Tepet

◼ Anto ran prinsipyo na Biblia so onaplikad panangusar na cell phone diad saray Kristianon pantitipon tan diad ministeryo?

‘Amin a Bengatla et Walay Panaon To.’ (Ecl. 3:1): Baleg so nitulong na cell phone pian natawagan odino nai-text tayoy arum anggan anton oras. Balet, wala ray pankanawnawan aglabay na saray Kristiano so nadisturbo na cell phone da. Singa bilang, saray pantitipon tayo et panaon pian nidayew si Jehova, makaaral ed espiritual, tan makapanpapasesegan. (Deu. 31:12; Sal. 22:22; Roma 1:11, 12) Nayari tayo kasin erepen so cell phone kasabi tayod Kingdom Hall tan basaen iray message no akaalis ti’ la? No walay emergency tan kaukolan ya aka-switch so phone tayo, nepeg ya i-silent itan pian agmakadisturbod arum.

‘Gawaen so Amin a Bengatla Nisengeg ed Maong a Balita.’ (1 Cor. 9:23): No maminsan, kaukolan tayon usaren so cell phone diad ministeryo. Singa bilang, nayarin labay na agin mangidadaulo ya amtaey kipapasen na saramay kaiba ran manpupulong ed sananey a parte na teritorya da. No maminsan, kaukolan met na saray manangipalapag so ontawag ed sakey ya interesado odino iyaaralan na Biblia antis dan laen, lalo la no arawi panaayaman to. No walay awit tayon cell phone, seguroen ya ag-itayo nadisturbo na satan legan ya mitotongtong ed householder. (2 Cor. 6:3) Legan ya aalagaren iray arum ya manangipalapag, agta maabig no manpokus itayod ministeryo tan ed saray kaiba tayo imbes ya ontawag odino mantext?

Ikonsideray Arum. (1 Cor. 10:24; Fil. 2:4): Agtayo komon ibabaraan ya ayos labat so naatrasado ta sarag tayo met ya tawagan o i-text so arum no iner so pampulongan na grupo tayo. No atrasado tayo, ompan kaukolan lamet ya umanen iray manulop. Siempre, no maminsan et agtayo napaliisay naatrasado. Balet no ipasal tayoy onsabid dugan oras, ipapanengneng tayon ikokonsidera tayoy uksoyan nen Jehova, say agin mangidadaulo, tan saray agagin kaiba tayo.