mansulat ka ni ed sangan opisina ya kawalaan mo, balet ta ipadalan mo itan ed ulop na mamatatken ed kongregasyon mo antis a mandesisyon.
15. Panon a napalaknab na saramay agmakaonlad arum a bansa so ministeryo ra?
15 No Agmo Sarag so Onalis: No agka makaonla ed arum a bansa, agka komon nadidismaya. Ompan walay sananey ya “baleg a puerta a mangitonton ed kimey” a nilukas ed sika. (1 Cor. 16:8, 9) Nayarin amta na manangasikaso na sirkito yo no dinan iray lugar ed sikayo a mankaukolan na tulong. Ompan sarag moy ontulong ed asingger a kongregasyon odino grupo a mansasalita na sananey a lenguahe. Odino nayarim a napalaknab so ministeryom diad mismon kongregasyon mo. Antokaman so situasyon mo, say importante et sigpot-puso kad panagdayew mo.—Col. 3:23.
16. Antoy reaksion tayo ed saramay malabay ya onalis ed arum a bansa?
16 Kasin walay kabat mon maespiritual ya agi a kalat toy manlingkor ed arum a bansa? No wala, suportaan tan paseseg mo! Sanen tinaynan nen Pablo so Antioquia ed Sirya, mikatlo iman a sankabalgan a syudad ed Empiryo na Roma (ontutumbok ed Roma tan Alejandria). Lapud maaw-awang so teritorya na kongregasyon na Antioquia, seguradon kaukolan day tulong nen Pablo tan nailiw da. Balet, anggapoy nabasa tayod Biblia ya agda labay ya paalisey Pablo. Imbes a dismayaen da, sankanonot da a “say uma et say mundo.”—Mat. 13:38.
17. Akin et kaukolan tayon ikonsidera so iyakar ed “Macedonia”?
17 Talagan abendisyonan si Pablo tan saray kaiba to lapud inawat day imbitasyon ya onlad Macedonia. Sanen wala rad Filipos, sakey ed saray syudad na Macedonia, nalmo ray Lidia, tan “nilukasan nen Jehova so puso to pian manimano ed saray sasalitaen nen Pablo.” (Gawa 16:14) Isip mo pay panlikliket nen Pablo tan saray kaiba ton misionero sanen nampabautismo si Lidia tan say interon sankaabungan to! Diad arum iran bansa, wala ray matunong a totoo a singa si Lidia ya agni apasabiay mensahe na Panarian. No onla kad “Macedonia,” nayarin naeksperiensyam so liket ed pakalmo tan panulong ed sikara.
[Kahon ed pahina 5]
Panon Mon Naamtaan No Walay Pankaukolan ed Bansan Planom a Laen?
• Nengnengen so sankabaloan a Yearbook. Pankomparaen so karakel na manangipalapag tan populasyon.
• Usaren so Index pian naanap iray artikulo tan eksperiensya ed satan a bansa.
• Mangalay impormasyon ed saray manangipalapag ya akapasyar odino akapanayam lad satan a bansa.
• No plaplanoen moy onalis ed bansan walaray mansasalita na lenguahem, mananap na impormasyon, a singa diad Internet, pian naamtaan no pigaray mansasalita na lenguahem diman.