Tulongan Iray Totoo ya Ondengel ed Dios
1. Anto ran brosyur so ni-release diad Distriton Kombension ya “Onsabi Komon so Panarian na Dios!” tan akin ya mausausar iratan?
1 Diad Distriton Kombension ya “Onsabi Komon so Panarian na Dios!” ni-release so duaran balon brosyur ya Ondengel ed Dios Pian Manbilay ya Andi-Angga tan say pinasimplin bersion ed English ya Listen to God. Lapud daiset labat so akasulat ed saratan, mainomay tan maples ya ipatalos iratan. Diad tua, say Ondengel ed Dios Pian Manbilay ya Andi-Angga et naaprobaan ya ipatalos ed 431 ya lenguahe nen in-release itan.
2. Siopa ray minabang ed sarayan brosyur?
2 Siopa ray talagan minabang ed sarayan brosyur? Imanoen pa irayan situasyon ya mabetbet a nagagawad interon mundo:
• Legan a mitotongtong so manangipalapag ed householder, nayarin diad unonan pankanawnawa o diad impawil to, alikas ton ag-akapanaral odino ngalngali agmakabasa so householder.
• Manpupulong so sakey a manangipalapag ed totoon diad lenguahe ra et dagdaiset odino anggapoy publikasyon tayon nipatalos. Odino maslak ed saray walad teritorya et anggapo ray publikasyon ed lenguahe ra.
• Pupulongan na manangipalapag so sakey ya emel diad teritorya to panamegley na sign language.
• Labay na ateng ya ibangat so katuaan ed ugaw nin anak to ya agto ni amtay manbasa.
3. Anto ray nanengneng ed brosyur ya Listen to God?
3 No Anto ray Nanengneng ed Brosyur: Dagdaiset ya maong so akasulat ed brosyur ya Listen to God—maslak et antikey ya sentence labat tan say angibasiyan ya teksto diad leksab na pahina ya mangipapabitar ed saray manunan punto. Akin ey? Imadyin mo pan walay angiter ed sikay brosyur ya nisulat ed lenguahen agmo natalosan, ompan pati saray letra to et agmo nabasa. Makapainteres kasi itan ed sika, anggano balibali ni ray litrato ditan? Seguro andi. Ontan met, saray totoon agmakabasa et magmainomay ya nadismaya ed saray publikasyon ya wala ray akasulat. Kanian diad kada pahina, say sankaimano et saray imparaan a maong ya litrato, tan wala ray arrow ya mangituturo ed onsublay ya litraton pantongtongan.
4. Anto ray nanengneng ed brosyur ya Ondengel ed Dios Pian Manbilay ya Andi-Angga?
4 Saray litrato ed Ondengel ed Dios Pian Manbilay ya Andi-Angga et pareho labat ed Listen to God. Ginawa itan pian usaren diad pangiyaral ed saramay agtanton makabasa odino manaaral ni labat ya manbasa. Nayari met ya usaren itan na mangiyaaral anggano say uusaren na estudyante et say brosyur ya Listen to God. Diad tagey ya kawigi na kada sanabay ya pahina, walay tepet ya naebatan ed satan a leksion. Saray litrato et wala ray kaiba ton komento tan tekston angibasiyan. Diad gilig ed bandad leksab na dakel a pahina et walay kahon a wala ray kaaruman ya punto tan teksto ya nayarin pantongtongan, depende ed abilidad na estudyante.
5. Kapigan tan panon tayon iyopresi iratan a brosyur?
5 No Panon Iratan ya Usaren: Nayari yon iyopresi iratan a brosyur diad panagkabkaabungan no iisipen yon kaukolan, anggano say opresin literaturad satan a bulan et aliwan saray brosyur. (Nengnengen so kahon ya “No Panon a Nayarin Iyopresi Iratan.”) Nayari yo met ya iyopresi iratan sano ompawil, ya ibagad interesado ya walay labay yon ipanengneng ed sikato insan iderew ed sikato so brosyur.
6. Panon tayon nausar irayan brosyur ed pangiyaral na Biblia?
6 Lapud anggapo ray akasulat ya tepet ed Listen to God, say panaral ed satan et aliwan tepet tan ebat a singa gagawaen yo no mangiyaaral na libron Ibabangat na Biblia. Diad anggan anton kultura, labalabay na totoo so ondengel na saray istorya. Kanian usar yo ray litrato diad pangisalaysay na pinuyanan iran istorya ya akasulat ed Biblia. Ipaliwawa no antoy ipapasabi na saray litrato. Gawaen itan ya mabilabilay. Tepetan so iyaaralan no antoy nibaga tod saray litrato. Basaen iray teksto diad leksab na pahina, tan ipaliwawa itan ed sikato. Mantepet pian mansalita met so iyaaralan tan naseguro yon natatalosan to. No say uusaren to et Ondengel ed Dios Pian Manbilay ya Andi-Angga, basa yo iray komento tan teksto na kada litrato sano pantotongtongan itan.
7. Panon tayon natulongan ya onaligwas so iyaaralan tayoy Biblia?
7 Tulongan ya Onaligwas so Iyaaralan: Komon ta diad panaaral yo et niwalad estudyante so pilalek ya manaral a manbasa pian nakabat ton mismo si Jehova. (Mat. 5:3; Juan 17:3) Kanian no say uusaren yo et say Listen to God, ompan onsabi panaon et nayari yon bangatan ya manbasa, tan sarag yon iyalis ed Ondengel ed Dios Pian Manbilay ya Andi-Angga so panagaral. Anggano nasumpal yon iyaral so anggan dinan ed saratan a brosyur, agni akaparaan so iyaaralan parad bautismo. Kaukolan yon isublay ya aralen so libron Ibabangat na Biblia odino arum nin matukoy ya publikasyon ya ontulong ed sikaton natalosan a maong so Biblia.
8. Akin ya misalsalamat ka ed sarayan balon nausar ed ministeryo?
8 Nepeg ya ondengel iray totoo ed Soberano na uniberso pian manbilay ira ya andi-angga. (Isa. 55:3) Tan linawa nen Jehova ya naaralan na “amin a klase na totoo,” pati saramay agmakabasa no panon so ondengel ed sikato. (1 Tim. 2:3, 4) Misalsalamat itayo ed sarayan balon nausar tayod pambangat ed totoo ya ondengel ed Dios!
[Kahon ed pahina 3]
No Panon a Nayarin Iyopresi Iratan
Ipanengneng ed householder so pahina 2-3, insan ibaga: “Labay moy manayam ed mundo ya oniay itsura to? [Abuloyan ya onebat.] Isisipan na Kasulatan [odino sayan masanton libro] ya asingger lan gawaen na Dios iyan mundo ya marakdakep tan mareen a pasen, ya anggapoy mairap odino mansasakit. Imanoen pa no antoy kaukolan tayon gawaen pian makapanayam ditan. [Basaen so Isaias 55:3, ya nisitad tagey na pahina 3.] Ibabagad sikatayo na saya ya ‘ondago’ ed Dios tan ‘ondengel’ ed sikato. Balet panon itayon ondengel ed Dios?” Ibukay ed pahina 4-5 tan ipaliwawad sikato so ebat. No aliwan kombeniente itan ya oras ed sikato, itilak so brosyur tan iyeskedyul so ipawil pian ipaliwawa so ebat.