Antis ya Manpulong, Ompan Kaukolan Yo ni Mananap

1. Akin ya say panag-apag na teritorya ed saray lugar ya nanduruman lenguahe so uusaren et ibabase ed lenguahe?

¹ Nen Pentecostes 33 C.E., kayarin akaawat na masanton espiritu iray disipulo nen Jesus, “nansalita ra na nanduruman lenguahe” diad saramay nanlapud ararawin pasen. (Gawa 2:4) Bilang resulta, manga 3,000 so abautismoan. Makapainteres ta maslak ed saray bisita et makasalita met na lenguahen natalosan dan amin, nayarin Hebreo odino Griego. Balet mas pinili nen Jehova ya nipulong ed sikara so mensahe na Panarian diad mismon lenguahe ra. Seguradon say rason et lapud mas onkiwas iray totoo ed maong a balita no narengel da itan ed sarili dan lenguahe. Kanian natan, diad saray lugar ya nanduruman lenguahe so uusaren, say panag-apag ed saray teritorya et ibabase ed lenguahe. (Organisado, p. 107, par. 2-3) Anggapoy teritoryan iiter ed saray grupo ya mansasalita na arum a lenguahe, noagta pupulongan da iray mansasalita ed lenguahe diad teritorya na onsusuportan kongregasyon tan arum nin kongregasyon ya asingger.

2. (a) Anto so panag-anap, tan iner itan kaukolan? (b) Panon a makapantutulongan iray kongregasyon ya kimeyan so teritoryan nandurumay lenguahen uusaren? (c) Antoy gawaen tayo no walay naromog tayon interesado ya sananey so lenguahe to?

² No saksakey so lenguahe diad lugar yo, dadasigen yo ray abung no manpulong kayo. Balet aliwan ontan ed saray syudad ya nandurumay lenguahen uusaren. Nayarin wala met iray arum ya kongregasyon a sananey so lenguahe ra ya manpupulong ed teritorya yo. Nayarin mangiter iray impormasyon na saray nalmo dan mansasalita ed lenguahe na kongregasyon yo, balet say manunan akan-responsabilidad na pananap ed totoon sarag yon pulongan et say kongregasyon o grupo yo. (Nengnengen so kahon ya “Mantutulongan.”) Kanian kaukolan yoy mibiang ed panag-anap, mantepet-tepet kayo pian naromog yo iramay mansasalita na sakey ya espisipikon lenguahe. Panon so pananap?

3. Antoy ikonsidera na kongregasyon pian nadetermina no iner tan panon karakel ya oras so usaren dan pananap?

³ Pangorganisa ed Pananap: Say karakel na panaon ya usaren ed pananap diad lugar ya nanduruman lenguahe so uusaren et depende ed kipapasen. Alimbawa, panon karakel so totoo ditan ya mansasalitad satan a lenguahe? Pigaray manangipalapag? Pigara lan address so nala na kongregasyon o grupo? Agkaukolan ya pare-parehoy pananap ed kada teritorya, noagta manpokus ed saramay mas dakel so totoo tan ed saramay agmasyadon arawi. Balet importante ya organisado so pananap pian mas dakel so naikdan na pankanawnawa ya ontawag ed ngaran nen Jehova.​—Roma 10:13, 14.

4. (a) Panon so nepeg a pangorganisa ed pananap? (b) Anto ray arum ya paraan pian naanap iray totoon mansasalita na lenguahe na kongregasyon yo?

⁴ Pian agnadobdoble so pankimey ed saray lugar ya kaukolan a pananapan, nepeg ya iyuksoy tan idaulo na ulop na mamatatken so pananap, nagkalalo lad say manangasikasoy serbisyo. (1 Cor. 9:26) Diad saray grupo ya mansasalita na arum a lenguahe, nayarin say mangidaulo et sakey a kualipikadon agin laki, mas maabig no elder o ministeryal a lingkor ya tinuro na ulop na mamatatken ed kongregasyon a manusuportad grupo. Dakel ya kongregasyon tan grupo so walaan na maabig ya uksoyan ed panag-research, nayarin mangusar iran unona na directory odino Internet pian anapen iray ngaran na maslak a mansasalita na satan a lenguahe. Insan igapo lay pananap diad itawag ed telepono odino onlad saray address pian naamtaan no dinan ed saratan so ipilad teritorya. No praktikal, iyuksoy na ulop na mamatatken ed kongregasyon ya manusuporta ed grupo so sagpaminsan a pibiang na interon kongregasyon ed pananap.​—Nengnengen so kahon a “No Panon ya Anapen Iramay Mansasalita na Lenguahe na Kongregasyon Yo.”

5. (a) Anto ray arum ya suhestion ed saray manangipalapag ya mibiang ed pananap? (b) Antoy nayarin ibaga tayod totoo sano manaanap?

⁵ Nepeg a malinew so gagala tayo kada no mibiang ed pananap. Lapud sayan kimey et kabiangan na ministeryo, nepeg ya mankawes tayo a singa no manpulong itayo. Apaneknekan na dakel ya no ipraktis day presentasyon da tan mansalita ra ya usaren so lenguahe diad pananap da, napansiansia ray ligsa tan mas nakabisado day lenguahe. Sarag tayon ireport so oras na impananap tayo balet ta ag-ipipila so panaon ya impangiparaan tayod saray mapa na teritorya tan saray listaan. No walay naromog tayon mansasalita ed lenguahe, pansagpotan tayon inabang so maong a balita tan ipaamtan tampol ed manangasikaso na serbisyo odino siopaman ya tinuro to pian na-update so rekord na teritorya. Gawaen itan anggano ag-interesado so too. Anggano importante so pananap, nepeg itayon magmaliw a balanse tan mibiang ed amin a kabiangan na ministeryo.​—Nengnengen so kahon ya “No Antoy Ibaga Sano Manaanap.”

6. Anto ray nikadkaduman subok ed pananap na saray emel?

⁶ Pananap ed Saray Emel: Nikadkaduma iray subok ed pananap na saray emel, tan kaukolay pirmin sagpot tan panagsungdo. Agnaamtaan no say sakey et emel diad spelling na ngaran, itsura, odino kawes to. Sakey ni, nayarin labay ya protektaan na kapamilya o kakaaro so sakey ya emel kanian ngalngali ag-ira mangiter na impormasyon ed manangipalapag ya mantetepet. Saray onsublay a suhestion ed pananap na emel et nayarin makatulong met ed pananap na saramay mansasalita na sananey a lenguahe.

7. (a) Anto ray nayarin tepeten no manaanap na emel diad saray kaabungan? (b) Panon tayon naekal so pansuspetsa na householder ed ibisita tayo?

⁷ Maabig so resulta na impananap na saray kongregasyon tan grupo na sign language diad saray kaabungan. Nayarin walay nakatongtong yon anengneng ton mansa-sign language so kaabay da, katrabaho, odino kaeskuela. Ompan wala ray anengneng ton pakapatnagan diad lugar da ya wala ray manaayam diman ya emel. Odino walay kanayon ton emel. Tandaan ya nayarin pansuspetsaan da ka ed ibibisitam. Balet no ipanengneng mon tudtuan makaaro ka, tan diad antikey, matua tan magalang ya pangipaliwawam, naekal so antokaman ya panduaruwa rad sika. Anengneng na arum ya maabig no akapaway so DVD na Biblia o arum nin DVD ya sign language legan dan mantetepet ed householder no walay kabat ton emel. Insan ibaga da labat ya labay dan inabang so ilalo ya ibabaga na Biblia parad saray emel. No ngalngali agmangiter na impormasyon, ompan labay to balet ya awaten so address card yo odino imbitasyon ed saray aral na kongregasyon yo pian iter tod emel ya kanayon o kaaro to.

8. Panon a makatulong ed kongregasyon na sign language so asingger a kongregasyon?

⁸ Nayarin diad sakey odino duaran agew ed sakey taon, imbitaan na kongregasyon na sign language so asingger ya kongregasyon a dumay lenguahe ya ontulong ed sikaran mananap ed sakey ed saray syudad ya kaibad baleg a teritorya da. Diad pantitipon antis na kapapaway ya ikondukta na kongregasyon na sign language, nayarin wala ray instruksion tan demostrasyon nipaakar ed sayan kimey. Nayarin mangi-asain ed kada grupo na anggan sakey a manangipalapag manlapud kongregasyon na sign language, tan ikdan iray mapa na espisipikon lugar ya pananapan da.

9. Panon so pananap na emel diad saray lugar ya pantitiponan tan pampapasyaran odino pakakaawatan day serbisyo na gobierno?

⁹ Nayari met a say pananapan et diad saray lugar ya mabetbet a pantitiponan tan pampapasyaran na saray emel, odino diad saray lugar ya pakakaawatan day serbisyo na gobierno. Nepeg ya mankawes na matukoy ed situasyon iray manangipalapag. Mas maabig no mitongtong ed sakey o duara labat ya wadman tan magmaliw ya mataktika, imbes ya ibagay presentasyon ed interon grupo. No epektibo so impitongtong, nayarin makapan-iteran kayoy impormasyon no panon ya nakontak so balang sakey.

10. Panon so pananap na saray manangipalapag ed saray pasen na negosyo?

¹⁰ Say sakey nin paraan et say pangiparaan na saray mapa ya pakanengnengan na saray pasen na negosyo, tan onlad saratan ed matukoy ya oras. Nayarin diad sakey ya mapa et walay pigaran gasolinaan. Diad sananey et nayarin saray laundry, restawran, hotel, odino arum ni ran klase na negosyo. No kada mapa et parehon klase na negosyo so wadman, nayarin pareparehon presentasyon so usaren na saray manangipalapag, diad ontan et magmaliw iran eksperiensyado tan marundunong. Singa bilang, lapud saray hotel et mangaawat na saray emel ya kustomer, nayarin ipaliwawa tayon magano so kimey tayo ed desk clerk tan iyopresi so akaparaan ya package ya walay DVD tan imbitasyon parad saray aral na kongregasyon, ya iter na hotel ed saray emel ya kustomer da. Diad arum ya negosyo, nayarin mantepet tayo labat no wala ray mantratrabaho odino regular ya kustomer dan mansa-sign language. No diad teritorya et walay eskuelaan parad emel, nayari tayon iyopresi iray DVD tayo parad library da.

11. Akin a say pananap et importantin kabiangan na ministeryo?

¹¹ Sakey ya Importantin Kimey: Say pananap ed totoon mansasalita na lenguahe na kongregasyon yo et mankaukolan na panaon. Sakey ni, saray manaayam ed teritorya tayo et nayarin biglan manguman ta wala ray onaalis tan onsasabi, kanian mairap ya pansiansiaen ya sankabaloan iray impormasyon ed rekord na teritorya. Anggaman ontan, naaaruman iray lugar ya say pananap et importantin kabiangan na ministeryo. Si Jehova, say angiter ed sikatayo ed panagpulong a kimey, et agmanangidumaduma. (Gawa 10:34) Say “linawa to et nilaban so amin a klase na totoo tan nawalaan ira na suston pikakabat ed katuaan.” (1 Tim. 2:3, 4) Kanian komon ta mikoopera tayo ed si Jehova tan ed balang sakey diad pananap ed totoon walaay “maong tan maabig a puso,” antokaman so lenguahe ra.​—Luc. 8:15.

[Kahon ed pahina 5]

Mantutulongan

No labay na kongregasyon o grupo so patulongan ya mananap na saray mansasalitay lenguahe ra a nayari dan pulongan, kontaken na manangasikaso na serbisyo iray elder na asingger iran kongregasyon na arum a lenguahe. Mas maabig no say kontaken labat et saramay asingger ya kongregasyon odino saramay say teritorya da et dakel so mansasalita ed satan a lenguahe. Kayari to, ipaamta na saray kongregasyon ya ontulong ed saray manangipalapag da ya no walay nalmo ran mansasalita ed satan a lenguahe, isulat day address tan iter itan ed manangasikaso na serbisyo pian iter to itan ed kongregasyon o grupon onkekerew na tulong. Saray manangasikaso na serbisyo na balang kongregasyon so nayarin manggaway paraan ya praktikal ed sikara no panon a kimeyan so teritoryan mansasalitay nanduruman lenguahe, tan igiya iray interesado ed matukoy ya kongregasyon o grupo.

No saray manangipalapag et makaromog na mansasalitay arum a lenguahe ya talagan interesado (odino sakey ya emel), nepeg dan sulatan a tampol so Please Follow Up (S-43) form tan iter ed sekretaryo na kongregasyon da. Diad ontan et natulongan a tampol ed espiritual so too.​—Nengnengen so km 5/11 p. 3.

[Kahon ed pahina 6]

No Panon ya Anapen Iramay Mansasalita na Lenguahe na Kongregasyon Yo

• Mantepet ed arum​—saray iyaaralan na Biblia, kapamilya, katrabaho tan arum ni.

• Usaren so directory na telepono pian anapen iray ngaran na maslak a mansasalita na satan a lenguahe. Nayarin walay naalan directory ed Internet o diad kompanya na telepono ya say impangilista ed saray ngaran et unong ed address.

• Mataktikan mantepet ed saray lugar ya mangiiter na serbisyo ed saray totoo, singa diad library, opisinay gobierno, tan eskuelaan.

• Mannengneng na saray anunsio ed dyaryo nipaakar ed saray aktibidad ya inyuksoy na saray mansasalitay arum a lenguahe.

• Bisitaen iray shop tan negosyo ed lugar yo ya mangiyoopresi met na serbisyo ed saray mansasalitay arum a lenguahe.

• Mangalay permiso ed saray mangaasikaso ya mangiyan kayo na lamisaan parad saray literatura diad sakey a negosyo, diad student center na unibersidad, odino istasyon na luluganan ya mabetbet ya wala ray mansasalitay arum a lenguahe.

• No aliwan sebel ed bansa yo, mangaliw na directory na saray negosyo odino computer program ya man-search ed Internet na saray pampublikon pasen.

[Kahon ed pahina 7]

No Antoy Ibaga Sano Manaanap

Say makaaro, masimoon, tan direktan presentasyon et mangekal na pansuspetsa. Kaslakan et makatulong so pangipanengneng na literatura ed lenguahe da.

Kayarin mangibano, nayarin ibaga: “Aanapen mi ray mansasalita na ․․․․․ pian ninabang mid sikara so ilalon ibabagay Biblia. Walay kabat yo?”

No manaanap na emel, nayarin ibaga: “Hello. Walay labay kon ipanengneng ed sika. [I-play ed portable DVD player so sakey ya bersikulo manlapud New World Translation​—On DVD.] Sakey iyan bersikulo na Biblia ed American Sign Language. Likud ed Biblia, wala ni ray arum ya video mi ya naalan anggapoy bayar. Ginawa iraya pian niiter so espiritual ya pankaukolan na saray emel. Walay kabat yon emel o ngalngali agmakarengel ya mansa-sign language?” No anggapoy nanonotan na householder, maabig no mangiter ka ray alimbawa na lugar ya posiblin akanengnengan toy emel singa diad trabaho, eskuelaan, odino diad kakaabay da.