Protektaan Moy Konsiensiam
1. Anto so tema na espisyal ya asemblea ed 2013, tan antoy gagala na programa?
1 Inagew-agew itayon nipapaarap ed saray situasyon ya nayarin manresultad pakasumlang na konsiensia tayo. Kanian say tema na programa na espisyal ya asemblea tayo ed taon 2013 et “Protektaan Moy Konsiensiam.” (1 Tim. 1:19) Ginawa so programa pian natulongan so balang sakey ed sikatayon imanoen a maong no panoy panguusar tayod satan ya alay abig a regalo na Amalsa ed sikatayo.
2. Anto ran importantin tepet so naebatan legan na programa?
2 Talaranan Irayan Punto: Naebatan ed programa so pitoran importantin tepet nipaakar ed konsiensia:
• Anto ray nayarin mameligro ed konsiensia?
• Panon tayon nipasal so konsiensia tayo?
• Panon a posiblin magmaliw ya malinis ed dala na amin a totoo?
• Antoy ipatnag na pannonot tan ikiwas tayo base ed saray prinsipyo na Biblia?
• Panon tayon napaliisan ya nasugatan so konsiensia na arum?
• Sikayo ran kalangweran, panon yon makapantepel sano nadedesdes ya ikompromisoy pananisia yo?
• Anto ran bendisyon so naawat na saramay dedengelen day konsiensia ran igigiya na masanton espiritu?
3. Panon itayon nagunggonaan ed programa?
3 Diad tulong nen Jehova, nasarag tayo ray masilib a paraan nen Satanas pian deraley konsiensia tayo. Panamegley na Salita tan organisasyon na maaron Ama tayo ya walad tawen, oniay ibabaga to ed sikatayo: “Saya so dalan, ondalan kayo ed sikato.” (Isa. 30:21) Sayan programa et sakey a paraan nen Jehova pian nigiya itayo. Kanian, seguroen ya atendiay interon programa. Ondengel a maong tan nonot yo no panon yon niyaplikad bilay yo iray narengelan yo. Pantongtongan yon sankapamilya so narengelan yod programa. No iyaplika tayo ray instruksion ya naawat tayo, ombiskeg so determinasyon tayon ‘pansiansiaen a malinis so konsiensia’ tayo tan agnapatitan na saray temporaryon likeliket ed sayan mundo.—1 Ped. 3:16.